Persone :
U sgiò Petru, veduvu.
Tuttuccia, a figliola.
Serena, a serva.
Camillu, innamuratu, eppoi sposu di Tuttuccia.
Cecca,
Ciriola,} cumpagnole.
Mianna.
Un buiatteru.
Un capraiu.
Mascare, marinari è passaghjeri.
(A scena si passa in Bastia ; ind’i cuntorni è in vapore).

ATTU I.

(In casa di u sgiò Petru : una camera grande è ricca, ma disordinata, un’accabigliu di mobili, vestiti, pettini è buccette d’odore).

SCENA I.

TUTTUCCIA (sola davant’u spechju). - Oghje sò scialbita ! Ùn valenu pillule di ferru, acqua d’Orezza, vini scelti è bistecche meze crude per arricchì mi u sangue : pargu una panizza... È tante puvarette si pascenu d’erba, cum’è bestie, è sò fiori !... Mi cunsiglia u medicu d’alzà mi à l’alba, di fà motu, di piglià bagni d’aria è di sole... Sì, perch’e m’arrussisca a pella, è sumigli à a mo lavandara !... Hè ancu megliu restà pallide : ci si rimedia c’u russettu... Ma ùn sarebbe nulla l’apparenza ; mi manca a sustanza, a salute : sò piena d’acciocchi è dulori, ed aghju appena vint’anni !... Eo chì balleria nell’acqua, ogna spessu chì mi ne stia à pusà : fattu quattru passi mi vene a palpitazione ! Sè cuntinua cusì, diventu prestu un scolu è mi si puderà coglie c’u cuchjarinu... Mi stringnu forse troppu... È s’è m’allentu, m’ingrusserà a vita, è ùn diceranu più quandu passu : Chì taglia di vespa ! . Nò, nò, suffrimu un pocu, per chè ci cresca sempre u numeru di l’ammiratori... Hè cusì dolce d’esse guardata cun desideriu ; sente si intornu cum’è un’atmosfera d’adurazione !... Sì, vogliu esse ludata, curtegiata, invidiata... almenu sin’à u matrimoniu... Dopu... si viderà... Ùn intendu mancu, allora, sutterrà mi viva ! ... Un maritu ! Ci pensu ghjornu è notte cù passione... è mi spaventa ! S’è mi capitassi qualchì tiranu, chì mi cunfinassi in casa à serve li di valia è di cucinara ?... Megliu stà si ne figlia... Figlia ! È allora diceranu ch’ùn truvai un cane chì mi vulissi !... Ùn ci hè periculu : quandu si posa sopr’à centu mila franchi si pò aspettà tranquillamente qualchì bona occasione, un maritucciu docile è cume si deve... Si prisentonu ghjà tanti partiti ! Ma babbà hè difficile : l’unu u ricusa perchè troppu svegliu, è l’altru perchè troppu addurmintatu... Sè stessi à mè, mi sceglieria un durmiglione, perchè a moglia deve avè u spiritu per dui sè vole cummandà altrò chè in cucina... Lascemu andà, è preparemu ci intantu à a festa di sta sera, una predica in francese, induve currerà tutt’u mondu elegante di Bastia... Chì vestitu metteremu ?... U grisgiu hè distintu, è mi dà l’aria sentimentale... Ma quale hè u giovanu avà chì guarda à u sentimentu ? Li ci vole u spiccu, u chjassu per attirà lu... Si sceglierà dunque una roba accesa, moltu più chì mi ne munterà in faccia qualchì fiamma... Eppoi u rossu, chì prima era pasciaghju, diventò di moda n’e cità : chì ùn l’hà nè u vestitu u porta nè u ventagliu o u parasole... Cusì mi vestu di rossu... È u cappellu, quale si sceglierà ? ... Hè una cosa impurtantissima, poichè inquatra a parte più nobile d’a persona... Dice Memetta ch’u neru cun penna bianca mi stà à maraviglia... Ma ella hè a mio rivale, chì pretende à a manu di Camillu, è parla forse cusì per ghjelusia... À mè pare chè issu cappellu m’imbruttisca è m’invechji : sumiglia à un catafalcu ! ... U negru, d’altronde, sopra u rossu ùn stà bè : risalta troppu... È u rosè ? Ancu menu : ùn risalta abastanza... S’o mettissi l’aranciu c’a so curunetta di pappaveri bastardi è di spighe ?... I pappaveri sarebbenu c’u vestitu in armunia, è e spighe c’a mio faccia chì ci splenderebbe in mezu cum’è rose nè i campi ; è facendu mi scende à a fronte, à u collu è à l’arechje qualchì ricciulettu biondu sarà cumpletta l’illusione... Ma chjamemu à Serena : hè una dunnetta intesa è di bon cunsigliu, chì travagliò un pezzu da sartore, è stede un annu à u serviziu d’una veduva civetta.

(Sona a campanella).

D’ella mi possu fidà, ch’hè interessata à u mio successu : più a patrona cunquista è più a serva acquista, perchè l’aduratori li unghjenu e mane.

(Entre Serena).

SCENA II.

TUTTUCCIA è SERENA.

SERENA. - Signora hà sunatu ?

TUTTUCCIA. - Sì. Sai chì sta sera ci sarà à San Ghjuvanni una riunione di Dame di Carità, cun predica in francese è questua ?

SERENA. - Ci s’affulleranu tutt’i galantini di Bastia...

TUTTUCCIA. - Bisogna ch’a to patrona ùn ci sfiguri, è per ciò ti dumandu un cunsigliu : cumu aghju da veste mi?

SERENA (ridendu) .- Cun sta faccetta, signora ùn sfigureria mancu vestuta à carnavale ! Ma poichè signora ricorre à mè per un cunsigliu, li parleraghju franca !

TUTTUCCIA. - Hè cosa aspettu da tè.

SERENA. - Imprimis, e so robe sò troppu accullate... (tastendu li e spalle) Di sta carne bianca è morbida ogn’à mustrà ne u più chì si pò ! Cosa sò e sete è i damaschi in cunfrontu ? Stracci !... Ùn hè di questu chì l’omi s’innamoranu...

TUTTUCCIA. - Puru, a tuletta cambia a ghjente...

SERENA (ridendu) . - Ùn dicu chì sia inutile, ma ùn deve serve chè à cresce u desideriu pè a persona...

TUTTUCCIA. - Sai bè chè babbà ùn c’intende, è mi vuleria infanguttata cum’è una sora.

SERENA. - Sgiò u lasci grachjà : l’omi gridanu, eppoi s’acchetanu... D’altronde, quì ci hè un rimediu !

TUTTUCCIA (vivamente) . - Quale ?

SERENA. - Escendu di casa signora si copre c’a mantiglia -tantu simu d’invernu- è, ghjunta in chjesa, s’alza u tendone : sarà un colpu di scena.

TUTTUCCIA . - Ma e mio robe sò tutte accullate, è da quì à sta sera a sartora ùn hà tempu di cambià le...

SERENA. - Mi ne incaricu eo !

TUTTUCCIA. - A guasterai...

SERENA. - Ùn ci hè periculu : sò meza sartora... Eppoi, li ripetu, i giovani -ancu i vechji- guardanu à a carne. Signora ùn li ne mostri micca troppu, perchè allora ne serianu techji, ma abastanza per accende i so desiderii pè u restu, insomma una cosa decente.

TUTTUCCIA. - Sì una vera maestra ! ...

SERENA. - Imparai à mio spese, è sò stata à u serviziu d’una viduvella chì si vulia rimarità, è chì l’omi i cunnuscia...

TUTTUCCIA.- Circheremu di cuntentà ti.

SERENA. - Oh, ne sarà cuntenta ancu Signuria ! ... Un’altra cosa : e so robe, ogn’à rillevalle per daretu.

TUTTUCCIA.- Ùn hè più a moda !

SERENA. - Turnerà, perchè ci cunvene, è signora ne dia l’esempiu. Cosa sò ste rote lisce lisce, chì pare ch’ùn ci sia nulla sottu ?

TUTTUCCIA. - Ci metteremu un cuscinettu.

SERENA. - Un’altra osservazione : signora surride spessu, è li stà bè, poichè hà i denti belli. Ma ancu e so gambe ùn sò ingrate, è perchè ùn mustrà le spessu ?

TUTTUCCIA. - Cumu fà la cun decenza ?

SERENA. - Ùn mancanu l’occasione in Bastia, duve si camina ind’u mullizzu, è si colla è si fala cuntinualmente !

TUTTUCCIA. - Ùn capiscu.

SERENA. - Mi spiegu : si trova un pantanu, un pò di lozzu, o peghju ? Si scende di vittura, d’una scala, o ci si monta ? Ùn hè tuttu un pretestu per alzà si a roba à quelle ch’anu u pede è a gamba cum’è Signuria ? Signora i lasci piattà à e sturtine -ci n’hè tante !- è segui u mio cunsigliu : chì ùn s’aiuta s’annega.

TUTTUCCIA (pianu). - Chì forca ! (forte) Ci penseremu... Ma ùn ai ancu dettu cumu devu veste mi... Eo credu ch’a mio roba rossa...

SERENA. - Li stà male, è li dà l’aria d’una paisana !

TUTTUCCIA. - Ma spicca.

SERENA. - Ahù ! Di sti tempi, ci n’hè tante chì nimu ci face attenzione ! Eppoi, in chjesa, frà a ghjente affullata, ùn si vede chè da e spalle insù...

TUTTUCCIA. - È allora ?

SERENA. - Ogna chì dia in l’ochju sta parte d’a persona.

TUTTUCCIA. - Ebbè ?

SERENA. - Ora, c’una roba rossa sparisce a faccia cum’è ind’una fiamma.

TUTTUCCIA. - Dunque ?

SERENA. - Dunque un vestitu spentu, u so grisgiu per esempiu, è u cappellu di listessu culore, cun penna bianca, faranu risaltà e rose d’a carne, è mettendu si l’arechjini è a so cullana di perle scimiscerà tuttu Bastia !

TUTTUCCIA. - Averaghju l’aria d’una pensiunera...

SERENA. - Sò quelle appuntu, ch’innamoranu...

TUTTUCCIA (ridendu). - I vechji...

SERENA. - Tutti... Signora sà bè chì si nasce avà vechji in Bastia...

(Entre u sgiò Petru).

SCENA III.

E precedente è u sgiò PETRU.

PETRU (à Serena). - Vai in cucina !

TUTTUCCIA. - Lascia mi la un pocu ; mi abbisogna pè a tuletta di sta sera !

PETRU. - Ùn si dicerebbe chì si tratta d’un ballu ? In isse cerimonie chjesale più a roba hè mudesta è più cunvene !

SERENA . - Sè sgiò leva e chjese à e signore, duve mustreranu e so tulette ? N’e serate ? Ùn ci n’hè più chì a pulitica l’hà tombe...

PETRU (bruscu) . - Vai à discorre cù e pignatte, è ùn ti la fà più ripete !

SERENA (pianu, andendu si ne) . - Scrianzatacciu ! A pagherai !...

(Esce Serena).

SCENA IV

PETRU è TUTTUCCIA.

PETRU. - Credi chì possi durà ?

TUTTUCCIA. - Cosa facciu ?

PETRU. - A civetta. Ùn si parla chè di tè, in Bastia !

TUTTUCCIA. - Tantu megliu : segnu chì valgu qualcosa...

PETRU. - Ma si ne dice omnia maledicta !

TUTTUCCIA. - Corci quelli ch’ùn sò criticati : ùn danu in l’ochju à nisunu !

PETRU (ridendu). Ghjà ! E donne sò cum’è i pueti : u più gran dispettu chì si possa fà hè d’ùn parlà ne.

TUTTUCCIA. - È l’omi, ùn sò forse listessi ? Quanti si ne puderianu vive ignurati è tranquilli, è s’esponenu à l’impruperii d’i ghjurnali, pur chè si faccia intornu à u so nome un pò di chjassu !

PETRU. - Cos’hè ? T’occuperesti di pulitica ?... Per compie l’opera ùn ci mancheria altru !

TUTTUCCIA. - Ùn sarebbe un meraculu : si ne sente discorre ancu in cucina ! Ma pocu m’importa a vostra pulitica arrabiata : a mea hè quella d’attirà mi un gran curteu d’ammiratori, per avè campu di sceglie mi, trà elli, un bon cumpagnu... È mi riesce, chì tanti è tanti mi bramanu...

PETRU (ridendu). - Micca per moglie, chì temenu di perde ci a so leghjittima !

TUTTUCCIA (stizzita). - Sai puru chì m’anu dumandatu ?

PETRU. - Storia antica ! À misura chì ti cunnoscenu scappanu tutti à barretta in gobiu, sicchè prestu ùn ti resterà più chè stu lunzacciu di Camillu...

TUTTUCCIA (ridendu). - È cume ùn mi lu voli dà, mi ne mureraghju c’u mo fiore !

PETRU. - Ridi puru, chì pienghjerai dopu !

TUTTUCCIA. - Si spera di nò... Ma à prupositu di Camillu, perchè ùn lu voli ? Hè bravu, riccu...

