1. Angelina hà 2 anni. Li piace à corre infuria è à manghjà sola... Vole sempre fà tuttu cum'è i più maiò è prestu prestu.

2. Angelina hè una zitelluccia pressata, fora di a sera è per a siesta !

3. Quand’ella hè stanca, Angelina và à piglià u so pilù "Fanfan". Fanfan hè un‘elefantucciu tondu tondu cù arechjone.

4. Angelina tene caru u so pilù cusì dolce ch’ella si mette contr’à a so faccia o ch’ella strufina nant’à u so nasu. Tutti quelli chì cunnoscenu à Angelina sanu ciò chì vole dì : Angelina hà bisognu d’un abbracciu è di dorme.

5. À tempu ch’ella si sveglia, Angelina cappia u so pilù. Quand’ella hè in casa, lascia Fanfan in u so lettu. Quand'ella hè à a ciucciarella, sà chì Fanfan hà da andà in a sporta di i ghjoculi in pilù. Ancu s'è Fanfan ùn hè micca sempre cun ella, vole dì assai per Angelina.

 6. Sta mane, Angelina s'hè svegliata assai prestu perchè chì hè un ghjornu speziale. Ghjè Natale à a ciucciarella è hè pressata d’andà ci. S’alza da u lettu sola è và à sveglià i so parenti ; à Angelina li piace à saltà nant’à elli mentre ch’elli dormenu. Li piace ancu à Fanfan di sveglià i parenti d'Angelina, perchè chì tramindui saltanu nant’à u lettu.

 7.U revegliu ùn hà ancu sunnatu, i parenti s’amusanu à chjappà Angelina è Fanfan per piattà li sott’à u piumone.

8. Avà, hè ora d’arrizzà si, è facenu tuttu ciò ch'elli facenu tutt’e matine : lavà si, veste si, fà u lettu, preparà u rompidighjunu... Simu di settimana, u babbu è a mamma d’Angelina si spiccianu è nimu si rende contu chì Fanfan si ne hè statu ficcatu sottu à un cuscinu mentre tutti facianu u lettu inseme.

 9. Angelina beie u so puppatoghju di latte in tavula, cum'è una grande, accantu à a so mamma è à u so babbu chì beienu u so caffè. Dopu à u rompidighjunu, a mamma parte à travaglià è u babbu si cura di ella per aiutà la à appruntà si è purtà la à a ciucciarella.

 10.Quella matina, u so babbu hà una riunione impurtante è ùn vole micca esse in ritardu per u so travagliu. Angelina hà da spiccià si è ùn piglianu micca u tempu per verificà ch'ella hà tutti i so affari in u so saccucciu.

11. Angelina ghjunghje à a ciucciarella è scappa à ghjucà cù i so amichi, ch’ella hè cuntentissima di ritruvà. Sanu chì hè un ghjornu speziale è ùn ponu aspettà per cantà ‘babbucciu Natale” è fà a festa. U so babbu li dà un basgione è scappa per ùn esse in ritardu.

 12. Angelina si campa à a ciucciarella. Hè assai stanca è, dopu manghjà, và à piglià u so pilù Fanfan per dà li un abbracciu. Ma Fanfan ùn hè micca in a sporta è tandu Angelina cumencia à pienghje. Subbitu, Tattì, a so zia di a ciucciarella, vene à vede la è li dumanda ciò chì si passa : « Aghju persu u mo pilù ! » Li disse Angelina trà singhjozzi.

 13. Tattì a cunsola è li prupone di verificà s’è Fanfan ùn si n’hè statu in u so saccucciu. Ma Fanfan ùn ci hè mancu custì. Allora Tattì spieca à Angelina ch'ella hà da dorme senza u so pilù ma li pare cusì duru ch'ella si rimette à pienghje. Tattì hè assai cummossa. Tandu prupone à Angelina di prestà li Signora Kata-Stroffa. A Signora Kata-Stroffa hè un pilù di a ciucciarella, un pilù chì stà sempre quì per cunsulà i zitelli in casu di catastroffa : ghjinochju spellatu, pilù scurdatu, litica o tazzone...

 14. À Angelina li piace à a Signora Kata-Stroffa ancu s'è nisun pilù pò rimpiazzà Fanfan. Allora ella và à fà una siesta, spieghendu li ch'ella seria u so pilù, ma solu per oghje. Angelina ùn dorme tantu quellu ghjornu perchè chì li manca assai Fanfan è chì ghjè Natale ! Mentre a festa, Angelina ghjoca assai è manghja tanti dolci è bombò.
 
15. Però ùn si scurda micca di Fanfan è salta in e bracce di a so mamma à tempu ghjunta. A so mamma a rassicureghja dicendu li chì Fanfan deve esse da sicuru in casa è ch'ella spera ch'ellu ùn hà micca fattu troppu scimizie. Appena vultata, Angelina cerca in ogni locu Fanfan ma ùn lu trova. Hè l'ora di u bagnu è prestu l’ora di a cena è Fanfan hè sempre sparitu. Angelina hè cusì trista ch'ella ùn pò micca dorme cusì è a so mamma li prupone di leghje una storia in u so grande lettu.
 
16. È mentre ch’elle stallanu i cuscini per a lettura, Angelina scopre u so pilù Fanfan chì dorme tranquillu tranquillu. Chì felicità ! Ella l'abbraccia assai forte è li dà tanti basgi. Appena a so mamma hà finitu di leghje a storia, Angelina và in lettu cù Fanfan. A  mamma è u babbu sentenu Angelina parlà per un bellu pezzu prima ch'ella s’addurmenta ma ùn li dicenu nunda per sta sera. Anu capitu chì Angelina avia assai cose à dì à u so caru pilù.