IN TRIBUNALE

- Induva semu ?... S'è vo cuntinuate issu parapigliu, vi lampu tutti fora !

U ghjudice avia fattu l’appellu dipoi una stonda, è ùn ci era manera di sentesi.

- Scamaroni...

- Presente pà a terza volta.

- Site accusatu d’avè fattu u scandalu tutta a serinata cù une pochi di i vostri invitati.

U giandarme chì hà fattu u rapportu dice chì vo aviate u focu addossu...

- Quella di u focu addossu, ùn mi stona : era vinu di ziu Battì, acetu.

- Acetu o mele, impreme pocu : avete cantatu fin’à mezanotte.

- O sgiò ghjudice... ritenite chì in tutti i paesi civilizati, i teatri...

- Lascemu corre i paesi civilizati. Rispundite.

- Eranu i posti di tessef.

- I vicini anu ricunnisciutu a vostra voce.

- Prova chì i me vicini anu l’arechja ghjusta.

- Allora ricunniscite chè vo erate voi chì cantavate ? Almenu chè vo avissite arrigistratu qualchì discu ?

- Innò, o sgiò ghjudice... Dischi ùn ne aghju ancu arregistratu. Ma s’è vo fissite dischi cù tuttu u scandalu ch’elli facenu i vinti posti di tessef di stu maladettu quartieru, hè altru cà u scandalu di Scamaroni, ch'ùn era cà una serinata.

- Ùn site micca quì par accusà. I vicini si sò pienti.

- Allora, sì i vicini dumandanu a cundanna à morte di Scamaroni, voi à Scamaroni li tagliate u collu ?

- Ùn si tratta di taglià u collu à nimu !... Site cundannatu à pagà cinque centu franchi.

- Quantu ? Cinque centu franchi !

- Truvate ch’ella hè troppu, sicura ?

- Innò, o sgiò ghjudice. À u cuntrariu : credia chì a me voce saria stata stimata di più ! L’anu intesa più di trè centu parsone, face guasi trenta soldi à testa. In Parigi, i teatri...

- Iè, iè ... và bè. Vecu ciò chè vo vulite dì. Cinque centu franchi è ùn ricuminciate più !

- À beie u vinu acitosu di ssu furdanu di Battì ? A vi prumettu, o sgiò ghjudice.

Cavallaria Paisana, Natale Rochiccioli, Strattu di u capitulu XII, Ed.L’Ammaniti – CRDP di Corsica, 1999