PETRU. - Hà tuttu cun sè ; ma dorme troppu, è tù ai bisognu d’un maritu svegliu !

TUTTUCCIA. - Ùn si dicerebbe ch’o sò una capivana !

PETRU. - Nò, ma u faci crede...

TUTTUCCIA. - À quale ? À i sciocchi ? Ùn mi ne curu.

PETRU. - Ai tortu ; sò i più numerosi ind’u mondu, è a so opinione finisce per prevale.

TUTTUCCIA (ridendu). - Stà à vede chè l’omi s’innamoranu d’e marmotte ! E lascianu ind’u so tufone.

PETRU. - Ùn li piacenu mancu e scimie. E guardanu per curiosità d’i so garbi ; ma nimu pensa à purtà si le in casa !

TUTTUCCIA. - Faraghju anch’eo cum’è l’altre ; dopu u matrimoniu...

PETRU. - Sarai più scema chè prima, s’è ùn ti curregi à tempu : i vizii, ogn’à dumà li subitu ; sinnò ti guvernanu elli. Ne cunnoscu tante sgangarate, è cun figlioli, chì si vestenu cum’è pappagalli !

TUTTUCCIA. - È ci n’hè tante Cenerentule, chì si morenu ignurate ! Ùn simu più à i tempi antichi, duve si circavanu c’u lampione e donne di casa : avà u mondu hè di chì si lu piglia !

PETRU. - Cioè d’i ciarlattani. Sai duve ste massime cunducenu e zitelle ?

TUTTUCCIA. - À u matrimoniu !

PETRU. - Senza u permessu d’u sgiò Merre... Senti : Sì figliola sola, orfana di mamma, è per ciò sò statu per tè debule assai, cedendu quasi sempre à i to capricci, ancu scemi... Ma hè tempu di finì la per ùn fà a to disgrazia è a mea. È, prima di tuttu, ogn’à liberà ti d’a to servaccia...

TUTTUCCIA. - Ne piglierai una peghju... Questa, almenu, mi ghjova ch’hè stata sartora... Senza di ella à quale devu ricorre per veste mi ? À tè ch’ùn ti ne intendi ? Ah, sè avissi a mio mamma !...

PETRU. - Averesti altre idee...

TUTTUCCIA. - Ancu tù !

PETRU. - Saria cun tè più severu !

TUTTUCCIA. - Più ghjustu, chì a to moglie ti faria sente a ragione...

PETRU. - Pigli assai calore pè una serva !

TUTTUCCIA. - Perchè m’hè utile, indispensabile ... (accarizzendu lu). È cusì, a mi lasci ?

PETRU (intenneritu). - Abusi di a mo debulezza... ma vi surveglieremu megliu !

TUTTUCCIA. - Quantu voli ! Noi ùn emu secreti.

PETRU (severu). - È s’è m’accorghju di qualcosa, guai à ella è à tè !

TUTTUCCIA (finghjendu paura). - Madonna ! Ùn mi guardà cusì, chì mi spaventi ! Ùn ricunnoscu più u mio babbu, cusì tennaru, cusì bonu, chì mi facia scurdà ch’eo sò senza mamma ...

PETRU (dolce) . - Alò, alò, chì feci per burlà !... Ma tù devi cuntentà mi...

TUTTUCCIA. - Ùn sonniu altru...

PETRU . - Ùn corre tantu à e feste, o mostra ti ci almenu assai più riservata !

TUTTUCCIA. - Bisogna bè chè ci cumparisca ind’u mio rangu : sinnò a critica serà per tè !

PETRU . - È issi bagni di mare, hè nicessariu ch’è tù i pigli in cumpagnia, è vestuta à pagliacciu ?

TUTTUCCIA. - Hè a moda !

PETRU. - Chì moda ? À tempi mei e donne ùn si mettianu cusì à buleghju cù i furesteri, è, quandu s’avia bisognu di bagni di mare, s’andava in famiglia è di notte à piglià li, in qualchì locu ritiratu...

TUTTUCCIA. - Cusì facenu e sigalaie.

PETRU. - Persuade ti d’una cosa : u più gran pregiu d’a giovana hè u pudore ; quella chì ne manca hè un fiore ch’ùn darà mai bon fruttu. Ponu coglie lu, pè u piacè d’un mumentu, i passaghjeri ; ma inguizzitu -cioè prestu- u ghjettanu ind’u mullizzu è ùn ci pensanu più ! Addiu... S’ai ghjudiziu, u mustrerai...

(Esce u sgiò Petru).

SCENA V.

TUTTUCCIA (sola). - Benedetti sti vechji ! Ùn si movenu, perchè li pesanu e gambe, è volenu ch’è noi, chì ci sentimu brullicà i pedi, stiamu cum’ed elli !... Ma i lascemu cantà, è sè ci ne vene l’estru, ci femu anc’una capriola.

(Entre Serena)

Ma ecc’à Serena chì torna !

SCENA VI

TUTTUCCIA è SERENA.

SERENA. - Hè surtitu l’orcu ?

TUTTUCCIA. - Sì. È pocu ci hè mancatu ch’è tù ùn escissi cun ellu !

SERENA. - È cumu ?

TUTTUCCIA. - Senza di mè, eri bell’è licenziata !

SERENA. - Signora ùn sà micca perchè ?

TUTTUCCIA. - Nò !

SERENA. - Perchè cercu à truvà un bellu maritu à a mo patrunuccia...

TUTTUCCIA. - Oh, via ! Ùn pò stà : ell’hè, più d’ogn’altru, interessatu à accasà mi.

SERENA (ridendu). - ‘Gnor nò : hà paura di stà solu.

TUTTUCCIA. - Sì una scema : c’a mea crescerebbe a so famiglia.

SERENA. - Ma ùn averia più ellu u cummandu. Sò eo cosa mi dicu.

TUTTUCCIA. - Oh, sbocca !

SERENA. - Signora ùn s’hè accorta chì cerca à alluntanà li i partiti ?

TUTTUCCIA. - Perchè crede ch’ùn mi cunvenganu : a face pè u mo bè.

SERENA. - U sgiò Camillu, per esempiu, ùn li cunvene ? Un riccone è una pasta ? Eppuru, l’indispettisce cù i so muttetti...

TUTTUCCIA. - Di fatti, ùn manca mai l’occasione d’umilià lu, trattendu lu di mamaluccu è peghju.

SERENA. - Signora senti una scema : ùn ci hè cum’è i tonti pè cuntentà e donne...

TUTTUCCIA (secca). - Parlemu d’altru !

SERENA. - Si sà : di tuletta.

TUTTUCCIA. - È di cosa voli discorre in stu mumentu ? Sai bè ch’ai da accuncià mi u vestitu pè a festa, è mancanu appena trè ore.

SERENA. - In trè ore ci hè u tempu di fà un papa... Eppoi signora deve arrivà in ritardu !

TUTTUCCIA. - Per cosa ?

SERENA. - Per fà si rimarcà : hè a moda. Quandu ognunu hè à u so postu signora entre tosta tosta, è à colpi di goviti, si face piazza... tutti s’alzanu, e donne murmurendu, è l’omi guardendu la cun l’ochjalinu ; insomma hè un pesta pesta è signora diventa u puntu di mira di l’assemblea... Mi pare di vede la...

TUTTUCCIA (ridendu). - C’a mio roba culor di mullizzu...

SERENA. - C’u pinnachju biancu, è e spalle scuparte, tenendu in manu una bandera infugata...

TUTTUCCIA. - Menu male chì ci sarà un pò di rossu ; sinnò ùn mi scurghjeria nisunu.

SERENA. - Signora ùn capisce una cosa : tutte purtendu culori accesi, ogn’à veste si altrimente per fà si un pocu rimarcà...

TUTTUCCIA. - Ah, questa hè una ragione !

SERENA. - Eppoi, ùn tenerà in manu a so banderetta ? Ma à propositu, un cunsigliu ! L’osservai più volte faccendu si u frescu : ùn hè questa a manera !

TUTTUCCIA. - Cumu ?

SERENA. - Invece di tene si u ventagliu strettu à u pettu, cuprendu si ne a parte d’u corpu più bella, ogn’alzà lu fin’à a fronte, agitendu lu prestu prestu cum’è l’ale d’una farfalla : cusì darà più in l’ochju è averà ancu, frà una passata è l’altra, l’occasione di guardichjà i so aduratori !...

TUTTUCCIA. - Hè troppu fatica !

SERENA. - Oghje ghjornu e cunquiste costanu sudori !

(Entre u sgiò Petru inviperitu)

SCENA VII

E precedente è u sgiò PETRU.

PETRU (à Serena). - Ah, serenissima ! Sò di sti cunsigli chì si danu à e figliole di famiglia ? Era daretu à a porta à sente e vostre bestemie. Avà capiscu perchè camina à troncacollu a mio figliola ! Sì tù chì li dai a spinta, o brutta strigaccia !

SERENA (scapendu). - Eo li unghju solu u sculiscellu.

(Esce Serena).

PETRU (à Tuttuccia) . - È tù, civittola, esci mi da l’ochji, è prestu !

TUTTUCCIA (pianu, andendu si ne). - Li passerà u furore.

PETRU (trattanendu la). - Ma nò ! Stà quì...

TUTTUCCIA (pianu). - L’hè ghjà passatu...

PETRU. - Sò stancu.

TUTTUCCIA (surridendu). - Riposati.

PETRU. - Ùn sò cose da ride. Sì, stancu di tè, chì cerchi ogni mezu per turmintà mi. Ti anu dumandatu in matrimoniu...

TUTTUCCIA (vivamente). - Quale ?

PETRU. - Camillu. Ùn ti lu vulia dà, è sai e mio ragione. Ma ùn ci n’hè altru p’e mane, è cumu a cosa preme, ti l’accordu.

TUTTUCCIA. - È s’eo ricusassi ?

PETRU. - Per Cristinadoria, vuleria vede ancu questa ! Quand’ùn garbava à mè, tù n’eri cuntenta, è avà u ricuseresti ?... Senti : ùn sò ancu vechju, è puderia rimarità mi...

TUTTUCCIA. - À l’omi attempati ùn mancanu mai e moglie zitelle... Ma ùn vi fate gattivu sangue : accettu !

PETRU. - Sia laudatu ! Avà ti sbruglierai cun ellu.

TUTTUCCIA (pianu). - O ellu cun mè...

PETRU. - Chì ùn hà penseri si pigli in casa una civetta !

(Scende u tendone)

ATTU II

(In casa d’u sgiò Camillu : un saluttinu elegante).

SCENA I

PETRU è CAMILLU.

CAMILLU. - O babbusò, fui ingannatu.

PETRU. - Cumu ?

CAMILLU. - Quante cose mi piacianu in Tuttuccia, ch’ùn li appartenenu ! I denti, i capelli , u culore, tutta roba d’i mercanti.

PETRU (ridendu). - Poichè l’hà pagata, hè soia.

CAMILLU. - Sò cose serie.

PETRU. - Seriissime.

CAMILLU. - Hè un veru tradimentu. Un ghjornu, li tiru i capelli cun passione, è mi restanu in manu ; un’altra volta, li chjoccu un basgiu, è mi tinghju di rossu u muccichile, chì paria insanguinatu ! ... È questu hè peghju : sta mane dolcemente li rimproveru e so finte, ed ella si mette à ride cusì forte chì mi sputa un dente in faccia.

PETRU. - Soliti scherzi d’u matrimoniu.

CAMILLU. - Ah, s’eo l’avissi saputa prima ! Oramai hè fatta !

PETRU. - Allora poni e to mente in pace, è cunsola ti pensendu chì ti trovi in numerosa cumpagnia.

CAMILLU (suspirendu). - Era cusì tranquillu !

PETRU. - Questu nò ! Mi cunfessasti più volte ch’ùn ne durmii nè ghjornu nè notte, chì, senza Tuttuccia, ti ne muria di cunsunzione. Avà t’hè passatu u furore...

CAMILLU (suspirendu). - È mi restò a moglie !

PETRU. - Hè appuntu quella chì t’hà guaritu. Vedi bè chì ci guadagnasti.

CAMILLU. - Ùn possu disputà cun voi, ch’avete più esperienza d’u mondu... Ma capiscu chì feci una cuglia, chì u male hè irreparabile...

PETRU. - Cerca dunque à vive cun ellu.

CAMILLU. - Sè Tuttuccia ùn avissi chè i capelli è i denti finti, puderia anc’andà, perchè ci hè altru ind’ a so persona chì mi piace.

PETRU. - Ùn sì, dunque, tantu da cumpienghje !

CAMILLU. - Ma mi tene in contu d’un servitore, trascinendu mi à i balli, duve ùn balla mai cun mè ; à e serate, duve mi lascia à discorre cù i vechji, o à dorme ind’un sedione...

PETRU. - Perchè ùn ti diverti cun ella ?

CAMILLU. - Ùn mi ne dà tempu, sguillendu mi di manu cum’è l’argentu vivu.

