Oghje vi n'aghju da contà una chì vi hà da pare strana, i mo ghjattucci scacciafugheghjanu u nostru canone, fendulu scappà.

Campavamu  tranquilli, animali è umani, ognunu à e so faccende, oramai tutt'hè cambiatu. 

I cani allevati per caccighjà anu u so locu chjosu, ma Mascarone, un vechjottu di dece anni si ne scappava sempre di u canile.

À a fine li s'hè datu a permissione di stà si ne liberu è di campà vicinu à e carezze è à qualchì buccone, buscatu per furtuna.

Tandu i gatti si sò presi di ghjelusia.

Ùn sò chè elli à podè riceve e bone leccherie, è basta ! 

Face chì u ghjacaru avà spirta di paura è ùn s'avvicina più, tintacciu !

I ghjatti sò ghjunti dopu à u cane, sarrimanenti si ellu hà i denti pinzii, elli disponenu di sgrinfie chì cercanu l'ochji !

Temu d'esse custrinta à piglià un psichiatru per Mascarone, ghjè assai disturbatu da ste manere misgesche !!!!

Quand'ellu affacca u so capu, cù a minima voglia di vene à circà cumpagnia, i gatti, da i più grandi à l'appena nati, li correnu appressu è tandu senterete i mughji ! 

Fughje cum'è quellu chì vede à Satanassu in persona.

Sò cunvinta chì l'altri cani, quelli riclusi, si sbillicanu da a risa, vistu ch'ellu facia u bellu, u preferitu di u patrone, anzi ch'avà si ritrova à filà, a coda trà le ghjambe, spaventatu.

Mascarone, un mastinu tercanu in tempu di caccia, si caca à dossu davanti à dui mignoculi piluti, parenu fole ! 

È i vostri i misgi, sò tranquilli o ùn volenu à nimu trà li pedi ?

A mi pudite fà sapè, chì cusì ne parleraghju à u mo cane, li darà sullevu d'amparà ch'ùn hè solu à esse turmentatu da issi scrianzati accaniti ! 

Wouh wouah !  

Cathy Campana