Semu lecchi, Un paese da sfà, Vita d’un anarchistu corsu?

Issi trè tituli, quasi quasi puderianu esse e trè parte di un’analisi etnulogica, sociulogica, psiculogica o psicusuciulogica... Umbèh, assai ne sò eiu... Andate à sapè voi s’è l’autore ùn ci annunzia custì ch’ellu s’appronta à presentà un prugrama puliticu pè a squatra ch’ellu purteria à e prossime elezzione... Merà, tuttu hè pussibule oghje ghjornu...

Sarianu trè parte di un custattu? 1) Semu lecchi: bilanciu pessimistu di una trafalata definitiva, 2) Un paese da disfà: Sfocu arrabbiatu è po’ in 3) Vita d’un anarchistu corsu: Ripigliu in manu di una situazione cù un prugettu libertariu per tutti ed ognunu di noi?

L’amicu Paulu ci faria sente cusì cum’ellu hè prontu ellu à indià si è dirige issu muvimentu custindi?

Pare pussibule l’affare, tantu più chì issu “messagiu”, appughjendu si nant’à u garbu, u talentu è a pupularità di I STRONCHEGHJETTA hè capace à fà tombula! À chì leghje ste trè pezze hè vera chì u successu pare assicuratu. U fine torna certu è sicuru sfuglittendu sta racolta duve ribombanu e sciaccamanate d’un publicu chì si campa ad ogni rapresentazione.

Eiu nucentone, l’aghju detta ingiru à mè. È bè, à chì m’hà mughjatu, à chì mi hà giratu u spinu è po’ ancu nigatu u mottu! Dicenu ch’issu teatru saria un sguardu criticu nantu à a Corsica è a so identità, è a spressione teatrale umuristica permetteria à l’autore di custruisce un’affresca. Saria atta à apre l’ochji inquantu à una situazione chì unepochi ghjudicheghjanu di cambiamentu negativu è angusciosu, è certi di mutazione, apertura è accessu à idee nove di l’identità. Allora mi dumandu... mi dumandu s’o ùn mi sò micca sbagliatu... È fà è fà, leghju è rileghju... È à quandu unu à quandu un altru, mi rivene à mente ogni passu d’issu libru...

G.Thiers