PETRU. - Fà li e to osservazione.

CAMILLU. - Mi ci sò pruvatu ; ma appena principiu si ne scappa à saltà cun l’altri...

PETRU. - Salta tù cun ella.

CAMILLU. - Per piglià mi qualchì strambagata ; hè un frullu.

PETRU. - È tù, ùn sì un giuvanottu ?

CAMILLU. - Ùn mi piacenu e pagliacciate.

PETRU. - Cunfessa chì sì un mullaccone ; ma cume Tuttuccia hè vespa...

CAMILLU. - Sì, una vespa...

PETRU. - Ogn’à lascià li un pò di sfocu... Ùn pensà, li passeranu e furie sè, cum’è speru, vi vene un pò d’infanteria.

CAMILLU. - È, intantu, diventeraghju scemu !

PETRU. - Ma ella ùn pò induvinà i to penseri... Spieca li li chjaramente...

CAMILLU. - Sè, appena cumenciu, si mette à cantà un’arietta, o mi risponde c’una risata !

PETRU. - Li parleraghju eo !

CAMILLU. - Megliu farete. Sinnò finiscerà male !

(Entre Tuttuccia)

SCENA II

I precedenti è TUTTUCCIA.

TUTTUCCIA (à Camillu). - Ùn sì ancu escitu ?

CAMILLU. - M’hà trattenutu babbà.

TUTTUCCIA. - Eppuru, sai chì mi bisognanu isse buttiglie pè a mio tuletta !

CAMILLU. - Manderemu a serva.

TUTTUCCIA. - Ùn sà leghje, è li puderianu dà una cosa per l’altra. È d’altronde, s’ell’esce, Dio sà quandu torna, chì si ferma sempre à discorre pè e strade...

CAMILLU. - Cù i suldati !

TUTTUCCIA. - Vuleresti chì parlassi cù i capitani ? ... Vai, vai è torna prestu.

CAMILLU (andendu si ne c’un suspiru, pianu). - Ah, feci una gran cugliuneria !

(Esce Camillu).

SCENA III

TUTTUCCIA è u sgiò PETRU.

PETRU. - Ti ricordi di e mio parolle ?

TUTTUCCIA. - Quale ?

PETRU. - Chì hè civetta da figlia hè arcicivetta da maritata.

TUTTUCCIA. - Stà à vede chì duveremu sutterrà ci ind’un omu !

PETRU. - Ebbi tortu di accuppià ti à un blemblè, ch’ùn sà chè dorme o suspirà à e to strambezze.

TUTTUCCIA. - Vuleresti chì mi minassi, n’hè ?

PETRU. - Ùn ci hè bisognu d’imbastunà a moglie per fà si obidi ; una parolla, un’ochjata basta.

TUTTUCCIA. - Cosa facciu ?

PETRU. - A to ruina !

TUTTUCCIA. - Turnemu à a solita predica.

PETRU. - Perchè torni à i soliti peccati.

TUTTUCCIA. - Finch’ùn aghju figlioli, mi cunsideru cum’è figlia, è vogliu diverte mi !

PETRU. - È quandu nasceranu, ti ne sbarrazzerai subitu, cunfidendu li à e serve, chì ne faranu faccediboia.

TUTTUCCIA. - Ùn ci femu u segnu d’a croce prima di vede u diavule ; speru d’ùn avè famiglia !

PETRU. - È perchè ti sì maritata ?

TUTTUCCIA. - Per esse libera...

PETRU. - Di truncà ti u collu, n’hè ? U to maritu hè ghjà bellu stumacatu...

TUTTUCCIA. - Ti disse qualcosa ?

PETRU. - Sì. È credu chì pensa à u divorziu !

TUTTUCCIA. - Hè impussibule ; hè troppu religiosu !

PETRU. - À a separazione, ch’hè peghju, perchè mette una donna in una pusizione falsa... è periculosa !

TUTTUCCIA. - Cumu pò stà ? Camillu si mostra cusì obidiente !

PETRU. - Ti faci illusione ; cova u male, è scuppierà... Oh, à tè ci vulia un omu svegliu ch’ùn ti risparmiassi e tirate di briglia è, à u bisognu, e staffilate...

TUTTUCCIA. - Oh, questu poi !

PETRU. - Parlu d’e staffilate murale, perchè l’altre ùn persuadenu chè e bestie...

TUTTUCCIA. - À la bon’ora !

PETRU. - È Camillu hè incapace d’un sforzu cuntinuu. Ma sè mai si decide, guai à tè, ch’u pultrone eccitatu diventa tremendu ! Nè u so core s’accumula intantu a rabia à pocu à pocu, è quandu travuccherà, scunterai, in una volta, tutt’i to peccati !

TUTTUCCIA. - Tamantu chjassu per qualchì difettucciu di vanità, ch’ùn hè meo, insomma, ma d’u nostru sessu ! Voi avete a pulitica pè svagà vi ; à noi, ùn ci resta ch’a tuletta, a nostra pulitica, più innucente di l’altra, perchè ùn costa lacrime à nisunu.

PETRU. - Dumanda lu à quelli chì si precipitanu per ella.

TUTTUCCIA. - Camillu hè riccu.

PETRU. - U lussu ruvinò altri patrimonii chè u soiu ; hè a goccia d’acqua cuntinua chì finisce per sbaccà a petra... Ma ell’ùn si lagna d’e to spese, chì si ponu arrestà vulendu, quantu d’a to civetteria, un male forse incurabile. Per piace à furesteri, chì ti sò, in fondu, indifferenti, sacrificheghji i to più cari, u to maritu è u to babbu.

TUTTUCCIA. - Mi pare chì duvereste esse fieri, ancu voi, di vede mi ammirata...

PETRU. - Ci hè di chè, pè u to maritu soprattuttu, d’u quale ùn si parla chè per mette lu in canzona...

TUTTUCCIA. - Cos’aghju da fà ci sè dorme sempre ?

PETRU. - Menu ch’è tù ùn credi ; ti ripetu chì cerca à scappà ti di manu !

TUTTUCCIA (ridendu). - Ùn mi sara difficile trattene lu ; và cusì pianu !

PETRU. - Hè appuntu questa a to illusione ! L’omi lenti sò inchjuccuti : pigliata una risoluzione, ci stanu fermi, perchè li custò troppu à piglià la, è ci vuleria listessu sforzu per rinunzià ci.

TUTTUCCIA. - Ma pensa propiu seriamente à a separazione ?

PETRU. - Quandu ti dicu ! Cuntinuendu di stu passu, ci arriverai, è prestu. Sicchè in nome d’a to chiete è d’a mea, d’u nostru onore, ti pregu è ti suppregu di cambià vita !

TUTTUCCIA. - Ùn possu rinunzià à e mio abitudine cusì bruscamente. Cosa dicerianu i maligni ? Ch’eo cedu à qualchì minaccia...

PETRU. - O à a spinta d’a ragione. Ma ùn ci hè bisognu di mutà si d’a sera à a matina. Oghje si lascia un capricciu, dumane un’altru, è s’arriva à pocu à pocu à vive da cristiani... Viderai a differenza : sò cusì grandi i piaceri d’a famiglia, chì ti surprenderà avè li tantu trascurati per corre daretu à chimere...

TUTTUCCIA. - Vi cuntenteremu...

PETRU. - Sta sera, per esempiu, ci hè un ballu...

TUTTUCCIA. - Ùn possu mancà, chì dedi a mio parolla !

PETRU. - À quale ?

TUTTUCCIA. - À u sgiò Carlu, chì m’invitò per una polchà...

PETRU. - È chì finiscerà per cumprumette ti... Hè un vantaghjolu, chì nè i circuli è i caffè ci assorda d’i so trionfi, ancu di quelli ch’ell’ùn ebbe mai...

TUTTUCCIA. - À u sgiò Tittu prumissi u valzu...

PETRU. - Questu sì ch’hè più periculosu assai, perchè menu scioccu ; ùn si vanta, enzi si difende d’e so cunquiste ; ma tuttu in ellu e pruclama, u surrisu malignu, e parolle in furchetta, è u silenziu stessu studiatu, quandu li ne parlanu l’altri !

TUTTUCCIA. - U mo cuginu Peppu mi ritene a prima mazurcha...

PETRU (cun dispettu). - È quandu ballerai c’u to maritu ?

TUTTUCCIA (ridendu). - Oh, ci ballu abbastanza in casa !

PETRU (suspirendu). - Ah, simu sempre sott’o Borgu !

TUTTUCCIA (ridendu). - Ùn pensà, arriveremu ancu noi !

PETRU (seriu). - Quandu ti sarai truncate e gambe... Senti : Camillu sarà quì frà pocu...

TUTTUCCIA. - Lascia mi fà ; sò eo cumu piglià lu !

PETRU (andendu si ne cun stizza). - Oh, sbruglia ti la !

(Esce u sgiò Petru).

SCENA IV.

TUTTUCCIA (sola). - Chì l’averia pensata di Camillu ?... Cumencia à dà curnate, u muntone ! U legaremu cun qualchì carezza... Eo ùn possu rinunzià à u mondu : c’un maritu cusì durmiglione, mi mureria d’angoscia in quattru ghjorni... Basta ch’e ùn faccia male. Surrisi à tutti, è cunfidenza cun nisunu... Capiscu anch’eo chì una moglia chì s’abandona finisce per esse abandunata da u sposu prima, eppoi da l’altri...

(Entre Serena)

SCENA V.

SERENA è TUTTUCCIA.

TUTTUCCIA. - Cunnosci a gran nova ?

SERENA. - Sè Signora mi la dice, sì !

TUTTUCCIA. - Camillu pensa à a separazione !

SERENA. - Oh, via ! À quale l’hà detta ?

TUTTUCCIA. - À babbà !

SERENA. - Invenzione per spaventà la !

TUTTUCCIA. - Nò, nò ! mi sò avvista anch’eo di qualchì cambiamentu...

SERENA. - Quale ?

TUTTUCCIA. - Ùn mi basgia più prima d’esce di casa, a matina.

SERENA. - Li l’averà difesa u cunfessore !

TUTTUCCIA. - Sarebbe bella chì si mettissi in capu di cummandà !

SERENA. - Ùn ci spezzu mancu sonnu ; ci vuleria troppu fatica.

TUTTUCCIA. - Oh, noi donne simu pur disgraziate !

SERENA. - Ùn tantu !... almenu, in sta casa...

TUTTUCCIA. - A lege a facenu elli ... è per sè...

SERENA. - È noi a scamuttemu... è per noi !

TUTTUCCIA. - À forza d’astuzia... cum’è schjave... Perchè ùn ci ricunnoscenu listessi diritti ?

SERENA. - Pare chì ci s’arriverà frà pocu... Saremu elettori, suldati...

TUTTUCCIA. - Oh, questu nò ! U saccu, u purteranu elli, ch’anu e spalle più forte... Eo mi cuntentu d’ùn fà nulla !

SERENA. - Allora, signora ùn si lagni.

TUTTUCCIA. - Mi lagnu perchè... perchè mi manca qualcosa !

SERENA. - Cosa ?

TUTTUCCIA. - Ùn la possu esprime.

SERENA (ridendu). - Ti la diceraghju eo : un pò di miseria...

TUTTUCCIA (ridendu). - Obligata !

SERENA. - ‘Gnor sì : chì pruvò a fame trova gustu ancu à u pane negru.

TUTTUCCIA. - Oh, finisci la c’a to pappulata ! T’occuperesti ancu tù di filosofia ?

SERENA. - Oh, Madonna ! u nome solu mi spaventa ! Ma vulia dì ch’e disgrazie sò u cundimentu d’a vita.

TUTTUCCIA. - Ricumenci a predica ? Saresti mai diventata un bacchittona ?

SERENA. - Dio ne libari ! U solu odore d’a cera m’illanguidisce u core.

TUTTUCCIA. - Allora stà zitta ; o parla mi d’u ballu. Hè pronta a mio curona ?

SERENA. - A mudista a prumise per duie ore.

TUTTUCCIA. - Tandu averemu pranzatu, è sarà impussibile pruvà la...

SERENA. - A curona ? ùn si manghja micca !

TUTTUCCIA. - Nò, ma ogn’à mette la sopr’a roba per vede ne l’effettu.

SERENA. - È allora ?

TUTTUCCIA. - È cumu si pone a roba, cusì stretta, dopu manghjatu ?

SERENA. - Signora si pigli un biscottu c’un bichjerinu, ch’ùn l’ingrusserà a vita !

TUTTUCCIA. - Ùn dici male : vai è compra mi una duzina di paste sfugliate fresche...

SERENA (ridendu). - C’a crema, n’hè ?

TUTTUCCIA. - Sì, ma soffice è legere, sai...

SERENA (pianu). - D’un quartu l’una ; è ci passeranu tutte ! (forte) Signor’ mi permette di dà ne una à mio niputuccia Lillina, ch’a tene cusì cara ?

TUTTUCCIA. - Vai, vai ; u dolce face male à e criature !

SERENA (pianu, andendu si ne). - Chì ti faccia toscu, o liccatà !

