L'acqua,

Sò l'acqua ch'omu ùn vede,

Sò l'acqua ch'ella si beie a crepa di a terra cum’e u ciucciu chì s'allatta in pettu à a mamma. Sò l'acqua chì face ingrandà è fiurisce.

Sò l'acqua di a fruntiera turchina, sò l'acqua di stu mare. Sò quellu Mediterraniu. Sò l'acqua di u litu chì ti face isulanu.

Sò l'acqua di sti lochi di memoria, quella chì fala da sti paisoli appesi à e cime. Sò l'acqua di ste muntagne chì si face a so impiaghjera.

Sò l'acqua di a funtana chì a to caccara si purtava in capu, quandu chì mancava l'acqua tempi fà. Sò l'acqua ch'è tù trovi in casa oramai è ch'è tù ingolli à cannella, ùn sò quella di l'Africa. Sò l'acqua chì si face spechju di u to campà.

Sò l'acqua chì ti face prò, quella chì ti ralegra dopu à u stantu. Sò l'acqua chì ti face gode una stonda permessa, crosciu da u stantapane.

Sò l'acqua di u tempurale, l'acqua chì casca nantu à st'omu solu chì ùn sà induv'ellu stà di casa. Sò l'acqua chì ti bagna quand’è tù sì solu in carrughju.

Sò l'acqua di e sicchie di u to core marturitu. Sò quella di e lacrime di u dolu è di a vita ferita. Sò l'acqua di u pientu.

Sò l'acqua...

Sò l'acqua di u fiume, quella chì rinfresca un ghjornu d'estatina. Sò l'acqua chì ti face gioia è gode e stonde di piacè d’una sponda à l’altra di a vita.

Sò l'acqua di u sudore, quella di u desideriu arditu è saziu. Sò l'acqua chì si sventa da e stonde d'amore. Sò l'acqua chì ti face amà.

È sò l'acqua, a resita di u fiume di a vita. Sò l'acqua di u fà d’ogni ghjornu.

Sò l'acqua ch'è tù ùn vedi ma chì ti face Omu.
Vedi, in una candella d’acqua ci si pò esse u mondu…