(Esce Serena).

SCENA VI

TUTTUCCIA (sola).

Chì fatica à campà cun st’omacci ! Volenu e cose à modu soiu... È Camillu ùn torna cù e buttiglie ! Ch’ellu pensi propiù à emancipà si ? Ùn li mancaranu i gattivi cunsigli : ne piove dapertuttu in Bastia... Suspettu a mio amicaccia Memetta, ch’ùn mi pò perdunà d’avè li datu a gambata. Hè mio colpa s’eo piaciu di più ?... Stava frescu Camillu cun issa moglie ! Ella sì, chì face da veru !... Ma e donne guaste sò e più gattive : credenu o volenu fà crede chì tutte li sumiglianu...

(si sente rumore)

Torna Camillu : ogn’à circà d’appacià lu, perchè mi cunvene assai...

(Entre Camillu cun duie buttiglie in manu).

SCENA VII

TUTTUCCIA è CAMILLU.

CAMILLU (torbidu). - Eccu e buttiglie : costanu dece franchi.

TUTTUCCIA (amabile). - Dece franchi ! s’è l’avissi saputa, ùn le cumprava !... I marcanti ùn anu discrezione...

CAMILLU (più serenu). - E nuvità, ogn’à pagà le. Ghjuvassinu almenu !

TUTTUCCIA. - Ah, questu sì, chì n’aghju vistu l’effettu !

CAMILLU (amabile). - Allora ùn mi lagnu.

TUTTUCCIA (accarizzendu lu). - Ah, tù sì un bravu maritu, ed eo ùn mi meritava tanta furtuna.

CAMILLU (pianu). - Si vede chì li parlò u babbu.

TUTTUCCIA. - Micca perch’eo manchi d’affettu, chì d’amore per tè ùn mi puderia vince nisunu...

CAMILLU (pianu). - Sè fussi cambiata !

TUTTUCCIA. - Ma ùn sò forse abastanza obidiente... Cosa voli ? Ùn la facciu per gattivezza... Hè più forte di mè : m’attiranu e feste di fora, bench’eo ricunnosca, cun tè, chì lascianu sempre qualcosa d’amaru.

CAMILLU (cun focu). - Ah, e sole gioie sò quelle d’a famiglia !

TUTTUCCIA (accarizzendu lu). - Sì, maritu caru. Vogliu segue i to cunsigli in avvenire, è per pruvà ti quantu sò sincera, rimandu ste buttiglie à u mercante !

CAMILLU (alegru). - Brava ! Tutt’iss’intrugli ùn ponu fà ti chè male.

TUTTUCCIA (turbata). - A dicenu quelli ch’ùn ponu o ùn volenu spende. A donna hè una pianta dilicata ch’hà bisognu di cure.

CAMILLU (impenseritu). - Allora à ste buttiglie ci teni ?

TUTTUCCIA (vivamente). - Assai... ma hè sacrifiziu per tè.

CAMILLU. - Ùn l’intendu... ma, dì mi, à cosa servenu ?

TUTTUCCIA. - À mantene ci fresche.

CAMILLU. - È e campagnole chì si lavanu à u fiume...

TUTTUCCIA (ridendu). - Micca sempre !

CAMILLU. - È si esponenu à l’intemperie, ùn si cunservanu megliu ch’e signore ?

TUTTUCCIA. - Si cunservanu ! Sè à vint’anni sò fere !

CAMILLU. - Rubuste...

TUTTUCCIA. - Bestie di soma. Ti piacerebbe, per esempiu, una moglie chì sumigliassi à a nostra lattaia, arrustita da u sole, piena di callane, sfiancata ? È ùn hà chè trent’anni !

CAMILLU. - Ma allevò sei figlioli, è vene tutt’e matine da Barbagiu à pedi c’a panera in capu. Queste sì, chì sò mamme di famiglia !

TUTTUCCIA (ridendu c’un pò di stizza). - Oh, perchè allora ùn ti pigliasti una Barbaghjaccia ?

CAMILLU (ridendu). - Perchè m’innamurai di Tuttuccia !

TUTTUCCIA (tennera). - Ama la dunque, malgradu i so difetti...

CAMILLU (tenneru). - Cusì facciu !

TUTTUCCIA. - Vedi, nimu apprezza u so bè, è invidia quellu d’u vicinu, perchè ùn lu cunnosce... Ma sfidu anc’una Barbaghjaccia di amà quant’è mè u so maritu !

CAMILLU (cun focu). - È qual’hè chì più di mè ti tenerà cara ?

TUTTUCCIA. - Nimu, ne sò persuasa. Pardunemu ci dunque l’un’à l’altru i nostri difettucci : ùn hè perfettu nisunu... Ma, sentimu, cosa mi rimproveri seriamente ?...

CAMILLU (imbarrazzatu). - Eo nulla...

TUTTUCCIA (surridendu). - Dì puru, ch’ùn mi la pigliu male : cunniscendu u mio peccatu, ne faraghju a penitenza assai vulintere ! Parlà, sù ! ùn sò una maga per induvinà u penseru.

CAMILLU. - Poichè sì decisa à vive ti ne tranquilla in casa toia, lascendu e feste...

TUTTUCCIA (interrumpendu lu vivamente). - Ùn possu intufunà mi cum’è una topa...

CAMILLU (timidu). - Ùn dicu questu. Ma...

TUTTUCCIA (vivamente). - Ci hè altru chì ti dispiace ?

CAMILLU (francu). - A to smania di piglià e mode più sceme...

TUTTUCCIA (ridendu). - Vuleresti, n’hè, ch’a to moglie cumparissi una ciavattona ? Ogna bè à segue u figurinu !

CAMILLU. - Quand’hè discretu.

TUTTUCCIA (accarizzendu lu). - Sè cercu à piace à l’altri, hè per piace à tè : sapendu mi invidiata, sarai più fieru è cuntentu di pussede mi...

CAMILLU (vivamente). - Nò, nò ! a mo cuntentezza stà in mè solu... Cosa m’importa l’opinione chì n’hà u mondu ? Eo vuleria ch’ùn ci cunniscissi nisunu...

TUTTUCCIA (cun dispettu). - À cosa ghjova a richezza s’hè ignurata ?

CAMILLU. - À gode si la in santa pace, facendu ne gode segretamente i puvarelli.

TUTTUCCIA (surridendu). - Cun ste massime si và forse in Paradisu ; ma s’hà in terra poca sudisfazione.

CAMILLU. - Più ch’è tù ùn credi : prova la, è viderai.

TUTTUCCIA (tennara). - A pruveremu. Cos’ùn faria per piace à tè ! (surridendu) Ma permetti mi di dì ti la : tù era natu per vive in clausura -eppuru ti maritasti, è ùn mi ne lagnu- ed eo per stà nè u gran mondu, cusì bellu d’eleganza...

CAMILLU. - È d’ipucrisia...

TUTTUCCIA (accarizzendu lu). - È duve sperava, c’un filu d’amore, strascinà ti ancu à tè... Ma vogliu cumbatte a natura, chjudendu mi, u più chì possu, in cunventu, c’u mio fratachjone...

CAMILLU(alegru). - Ah, viveremu tranquilli infine !

TUTTUCCIA. - M’ai persuasu : ùn ti cridia cusì eloquente !

(Entre Serena c’una curona in manu)

SERENA (à Tuttuccia). - Ecc’a so curona p’o ballu.

TUTTUCCIA (saltendu d’alegria). - Oh, cara ! hè pronta : andemu à pruvà la...

CAMILLU (cun stizza). - Cumu ? Vai à u ballu !

TUTTUCCIA. - Dedi a mio parolla... Ma dopu, sò tutta toia... À vede ci, maritu caru !

(Esce Serena cun Tuttuccia).

SCENA VIII.

CAMILLU (solu, suspirendu).

Ah !... Ùn si curregerà mai !... Hè pazzia sperà lu... È cosa facciu eo quì cun ste buttiglie ?... Mi vene a voglia di lampà le d’a finestra... Sì ; per avè una scena poi ? Per sente rimproveri, rugni ? Cosa face ? Ogna bè, un ghjornu o l’altru, finì la... Stu cuntinuu turmentu mi tomba... Ùn possu più tene ; a pacienza mi scappa... À u diavulu a moglie è a Corsica, sè ùn ci si pò vive tranquilli ! Quasi tutt’a mio furtuna hè in valori, è per mè tutt’u mondu hè paese... S’è mi ne facenu tante, i cappiu tutti, è mi ritiru in qualchì rumitoriu luntanu... Mi custerà fatica, perchè a tengu cara, malgradu i so denti è i so capelli falsi, è forse u so core... Ma insomma, ogn’à campà : è st’infernu ùn hè vita... Sì, sì, hè decisa. Principiemu da ste buttiglie !

(Ghjittendu le d’a finestra).

Eccu le ind’o mullizzu, da duve sò escite, è poi anderà à raghjunghje le a curona...

(Torna Tuttuccia vestita da ballu è c’a so curona in capu).

SCENA IX

CAMILLU è TUTTUCCIA.

TUTTUCCIA (giubilendu) . - Cosa ne dici ? Ùn stò bè ?

CAMILLU (stizzitu) . - Mi pari mascarata. Mi piaci assai più in scufia di notte !

TUTTUCCIA (ridendu) . - Ai una passione pè i barrittini... Ma duve sò e mio buttiglie, ch’ùn ti le vegu più in manu ?

CAMILLU (imbarrazzatu) . - Appughjendu mi à a finestra, mi casconu in carrughju.

TUTTUCCIA (stizzita) . - Ai fattu un bel colpu ! È avà, cume si stilla ?

CAMILLU . - Ùn ci vole tantu à comprà ne duie altre ! U mercante ùn ne manca.

TUTTUCCIA . - Ma sò dece franchi ghjittati...

CAMILLU . - Hè una disgrazia, chì pudia accade anc’à tè, è corru à riparà la.

(Pianu, andendu si ne). Chì vita !

(Esce Camillu).

SCENA X

TUTTUCCIA (sola).

Ci hè qualcosa sottu : a so aria hè torba... Saria forse megliu rinunzià à u ballu... Ma mi ci preparu da una settimana, pensendu ci ghjornu è notte...S’è ùn ci vò, ne facciu una malatia... Eppoi, devu cuntentà l’invidiose ch’ùn figuranu chè quandu ùn ci sò eo... Per sta volta , almenu, ùn possu mancà... Dopu... dopu, videremu...

(Entre Serena).

SCENA XI.

TUTTUCCIA è SERENA .

SERENA . - Ebbè, cosa disse videndu la cusì bella ?

TUTTUCCIA. - Hè scappatu !

SERENA . - Pussibile !

TUTTUCCIA. - È credu chè d’a rabia, abbia rottu e mio buttiglie !

SERENA . - Oh, via !

TUTTUCCIA (mustrendu le d’a finestra). - Guarda le quallà in mille pezzi.

SERENA . - Li seranu cascate.

TUTTUCCIA. - A dice, ma ùn ci credu : sò troppu luntane !

SERENA . - Diventa rabiosu : segnu chì li cresce l’amore.

TUTTUCCIA. - O u dispettu !

SERENA . - Ùn si prova dispettu p’e cose indifferente. A sò eo chì ci sò passata : u mio maritu mi mustrava sempre cusì a so passione. Quandu li ne venia un accessu, si sfugava sopra i mobili, è spessu sopra di mè rumpendu mi qualcosa...

TUTTUCCIA (ridendu). - Grazie tantu ! Di sti segni d’amore mi ne passu vulinteri !

SERENA . - Sè signora sapissi, dopu isse furie, cumu l’omi diventanu vienni !

TUTTUCCIA. - Nò, nò ! megliu un pò menu d’amore chè isse spressione villane... Ma, ghjà chè sò vestita, femu e prove per sta sera... Cume pensi chì si devi entre in sala ?

SERENA . - Dipende. Sè ci hè assai ghjente, signora s’avanzi dignitosa, cum’è una regina... Signora ùn hè curunata ?

TUTTUCCIA (ridendu). - Di fiori, mentre quelle si curonanu spessu di spine...

SERENA (ridendu). - Ahù ! e spine sò per noi puvarette !

TUTTUCCIA. - Oh, lascemu a pulitica di l’omi, è occupemu ci d’a nostra, ch’hè di cunquistà u mondu c’un surrisu...

SERENA . - È cun altru . È ci riescimu !

TUTTUCCIA (ridendu). - Micca sempre ! Mi cunsigli di mustrà mi severa ! mi pare pocu cunveniente in una festa di ballu.

SERENA . - È per questu, appuntu, farà sensazione. Li murmureranu tutt’intornu : « Guarda issa giovana, cum’hè seria ! Ùn pare ch’entri in chjesa ! »

TUTTUCCIA. - Un bellu cumplimentu ! Ogn’à prega cù i Santi è à saltà cù i fanti, dice u pruverbiu !

SERENA . - È sè signora face cum’è l’altre, qual’hè ch’a distingue ! U scemu frà i savii, è u saviu frà i scemi sò rimarcati...

TUTTUCCIA. - È criticati...

SERENA . - Cosa face ? L’impurtante hè d’attirà l’attenzione... Signora si scorda sempre d’i mo cunsigli.

TUTTUCCIA (faccendu ne a prova). - Entreremu dunque cusì.

SERENA . - Brava ! Signora pare veramente una regina !

TUTTUCCIA. Eppoi ?

SERENA . - Eppoi, à pocu à pocu, nè u calore d’u ballu, si strughje a maestà reale, è signora cumparisce alegra è innucente cum’è una pasturella... Chì cuntrastu ! Subisserà tutt’i cori !

TUTTUCCIA. - Eppoi ?

SERENA . - Eppoi, eppoi, quandu signora l’averà in manu, tuccherà à Signuria à cunservà li...

TUTTUCCIA. - Ùn ci tengu : mi basta d’ese ludata...

SERENA . - Chì ludata ! ammirata, incensata, adurata...

TUTTUCCIA. - È cosa farà Camillu ?

SERENA . - Durmerà, à u solitu.

TUTTUCCIA. - È sè mai si sveglia ?

SERENA . - Serà per dorme dopu cun più cunvizzione.

(Entre Camillu.)

TUTTUCCIA (pianu, à Serena). - Tè, eccu lu chì torna,... senz’e buttiglie !

SCENA XII

E precedente , è CAMILLU

CAMILLU (grave). - Madama !

TUTTUCCIA (ridendu). - Mussiù ! Sì bellu sulenne !

CAMILLU . - Perchè sulenne hè u mumentu !

TUTTUCCIA. - Mi spieghi prima perchè torni senza e buttiglie ?

CAMILLU (imbarrazzatu). - Perchè sta sera ùn ai bisognu !...

TUTTUCCIA. - È u ballu ?

CAMILLU (decisu). - Ùn ci si và !

TUTTUCCIA . - Ùn ti cridia cusì scurdaghjolu... Sè, pocu fà, mi prumettisti...

CAMILLU (vivamente). - Hè differente... Ma dopu, ci n’andemu in campagna...

TUTTUCCIA. - À more di noia, n’hè ?

CAMILLU (torbidu). - Megliu chè crepà di rabia !

TUTTUCCIA (accarizzendu lu). - Ùn ti santavuglià, caru ! Prima, andemu à u ballu... Eppoi... videremu !

CAMILLU (andendu si ne, barbuttuloni). - Sì, videremu...

SERENA (pianu à Tuttuccia, andendu si ne). - Videmu ghjà.

(S’alluntananu, è si cambia a scena).

SCENA XIII

(Una festa da ballu : musica, signore è signori in tuletta, è mascare, chì ballanu, è spasseghjanu, chjachjarendu).

TUTTUCCIA (in bracetta à una mascara) è CAMILLU (à pusà in un cantu chì l’osserva).

TUTTUCCIA (à a mascara). - Alò, chì principia u valzu !

MASCARA. - Chjachjaremu ci la anc’u rusciu.

TUTTUCCIA (trascinendu lu). - Hè megliu valzà.

(S’alluntananu).

CAMILLU (pianu). - Cosa si diceranu ?

UNA MASCARA (à un’altra, mustrendu Tuttuccia). - Guarda issa spiritata cume strascina u so cavallieru !

L’ALTRA (ridendu). - Sai bè ch’hè u nostru destinu : e donne ci portanu sempre...

1a MASCARA. - À u precipiziu... Ma qual’hè ?

2a MASCARA. - Ùn la cunnosci ?

1a MASCARA. - Nò !

2a MASCARA. - Hè a moglie di Camillu...

1a MASCARA. - Megliu à ellu chè à mè... È duv’hè u maritu ?

2a MASCARA. - Culà in issu catagnone, chì dorme !

CAMILLU (pianu). - Mi mostranu à ditu !

1a MASCARA (ridendu). - Hè per ciò chè a so moglie hè cusì sveglia !

CAMILLU (pianu). - È si ne ridenu !

2a MASCARA. - Hè civetta, sai. Ma ùn face male.

1a MASCARA. - Ne rispondi tù ?

2a MASCARA. - Metteria a mio manu à u focu !

1a MASCARA (ridendu). - È ti brusgeresti...

2a MASCARA. - E civette ùn s’abandonanu, perchè ùn anu passione...

1a MASCARA. - Chè per sè... Ma fruga è fruga, finiscenu per punghje si anch’elle.

2a MASCARA. - Nò, nò ! Quelle chì si punghjenu, è spessu senz’avvede si ne, sò e donne appassiunate o innucente...

1a MASCARA. - Sia cume sia, ùn vulerebbe avè stu mobile in casa...

2a MASCARA. - Manch’eo : sè ùn si rompe, trinneca tantu chì ti ne dà sempre a paura.

(S’alluntananu e duie mascare).

UN’ALTRA MASCARA (avvicinendu si à Camillu). - À cosa pensi, o Camì ? À a morte di Capaccione ? Fà cum’è a to moglie chì si diverte. Ùn la vedi in braccetta à issu giuvanottu, u so cucinu carnale forse, perchè si stringhjenu assai ?

CAMILLU (stizzosu). - Lascia mi in pace !

MASCARA. - Voli valzà cun mè ?

CAMILLU(seccu). - Nò !

MASCARA. - Sì pocu amabile... Avà capiscu ch’a to moglie ti lasci in un cantu, è si cerchi altrò qualchì cumpensu !

CAMILLU (andendu si ne cun rabia). - Voli finì la, sì o nò ?

MASCARA (ridendu). - Sì ghjelosu : ci hè di chè !

CAMILLU. - Ùn poi esse ch’una vechja strigaccia !

MASCARA. - T’inganni, sò ancu più giovana ch’a to moglie !

CAMILLU. - Ti cunnoscu avà... Ah ! tù ùn ti cuntenti di fà per burlà cum’ed ella !

MASCARA. - Per quale mi pigli ?

CAMILLU. - Sì Memetta ! (Mumentu di silenziu). È ai u curagiu di criticà l’altre ! Guarda a to casa, o mullizzò !

MASCARA. - È tù a toia, chì serva è patrona ne facenu un burdellu !

(S’alluntana a mascara).

CAMILLU (pianu). - Vipera maladetta ! Ringrazia, chì ci hè ghjente !

UN’ALTRA MASCARA (avvicinendu si à Camillu). - Cos’ai chì sì cusì alteratu ? Imita a to mugliuccia chì si la gode cù u sgiò Carlu, sciurbendu si cumplimenti, pastizzi è bichjerini...

(S’alluntana ridendu).

CAMILLU (pianu). - Ùn possu più tene : stò per crepà. Hè megliu d’andà si ne...

(S’alluntana).

(Torna Tuttuccia c’u so cavallieru).

CAVALLIERU (cun passione). - Madamicella !

TUTTUCCIA (fredda). - Vi scurdate ch’aghju un maritu... è giovanu...

CAVALLIERU. - Per mio disgrazia !

TUTTUCCIA (stizzosa). - Mi stringhjite troppu : mi guastate a roba...

CAVALLIERU. - U guastu d’un vestitu si ripara facilmente... (Mustrendu u so core) Ma u male chì m’ete fattu quì hè irreparabile !

TUTTUCCIA (surridendu). - À quante l’ete detta ?

CAVALLIERU (cun focu). - À voi sola !

(S’alluntananu).

UNA MASCARA (à Camillu chì torna, è guarda Tuttuccia). - Tè sta farfalluccia, cume vola ! Corri li daretu, ch’ùn ti scappi ! (S’alluntana ridendu).

CAMILLU (suspirendu). - È devu ingolle mi tante pillule amare !

(S’avvicinanu Tuttuccia è u so cavallieru).

CAVALLIERU (pianu à Tuttuccia). - Ete u core più duru d’una teppa !

TUTTUCCIA (pianu à u cavallieru). - U mio maritu ci osserva !

CAVALLIERU (cun disprezzu). - Quell’anticaglia !

TUTTUCCIA. - Hè più giovanu è più amabile ch’è voi...

CAVALLIERU. - Ci sò chì nascenu vechji !

TUTTUCCIA (à Camillu). - Rientremu ; sò stanca !

CAVALLIERU. - Hè appena principiatu u ballu !

TUTTUCCIA. - Mi sentu male !

CAVALLIERU. - Mi dispiace ; cun voi, u ballu perde a so regina...

TUTTUCCIA (mettendu si à u bracciu d’u maritu). - Andemu !

CAMILLU (pianu). - Chì ipocrita !

CAVALLIERU. - Addio ! (S’alluntana).

CAMILLU (à Tuttuccia). - È avà partimu in campagna !

TUTTUCCIA (suspirendu). - À sutterrà ci vivi !

CAMILLU. - Tenni a mio prumessa ; manteni a toia !

UNA MASCARA (à Camillu). - Vi disputate in publicu ?

TUTTUCCIA. - Quì si ragiona.

MASCARA (ridendu). - Sè questi sò i vostri ragiunamenti, cosa saranu e dispute ? (S’alluntana).

CAMILLU (trascinendu a moglie). - Andemu ! Andemu ! Ùn ne possu più !

(Scende u tendone).

ATTU III

(In campagna : un giardinu cun casetta in fondu frà l’arburi).

SCENA I

CECCA , MIANNA è CIRIOLA , vestite da festa.

CECCA (stizzosa). - Ùn hè anc’alzata a signora !

MIANNA. - Ed hè quasi meziornu !

CIRIOLA. - È si lagna d’ùn avè appitittu !

MIANNA. - È d’ùn pudè digerì !

CECCA. - Sè manghja per quattru !

CIRIOLA. - Fraza più ella di bombò ch’è noi di pane...

MIANNA. - Ah, ste signuracce s’ingrassanu d’u nostru sudore !

CECCA. - È ci disprezzanu tantu !

CIRIOLA. - Li lu rendimu.

CECCA. - Elle sì, chì sò degne di sprezzu !

MIANNA. - Quasi tutte mal custumate !

CECCA. - Tutte ?

CIRIOLA. - Questa più di l’altre !

CECCA. - Una civittaccia...

MIANNA. - Peghju : s’è duvissi dì certe cose !

CIRIOLA. - Ai vistu ancu tù ?

MIANNA. - È toccu...

CECCA. - Cosa ?

MIANNA. - Hè un scandalu !

CIRIOLA. - Ed hè cusì fiera !

MIANNA. - Fiera ? Si la face c’un capraiu !

CECCA. - Ùn si cuntenta di rubà ci e sustanze, ci ruba anch’i nostr’omi !

CIRIOLA. - È a serva s’hè messa c’u buiatteru !

MIANNA (ridendu). - Si capisce : hè una vacca !

CIRIOLA. - Belli esempii chì ci portanu da e cità !

MIANNA. - È ci tocca à stà zitte !

CECCA. - È à fà li ancu rigali !

CIRIOLA. - Si sà : sò patroni ...

MIANNA. - È meritanu d’esse schjavi !

CECCA (à Mianna). - Cosa l’ai purtati ?...

(Silenziu).

MIANNA (à Cecca). - È tù ?... (Silenziu) ; (à Ciriola) è tù ?... (silenziu). Ùn hè micca un segretu ? Si viderà prestu.

CIRIOLA. - Allora dì tù !

MIANNA (mustrendu un mazzulettu). - Ci aghju un mazzulu di petrusellu per l’usu di casa...

CIRIOLA (ridendu). - Ùn ti sì ruvinata !

MIANNA. - Hè ancu troppu per elli. Saria statu megliu à vende si lu à u mercatu, è cumprà si ne tantu filu... È tù, cos’ai sott’o scuzzale ?

CIRIOLA (suppisendu u so scuzzale). - Una schjaccia c’a cipolla ; ne privai i mo figlioli... È Cecca ùn dice nulla ? Cosa li rigala ?

CECCA (mustrendu un ramu d’alivu). - L’alivu benedettu...

MIANNA. - À iss’ereticoni !

CECCA. - Ùn vanu à a messa, a dumenica ?

CIRIOLA. - Per civiltà cù i paisani...

CECCA. - U maritu po, hè religiosu.

MIANNA. - Hè una pasta...

CIRIOLA (ridendu). - Di maccaroni...

CECCA. - Una talpa : dorme sempre !

MIANNA. - Pussibile ch’ùn si sia accortu di certe cose ! ...

CECCA. - Eppuru, crepanu l’ochji !

CIRIOLA. - Ahù ! Ùn ci guardanu n’e cità...

MIANNA. - Ùn sò micca cum’è noi chì ci tombemu per un’ochjata !

CIRIOLA. - Mi pare mill’anni chì si ne vaganu !

CECCA. - È à mè ? Sai bè chì sò in parolla c’u buiatteru...

MIANNA . - Da quattr’anni...

CECCA. - Nò : trè anni è mezu à a Candilara !... (Entrenu Tuttuccia è Serena). Eccule ; zitte !

SCENA II

E precedente è TUTTUCCIA è SERENA.

CIRIOLA , CECCA è MIANNA (avanzendu si). - Signuria !

TUTTUCCIA (pianu à Serena). - Parenu l’ultimu ghjornu di Carnavale !

CIRIOLA , CECCA è MIANNA (mustrendu i so rigali). - Signuria !

TUTTUCCIA (di gattiv’umore). - Cosa vulete ?

CIRIOLA , CECCA è MIANNA (mustrendu i so rigali). - Sò venuta...

TUTTUCCIA (impaziente). - Parlate una dopu l’altra, s’è vulete ch’e vi senti !

MIANNA

CIRIOLA } inseme.

CECCA

- Ecc’un mazzulu di petrusellu...

- Ecc’una schjaccia c’a cipolla...

- Eccu l’alivu benedettu...

TUTTUCCIA (cun stizza). - Micca tutte à tempu... (à Mianna). Voi prima, chì mi parite a più vechja...

MIANNA (scandalizata). - Vechja ! sè ùn aghju trent’anni !

CECCA (pianu à Tuttuccia). - È quelli d’u veculu !

TUTTUCCIA (à Cecca). - Voi allora !

CECCA (facendu un garbu). - Eo puderia esse quasi a so figliola !

MIANNA (cun rabia). - Sì, s’e figliole nascissinu prima ch’e mamme !

TUTTUCCIA (à Ciriola). - Voi mi parite ragiunevule... Parlate !

CIRIOLA (prestu prestu). - Raghjone, n’aghju quant’a prima...

MIANNA è CECCA (vivamente). - Anch’eo !

TUTTUCCIA. - Mustrate la allora... Finimu la !

MIANNA

CIRIOLA } inseme.

CECCA

- Ecc’un mazzulu di petrusellu...

- Ecc’una schjaccia c’a cipolla...

- Eccu l’alivu benedettu...

TUTTUCCIA (andendu si ne cun dispettu). - Oh !... sbrugliate vi cun Serena !

(Esce Tuttuccia).

MIANNA (pianu). - Chì orgogliu ! (Andendu si ne). Eo mi portu u mo petrusellu ! (Esce Mianna).

CIRIOLA (pianu). - Chì scrianzata ! (Andendu si ne). Eo mi portu a mo schjaccia ! (Esce Ciriola).

CECCA (pianu). - Chì eretica ! (Andendu si ne). Eo mi portu u mo alivu benedettu ! (Esce Cecca).

SCENA III

SERENA (sola). - Oh, cari i custumi campagnoli ! Pieni di dolce innucenza ! Ma ste donne sò fiori accantu à i so omi, veri tanghi purcini. Eo, per a mio disgrazia, innamurai un buiatteru, chì mi vole esse addossu cun tutti i conti ! Ùn facciu un passu ch’ùn mi lu vega accantu, cun cert’ochji sbrillati chì parenu pistole !... È a mio patrona ùn hà fattu a cunquista d’un capraiu ? Ma questu, almenu, hè più mudestu, è si cuntenta di suspiri, ochjate è sunetti...

(Entre Tuttuccia).

SCENA IV.

TUTTUCCIA è SERENA.

TUTTUCCIA. - Ebbè, si ne sò andate e curnachje ?...

SERENA. - Grachjendu forte...

TUTTUCCIA. - Lascemu le grachjà... Ah, duve simu cascate ?

SERENA. - In porci rossi... Eppuru, frà e machje, ùn ci si stà tantu male !...

TUTTUCCIA. - Sè sò un bughjone !

SERENA (ridendu). - Ci si sente, a notte, cantà grilli è sumeri -sò i nostri rusignoli...- è, sprichjata l’alba, hè un coru di zè ! cini, cini ! piuli, piuli ! chì vi dà a voglia di caminà rampiconi !... È chì prufumi !... Altru chè quelli di Bastia !... A mio stanza hè sopra un purcile...

TUTTUCCIA. - È a mea accantu à u pullaghju, chì m’empie di pidochji pullini...

SERENA - È u sgiò Camillu si la gode fumendu...

TUTTUCCIA. - È durmendu !

SERENA. - Ùn lu cridia cusì duru...

TUTTUCCIA. - Acqua cheta...

SERENA - Allora, c’emu da dichjarà vinte ? Ùn si pò vive eternamente quì !

TUTTUCCIA. - Ind’una stalla, duve s’interessanu solu à e vache è à i sumeri !

SERENA. - Nò, ancu à i pomi di terra... Eppuru, ci hè qualcunu chì s’interessa à signuria...

TUTTUCCIA. - Quale ?

SERENA. - U capraiu chì a guarda...

TUTTUCCIA. - Cum’è l’asini guardanu u celu... Ma hè megliu qualcosa chè nulla... Ancu tù ai fattu una cunquista...

SERENA. - À mez’à ste fere di campagnole, passu per una bellezza...

TUTTUCCIA. - Sì più furtunata di mè, chì ti tuccò un buiatteru !

SERENA. - Trà u cancaru è a rabia si ne danu... È signuria sà cosa m’offerse in rigalu, u mio galante ?

TUTTUCCIA. - Qualchì mazzulu di fiori ?

SERENA. - Ahù ! Questi sò boni p’e cità : i campagnoli ùn li stimanu un figu...

TUTTUCCIA. - Cosa allora ?

SERENA. - Un pugnu di castagne secche !

TUTTUCCIA. - È u meo, un sunettu !

SERENA (ridendu). - Megliu ancu e castagne, chì sò roba da manghjà !

TUTTUCCIA. - L’intenzione hè tuttu : credenu fà ci piacè... Ma cosa ne dici ? S’è tù ti maritassi ?

SERENA. - C’u buiatteru ?...

TUTTUCCIA. - È perchè nò ?

SERENA. - S’è pare un toru, è sisa di stazzu !

TUTTUCCIA. - U puliscerai !

SERENA. - Ci vuleria tutta l’acqua di Bivincu, è forse ùn basterebbi... Ma cos’hè ? Signuria pensa à rinvià mi ?

TUTTUCCIA. - Mi sì troppu necessaria, soprattuttu avà ; sè e mo tulette ùn le facciu vede à tè, chì poi dà mi ne un parere, à quale devu mustrà le ? à sti bestioni ?

SERENA. - A dumenica, quandu signuria và à a messa à u paese vicinu...

TUTTUCCIA. - Frà isse linguacce chì vivenu d’i frusteri, è passanu u so tempu à tazzà li !... (S’avvicina u buiatteru). Ecc’appuntu u to galante chì s’avvicina : cum’hè bruttu...

SCENA V.

E precedente è U BUIATTERU.

BUIATTERU (salutendu goffamente). - Signuria !

SERENA (pianu, à Tuttuccia). - Chì faccia scumunicata!

TUTTUCCIA (pianu, à Serena). - Mi mette paura... (forte, à u buiatteru). Amicu, cosa circate ?

BUIATTERU (mustrendu Serena). - À ella...

SERENA (à u buiatteru). -S’è mi circaste menu, mi truvereste forse più spessu...

BUIATTERU. - Sempre sgarbata !... Eppuru eo vi vogliu bè di l’anima...

SERENA (pianu à Tuttuccia). - Dannata !

BUIATTERU. - È vi sacrificaria Capilargu è Bucchisgiò, u mio guagnapane !...

SERENA (pianu à Tuttuccia). - I so boi !

BUIATTERU. - Però, dopu finitu u lavoru...

SERENA. - Pudereste cambià idea tandu.

BUIATTERU. - Mai ! È intantu vi rigalu una zucca...

TUTTUCCIA è SERENA. - Una zucca !

BUIATTERU. - Sì, una zucca muscatella, chè, fritta in agliolu, leva un omu d’a forca !

TUTTUCCIA (à u buiatteru). - Eo ùn vecu zucche... (pianu à Serena)... salvu a soia !

SERENA (pianu à Tuttuccia). - Sciapita : un zuccone !

BUIATTERU (mustrendu un cispugliu). - Hè culà daretu...

TUTTUCCIA (suridendu). - Vediamo la ! (S’alluntana u buiatteru). Altru chè u mio sunettu ! À tè, portanu zucche...

SERENA. - Credenu chì ne manchi ?

TUTTUCCIA. - Farebbenu megliu à cunservà a soia...

SERENA. - S’è l’avissinu...

TUTTUCCIA. - Più o menu piena, l’emu tutti...

(Torna u buiatteru c’a so zucca).

SERENA (mustrendu la). - Aciderba ! Hè un cargamentu !...

BUIATTERU. - Trenta libre genuvese !

SERENA. - Cosa vulete chì ne faccia ? Ci n’hè per una squatra di Lucchesi... S’è m’aviste purtatu un milone o una patecca...

BUIATTERU. - Ùn hè più tempu !

SERENA. - O qualchì fruttu d’a stagione...

BUIATTERU. - Ùn vi dedi eri e castagne ?

SERENA (ridendu). - Ne privaste e vostre fere...

BUIATTERU. - Avà chì cumencia à cresce a machja, ùn anu più bisognu di pruvenda...

SERENA. - È allora a date à mè ?

BUIATTERU. - Perchè vi tengu cara : è c’u permessu quì d’a patrona, v’offru a mio manu...

SERENA (pianu à Tuttuccia). - Hè troppu sporca !

TUTTUCCIA (à u buiatteru). - À quandu e nozze ?

BUIATTERU. - Per sti trè anni ùn possu, ch’aghju da ingrandà a mio stalla ; m’hè natu un vitellucciu, ch’e vogliu cunservà pè a razza, perch’hè bellu...

SERENA (ridendu). - Eppoi vi nascerà un mulettu, è bisognerà torna à ingrandà la ; ed eo mi ne steraghju c’u mio suchju !

BUIATTERU. - Trè anni passanu prestu... U mio cucinu Tattone fece ott’anni l’amore cun Magnifica ; è quandu si spusonu, avianu ghjà una meza duzina di figlioli !...

SERENA. - Obligata ! a mio intenzione ùn hè di marità mi ... à paesi !

BUIATTERU. - Allora ricusate a mio zucca ?

SERENA. - Andate vi ne puru cun ella, in santa pace ; eo vi dò a mio benedizione...

BUIATTERU (andendu si ne c’a zucca sott’à u bracciu). - Vi ne penterete !

(Esce u buiatteru cun rabia).

SCENA VI.

TUTTUCCIA è SERENA.

TUTTUCCIA. - Ai mancatu a to furtuna : cun issa zucca, c’era da campà un misachjolu.

SERENA. - È dopu ?

TUTTUCCIA. - Ti restavanu e castagne secche...

SERENA. - È u buiatteru... Ed à ella, ùn li purtò nulla u capraiu ?

TUTTUCCIA. - Ùn ti la dissi ? Un sunettu, duve mi cumpara à u sole, à a luna, à e stelle ed ancu à a so sciocca Russetta...

SERENA. - A cunnoscu ; hè quella capra braganata, cù i petti pendiconi, una balia...

TUTTUCCIA. - Chì orrore ! Avissi almenu dettu un agnellu, un caprettu, un vitellu, chì sò graziosi !... Ma una capra !

SERENA. - È allora, u sgiò Camillu hè beccu ?

TUTTUCCIA. - Stà zitta, ch’ùn sò cose da dissi !

SERENA. - Signuria senti una cosa : sè u so maritu pigliassi ombra d’u capraiu, sarebbe forse a nostra salvazione.

TUTTUCCIA. - Cumu ?

SERENA. - Hè facile à capì si ; diventendu ghjelosu, si ne scapperebbe prestu in Bastia !

TUTTUCCIA. - Ùn dici male... È per cumincià a cumedia, li lasciu stu sunettu sopr’à u so scagnu... (Mette u scrittu nant’à u tavulinu).

SERENA. - Eccu lu appuntu !

(Entre Camillu).

SCENA VII

E precedente è CAMILLU.

CAMILLU. - Mi dite perchè u buiatteru esce di quì infuriatu ?

SERENA. - L’averà puntu qualchì vespa...

CAMILLU. - Aghju paura chì a vespa ùn sia tù !

TUTTUCCIA. - Serena ùn hà vulutu d’a so zucca...

SERENA. - N’aghju abbastanza d’a mea !

CAMILLU. - Micca troppu !

SERENA. - Chì si cuntenta gode.

CAMILLU (à Serena). - È perchè ti la vulia rigalà ?

TUTTUCCIA. - Per marità si cun ella !

CAMILLU (à Serena). - Ùn faresti male à piglià ti lu ; hè un bon lavuratore !

TUTTUCCIA. - Cusì li dissi eo...

CAMILLU. - Guadagna i so trè franchi à u ghjornu, senza l’incerti.

SERENA. - Sì, u ruspime...

CAMILLU. - Cum’è tutt’i campagnoli... Cun ellu saresti sigura di manghjà...

SERENA. - Pisticcine, cundite di qualchì scrugnottu...Cos’hè ? Sgiò mi piglia pè una vacca, chì mi prupone un buiatteru ?

CAMILLU (pianu). - O vacca o capra, ùn la sò...

SERENA. - Ellu sì, chì pare un toru, cù i so ochji spaviti è u so musu bavacciulosu !

CAMILLU. - Senti ; ùn circà à indispettì mi i travagliadori !

SERENA. - Qual’hè ch’u cerca ? Possu impedì lu d’innamurà si ?

CAMILLU. - Ùn si saria cusì avanzatu senza qualchì speranza...

SERENA. - Speranza ! S’è l’accolsi cum’è un cane in chjesa ! Sgiò dumandi à a Signora... Ma sti campagnoli piglianu un salutu innucente pè una dichjarazione ! Un ghjornu, à l’imbruscata, l’incontru daretu à una sepa, è li dicu : « Bona sera !», perchè quella faccia negra negra cù i so ochji accesi mi dava sughjezzione, è da issu mumentu mi perseguita... Hè cum’è a Signora Tuttuccia ; quandu passa frà i lanciafammi, ti la manghjanu cù l’ochji... Si vede chì patenu i dighjuni...

CAMILLU. - Chì fiume di parolle sceme !

SERENA. - Sceme ? Sgiò dumandi à a Signora, ch’ùn pò fà mi bugiarda : à mè portanu zucche, à ella sunetti !

CAMILLU. - Cosa canti ?

SERENA. - Ùn sò eo chì cantu, ma u so capraiu... Sgiò sà quellu sgrunchjeghju, chì face sempre garbi è ochjate parlendu, è si ficca e dite ind’u nasu eppoi in bocca ?

CAMILLU. - Ebbè

SERENA. - S’innamurò d’a Signora...

CAMILLU (à Tuttuccia). - È tù, ùn dici nulla ?

TUTTUCCIA. - Eo , ... Mi ne ridu !

CAMILLU. - Dunque hè vera ?

TUTTUCCIA. - Ùn ti ne sì accortu ?

CAMILLU. - È accetti versi da i giuvanotti ?

TUTTUCCIA. - Speru ch’ùn sarai ghjelosu di issu muccicone ?

CAMILLU(pianu). - A mio gattiva stella mi perseguita pur quì. (Forte à Serena). Li dicerai ch’ùn si prisenti più in casa !

TUTTUCCIA. - È quale ci purterà u latte ?

CAMILLU. - A surella...

SERENA. - Hè ancu più mullizzona !

TUTTUCCIA. - Prestu ci obligarai à ùn parlà più chè cù e fere.

CAMILLU. - Chì ùn sà parlà si ne stia zittu !

(Esce Camillu).

SCENA VIII.

TUTTUCCIA è SERENA.

TUTTUCCIA. - Diventa usprice...

SERENA. - L’influenza d’a machja... Megliu cusì chè indifferente : si parterà più prestu !

TUTTUCCIA. - Ma chì bisognu c’era di parlà li subitu d’u capraiu ? Ùn poi tene a to lingua ?

SERENA. - Ùn lu duvemu inghjelusì ?

TUTTUCCIA. - Sì, ma c’era tempu !

SERENA. - Ogn’à piglià u ghjenuvese caldu. Dopu, si puderia appacià, è fà si ne anc’una risa...

TUTTUCCIA. - È intantu, eo restu senza aduratori !

SERENA. - Ùn l’hè antipaticu u capraiu ?

TUTTUCCIA. - Sì, perch’hè mullizzosu... Ma, à a fine d’i conti, hè qualch’unu chì mi dice c’u so amore : « Site bella ! ». È avà turnemu nè a sulitudine, per mè più insuppurtevule ch’a morte !

SERENA. - È ùn lu conta per nunda u so maritu ?

TUTTUCCIA. - Dipoi ch’ell’hè in campagna, diventò cusì freddu, prusaicu, nuiosu !... Ùn dice mai una parolla, o sè parla, hè per occupà si d’u suvu è di altre purcherie...

SERENA. - Prima, signuria si lagnava d’a so assiduità.

TUTTUCCIA. - Sì, perchè mi stava sempre à e zanche, ùn dendu mi manc’u tempu di pruvà mi un cappellu o un vestitu... Ma avà hè troppu... Sò diventata cum’è un stuvigliu di casa, chì si guarda solu di quandu in quandu pè spulverà lu.

SERENA. - È ci spulverò pocu fà cum’è si deve ! Signuria pò esse cuntenta...

TUTTUCCIA. - È poi ricascherà ne a so indifferenza...

SERENA. - Li metteranu a puce à l’arechja i nostri galanti. D’a parte mea, c’un pò di tira è molla, m’incargu di scimì u buiatteru, simu prestu à cavallu : nascerà qualchì sciarattu, è u sgiò Camillu si ne scapperà cun noi, in Bastia...

TUTTUCCIA. - È sè turnassi à pensà a separazione ?

SERENA. - Gnor’ nò : Hè un mullaccone !

TUTTUCCIA. - È s’ellu fussi, cum’è pretende babbà, una molla, chì dorme, slentata, è, tesa, schjatta è stroppia e persone ?... Ti scordi chì, per vuluntà soia, ci truvemu quì cunfinate...

SERENA. - Soia ? O di u sgiò Petru chì ci l’hà spintu...

TUTTUCCIA. - Sarà cusì... È intantu, cosa femu ?

SERENA. - U capraiu li dumanda u permessu di fà li un serinatu : signuria li l’accordi pè sta sera.

TUTTUCCIA. - Eppoi ?

SERENA. - Qualcosa nascerà : u sgiò Camillu anderà forse n’e furie...

TUTTUCCIA. - Rumpendu u strumentu à u sunatore, è noi resteremu più sole chè mai...

(S’avvicina u capraiu).

SERENA (pianu à Tuttuccia). - Ecc’u capraiu, chì vene à sente a risposta !

TUTTUCCIA (pianu à Serena). - Chì musu di beccu !

SERENA (pianu à Tuttuccia). - Ci casca cum’è u furmagliu sopra i maccaroni. Li dicu di sì ?

TUTTUCCIA (pianu à Serena). - Fà cosa ti pare !

SCENA IX.

E precedente è U CAPRAIU .

TUTTUCCIA (graziosa). - Avvicinate vi, giuvanottu ! Cosa ci purtate di bonu ?

CAPRAIU. - Un pò di latte muntu nanz’ora.

SERENA. - Puru, n’hè ?

CAPRAIU. - Site in paese cristianu.

SERENA (ridendu). - Hè per questa ch’u latte si batteza ! Sè fuste Turcu...

CAPRAIU (ridendu sguaiatamente). - U diventeria pè a Signora.

SERENA. - Site ancu spiritosu !

TUTTUCCIA (à Serena). - Sai bè ch’hè pueta...

SERENA. - Ùn hè una ragione... (Pianu à u capraiu) Ci purterete u vostru serinatu sta sera...

CAPRAIU (pianu à Serena). - A signora acunsente ?

SERENA (pianu à u capraiu). -Sì !

TUTTUCCIA (à u capraiu). - Avete inseme di gran secreti ? Vi maritereste cun ella ?

CAPRAIU. - Eo, mancu per sognu !

TUTTUCCIA (pianu). - Chì scrianzatu !

CAPRAIU. - A mio mira hè più insù...

SERENA. - Ind’i nuli, forse ?

CAPRAIU. - Più insù !

TUTTUCCIA. - Induve ?

CAPRAIU (guardendu Tuttuccia). - Nè u sole !

TUTTUCCIA. - Ah, sì ! Mi scurdava chì mi la diciste ind’o sunettu... Francamente, l’ete cumpostu voi ?

CAPRAIU (c’un ditu ind’u nasu). - Eo u dittai, è mi lu misse in penna u sgiò istitutore...

TUTTUCCIA. - Dunque ùn sapete scrive ?

CAPRAIU (c’un ditu in bocca). - Facciu u mio nome.

TUTTUCCIA (pianu). - Corne ! (à u capraiu). È cunfidate i vostri segreti à furesteri !

CAPRAIU. - Ùn numinai nisunu...

TUTTUCCIA. - Quì ùn hè difficile induvinà la !

CAPRAIU. - Eppoi, eppoi, ùn pò palisà mi u sgiò istitutore : ne cunnoscu tante d’e soie !

SERENA (tucchendu li a manu). - Bravu ! Voi sì chì site un omu accortu !

(Sbocca, da un cispugliu, u buiatteru).

SCENA X

I precedenti è U BUIATTERU.

BUIATTERU (à u Capraiu). - Cosa cerchi quì ?

CAPRAIU (timidu). - Eo vò pè i mio fatti.

BUIATTERU. - S’è tù ardisci tuccà mi à Serena, podi esse siguru di more senza cunfessione !

TUTTUCCIA (à Serena). - O Madonna ! andemu ci ne, chì si tombanu !

BUIATTERU. - Ùn abbiate paura ; ùn hè quì chì si regulanu i conti !

SERENA (pianu). - A sapemu, ind’a machja. (Forte, à u buiatteru). - Ùn saraghju mancu libara di parlà cun quale mi piace ? Chì dirittu avete sopra di mè ?

BUIATTERU. - O dirittu o stortu, l’intendu cusì ; ùn vogliu chì mi dia a gambata un muccicone !

CAPRAIU. - Qual’hè chì ci pensa ?

BUIATTERU. - Ne vidi abastanza !

CAPRAIU. - Ete mal vistu !

SERENA (à u buiatteru). - Ete bisognu di spechjetti...

BUIATTERU (à Serena). - È voi, chì vi si pulisca e lucerne !

TUTTUCCIA (à u buiatteru). - È s’eo vi dicissi chì v’ingannate ?

BUIATTERU (seccu). - Credu à mè più ch’à l’altri !

SERENA (à Tuttuccia). - Hè galante !

BUIATTERU. - Pocu m’importa d’e vostre falsità citadine...

SERENA. - Ma vi scurdate chì site in casa d’a Signora !

BUIATTERU. - Sti campi sò mei, ch’i lavoru da dece anni...

SERENA. - Micca di vada, n’hè ?

BUIATTERU. - Chì tanti discorsi ! O rinunzia à voi, o u tombu !

(Entre Camillu).

SCENA XI

I precedenti è CAMILLU.

CAMILLU. - Cos’hè stu rumore ?

BUIATTERU (fora di sè). - Sta casa hè un burdellu, è ci face da mezana a patrona !

CAMILLU. - Parlate megliu !

BUIATTERU. - Hè cusì ; è ch’ùn hè cuntentu cambii !

CAMILLU. - Ma cos’hè statu ?

BUIATTERU. - Quì Serena, in presenza d’a vostra moglie, si abbraccia c’u capraiu !

SERENA. - Micca vera ; l’aghju solu tocc’a manu !

CAMILLU (à u capraiu). - È tù, cosa dici ?

CAPRAIU. - Eo dicu chì pensu tantu à Serena quant’à lampà mi in mare !

SERENA (pianu). - Oh, bruttu caprone !

CAMILLU (à u buiatteru). - Insomma, ùn vidiste altru ?

BUIATTERU. - Ùn vi pare abastanza ? Sè si cumprumettenu cusì publicamente, cosa sarà à quattr’ochji...

CAMILLU. - Eo ùn possu tene a serva...

BUIATTERU. - N’ete abastanza d’a patrona ! Di l’altri mi ne incargu eo !

CAMILLU (alteratu). - Mi farete scappà a pacienza !

BUIATTERU. - Eppoi ? Sò omu à difende mi !

CAMILLU (à u buiatteru). - In avvenire, i mio lochi i guarderete c’u cannuchjale.

BUIATTERU. - Chì disgrazia ! Cridete chì mi mancherà pane ? Ùn ci sò chè i mio boi ind’a ghjura ; ogn’à cascà ci.

CAPRAIU (à Camillu). - Sgiò mi ne compri una coppia, è m’incargu eo d’u lavoru, chì ne sò praticu...

BUIATTERU. - Tù, stà cù e to capre ; t’inibiscu di tuccà boi !

CAMILLU. - Ùn mi cunvenite nè l’unu nè l’altru... (à u buiatteru). Voi pè a vostra insulenza ! (à u capraiu). È tù, p’a to pretensione... Andate !

(S’alluntananu u capraiu è u buiatteru).

SCENA XII.

CAMILLU , TUTTUCCIA è SERENA .

CAMILLU (à tutt’e duie). - È voi, pettecule civette, rientrate in casa, è prestu !

(S’alluntananu Tuttuccia è Serena).

SCENA XIII.

CAMILLU (solu, indinuchjendu si). - Signore ! Tù mi la desti, è tù mi la piglia, o cuncedi mi almenu a forza di suppurtà la !

(Scende u tendone).

ATTU IV.

(Hè notte ; si vedenu, à chjaru di luna, arburi frunduti c’una casette in fondu).

SCENA I.

CAPRAIU (solu, avanzendu si timidamente c’una cetara in manu) :

Ùn ci hè nisunu... Serena mi disse di vene sta sera, ch’a patrona gradisce e mio canzone ! O amore, ispira mi tù ! ... Pare fatt’apposta ; sò arrighitu, è più arrighita hè a mio cetara, ch’ùn si pò mette in tonu...

(Face un preludiu pianu pianu, è si vede un’ombra frà l’arburi, chì passa).

Mi pare di vede culà qualchidunu... Chì sia u buiatteru ? Nò, à st’ora, deve dorme inzucchitu, chì travagliò tutt’u ghjornu... È s’è fussi u sgiò Camillu ?... Eppoi ? hè questa una piazza publica, è ùn pò impedì mi... D’altronde, hè un omu pacificu ch’ùn sà mancu carcà u fucile... Nò, nò ! a mio paura ùn hè d’ellu, ma d’issu cancaru di buiatteru, escitu appena di prigiò per avè ne scucculatu unu, è chì face di tuttu per turnà ci... Si vede chì ci stava bè !

(Ripassa l’ombra).

Ùn m’ingannai : ci hè qualchidunu ! Sarà megliu andà si ne... È passeraghju pè un vigliaccu, chì prumissi u serinatu. Ghjà, nè a disputa c’u buiatteru, ùn ci feci bona figura, è m’avvidì chè a Signora si ne ridia sottu sottu... E donne perdonanu tuttu fora ch’a vigliaccaghjine... Insomma, cosa decidu ? Si canta sì o nò ?... Ùn vecu ne sentu più nulla... Sarà statu un passaghjeru, o a paura m’averà fattu travede... Canteremu pianu !

(Ripiglia u so preludiu).

Cetara maladetta ! Ùn mi riescerà di mette ti in tonu ?

(S’avvicina un passaghjeru).

Eccu ghjente ! Stò frescu !

PASSAGHJERU. - O amicu, cosa fate pè sti chjassi ?

CAPRAIU (cuntentu, pianu). - Ùn hè u buiatteru... Curagiu !

PASSAGHJERU (mustrendu a cetara). - Hè per vende a frissoghja ?

CAPRAIU (pianu). - Chì scrianzatu !

PASSAGHJERU. - Hà bisognu d’esse ristagnata.

CAPRAIU. - Andate pè i vostri affari...

PASSAGHJERU. -I campagnoli travaglianu u ghjornu, è ùn sò stundaghji cum’è voi !

CAPRAIU. - Chì male li facciu ?

PASSAGHJERU. - L’impedite di dorme c’u vostru vanghigliacciu !

CAPRAIU (pianu). - Dev’esse qualchì ghjelosu...

PASSAGHJERU. - È prima d’andà mi ne, ch’eo vi dia un cunsigliu : guardate vi da u serenu è ... da e panculate ! ...

CAPRAIU. - Si n’hè andatu infine ! Principiemu...

(Canta à meza voce, accumpagnendu si c’a cetara).

Tanti è tanti anu cantatu S’è i chjamassi ochji di sole
L’ochji neri è li turchini , Luce ognunu i viderai,
È manc’unu s’hè truvatu À ste simplice parolle
Chì cantassi i castagnini, D’un splendor di puesia,
Cusì belli, cusì umani Cum’è l’alba mattutina
È n’e bestie è n’i cristiani ! Quandu spunta d’a marina.
Credu chì li faccia tortu L’ochju neru hè un finestrinu
U so suspettu campagnolu ; Di l’infernu ; ochju di gattu
Perchè l’omu hè cusì stortu Cioè perfidu lu turchinu ;
Da guidà si à un nome solu, Ma u castagnu pare fattu
À un insegna, à una ticchetta, D’oru, sole, mele è manna...
È à a sustanza... una saetta ! À u castagnu dunque osanna !

(S’apre impruvisamente una finestra d’a casetta, è ci cumparisce, c’un vasu in manu, u sgiò Camillu, chì dice rivucchendu lu addossu à u capraiu) :

Oh piglia ti stu castagnacciu !

(Si chjode a finestra).

CAPRAIU (asciuvendu si). - Accidenti à l’amore !... Ci n’aghju dapertuttu, è n’hè piena perfine a mio cetara...

(S’avanza u buiatteru).

SCENA II

U CAPRAIU è U BUIATTERU.

BUIATTERU (minacciosu). - Ah, ti ci pescu ! Ùn la nigherai più... Ogna ch’è tù morga d’e mio mane !

CAPRAIU (umile). - Cosa v’imaginate ?

BUIATTERU (c’u stilettu in manu). - À quale faci u serinatu ?... Cunfessa lu prestu, o ti polsu !

CAPRAIU (spaventatu). - à a Signora...

BUIATTERU. - Mi pigli per un gnoccu cum’è tè ? Cosa poi sperà da ella ?

CAPRAIU. - Ùn la sò... Ma ne sò innamuratu...

BUIATTERU. - Ed ella ?

CAPRAIU. - Ùn li sò ingrate e mo canzone...

BUIATTERU. - Dici cusì per stoglie mi d’a mo vendetta.

CAPRAIU. - Hè a verità !

BUIATTERU. - Prova lu...

CAPRAIU. - Ùn ete vistu ch’hè ghjelosu u sgiò Camillu ?

BUIATTERU. - Di tè ?

CAPRAIU. - Di quale ? O di mè o di voi, chì simu i soli omi in ste machje !

BUIATTERU. - Ùn pò esse... S’è tù fussi almenu un bell’omu... Puru, e donne sò cusì capricciose...

CAPRAIU. - U bellu hè per chì piace !

BUIATTERU. - Nò, nò ! A cosa hè troppu strana, è a crideria appena s’è a vidissi !

CAPRAIU. - Sentite : s’eo dicu bugia, mi tumberete ; è ùn vi ne mancheranu l’occasione, ch’eo vivu solu in ste machje...

BUIATTERU. - Ai un mezu di salvà ti !

CAPRAIU (vivamente). - Quale ?

BUIATTERU. - Metti mi in manu Serena !

CAPRAIU. - Cosa vulete fà li ?

BUIATTERU. - Ùn devu dì la à tè... Ti basti sapè ch’ùn averà male !

CAPRAIU. - Serena ùn hè micca una capra da lascià si cunduce... Hà u so capu da per ella !

BUIATTERU. - Sappia mi dì solu quand’esce in campagna !

CAPRAIU. - Cume possu entrà in sti secreti, sè u sgiò Camillu m’hà inibitu a so casa ?

BUIATTERU (saltendu li c’u stilettu a gola). - Allora mori !

CAPRAIU (spaventatu). - Firmate vi ! Si cercherà di cuntentà vi...

BUIATTERU (mustrendu li u stilettu). - Simu intesi, n’hè ?... À vidè ci !

(S’alluntana u buiatteru).

SCENA III

CAPRAIU (solu). - Avà stò frescu : o mortu, o assassinu ! Megliu mortu : ùn possu purtà la à l’ammazzatoghju ! una donna !... un’innucente !... Piuttostu mi ne scappu in Bastia, duve ci sò i giandarmi... Ma culà cume si campa ? ... Tuttu hè caru, è ùn si dà nulla per nulla, manc’un pezzacciu di pisticcina !... Travaglieremu !... À cosa !... Ùn sò fà nulla ! À u caminu di ferru : à purtà petre sò bonu ancu eo... Ma e petre pesanu... S’eo mi lampassi da u Senatore ? Hà vutatu per ellu u mo cucinu... Truverà qualchì piazzuccia per mè... Ci n’hè tante senza fatica, sopra i stradoni, a Merria... Ma u sgiò Merre ùn hè d’u so partitu... Insomma, ci penseremu sta notte : qualchì santu pruvederà... Andemu intantu à pulì ci à u fiume : ùn possu più vede mi cusì... O amore, amore ! Sò questi i to scherzi !

(S’alluntana u capraiu è si cambia a scena).

SCENA IV.

(Cameretta campagnola, cun mubilia semplice, ma di gustu).

U sgiò PETRU è u sgiò CAMILLU.

CAMILLU (cun duie lettare in manu). - Ecc’un par’ di lettare anonime : ùn passa ghjornu ch’e ùn ne ricevi almenu una !...

PETRU. - Hè l’usu d’i paesi...

CAMILLU. -È anc’un pocu d’e cità.

PETRU. - Straccia le senza leghje le ; chì e scrive ùn pò esse chè un bugiardu è un vigliaccu...

CAMILLU. - Oh, l’aghju lette è rilette ! Sò corte, ma velinose...

PETRU. - Ghjetta le ind’u mullizzu, è scorda ti ne.

CAMILLU. - E sò à mente. A prima dice : « Signor Beccu ! Salutate mi u capraiu ».

PETRU. - È a segonda ?

CAMILLU. - Hè un simplice avisu per mè. Leghjite la...

(Li porghje a lettara).

PETRU (leghjendu). - « Guardate vi da u buiatteru ! ». Cosa l’ai fattu ?

CAMILLU. - Eo ? nulla... Tutta opera di Tuttuccia !

PETRU. - Sta povera figliola ! Ùn puderà più move passu o bocca senza delittu !

CAMILLU. - Da qualchì tempu, leghju ancu eo per distrà mi, è imparà un pò di filosofia...

PETRU. - Ùn la truverai indè libri, s’è tù ùn l’ai in core...

CAMILLU. - Ebbè, frà tanti scartafacci, mi ne capitò unu -hè di La Bruyère- cun ste sacrusante parolle : « Ùn ci hè moglie cusì perfetta ch’ùn vi faccia pente, almenu una volta à u ghjornu, d’avè la pigliata ».

PETRU. - Iss’autore ùn ne pudia parlà, perchè ùn avia.

CAMILLU. - Oh, pensate cos’averebbe dettu sè l’avissi avuta !

PETRU. - È credi à e parolle d’i scrittori, nate spessu da un gattivu pranzu, è chè poi elli cunservanu, cum’è i genitori i figlioli, ancu brutti...

CAMILLU. - Credu à l’esperienza di l’altri quand’hè d’accordu c’a mea...

PETRU. - Cioè quand’hè cunforme à i to desiderii. Chì vole disfà si d’u so cane dice ch’hè arrabiatu. Sì stancu di Tuttuccia...

CAMILLU. - Pur’ troppu !

PETRU. - Micca perchè ti mancò in qualcosa...

CAMILLU. - Allora u tortu hè meo ?...

PETRU. - Certamente, cum’è quasi sempre d’i mariti... è d’i genitori.

CAMILLU. - Menu male chì ne pigliate una parte !

PETRU. - Sì : una grossa ; ma eo peccai d’amore per l’altri, è tù d’amore per tè !

CAMILLU. - Dunque ùn vulia bè à Tuttuccia eo ?

PETRU. - Ùn dicu di nò, poichè a preferisti à tant’altre !

CAMILLU. - È allora ?

PETRU. - Ma ci hè una cosa chì preferisci à tuttu...

CAMILLU. - Quale ?

PETRU. - A quiete.

CAMILLU. - Certamente !

PETRU. - Qual’hè ch’a pussede ind’u mondu ? U babbu, sempre paurosu d’i so figlioli ?...

CAMILLU. - Ùn scarruzzemu tantu ! Eo ùn aghju figlioli, ma una moglie chì mi dà più da fà chè una banda di capre...

PETRU. - È tù vuleresti dorme, n’hè ?

CAMILLU. - Perchè nò ? Sò riccu abastanza !...

PETRU. - Allora duvie stà ti ne figliu. U matrimoniu hè una lotta cuntinua, sè ùn s’hà figlioli, c’a moglie chì resta sempre bardascia, è sè si n’hà, cun elli... Lascendu li andà u capricciu, si stroppianu...

CAMILLU. - Ùn mi maritai per diventà balia, nè aguzzinu...

PETRU. - È voli ch’ùn si dica chì sì un egoista ? ... Ringrazia u Signore chì a to moglie hè onesta... (Camillu face un segnu di dubbiu). Sì, perchè sè ciò ùn fussi, ùn sarebbenu mancati l’invidiosi à infurmà ti ne...

CAMILLU. - È u capraiu ?

PETRU. - A crederesti capace di cumprumette si per issu mullizzone ?

CAMILLU. - Nò ! Ma hà a smania d’esse curtegiata : ùn truvendu aduratori frà l’omi, i circarebbe n’e bestie !

PETRU. - È perchè ùn ti risenti cun ella ?

CAMILLU. - Allora sì, chì sarebbenu rugni cuntinui, à spassu, à cena è ancu in lettu !

PETRU. - È per ùn interrompe i to sonni, lasci andà e cose à precipiziu !

CAMILLU. - Finchì possu...

PETRU. - Capiscu : s’ingrossa a soma ogni ghjornu, è quand’ùn si pò più purtà, c’una scuzzulata di spalle si ghjetta in terra !

CAMILLU. - Domine !

PETRU. - Quest’ùn hè prucede da omi !...

CAMILLU. - Oh, cambiate ! Hè a mio natura !

PETRU. - A natura deve vince la a ragione...

CAMILLU. - Hè troppu fatica !

PETRU. - Pè i primi sforzi... Ma dopu, ci si trova sudisfazione...

CAMILLU. - D’altronde hè inutile : s’è cambiu eo, ùn cambierà a vostra figliola !

PETRU. - Oh, quandu li mustrasti i denti, ùn vense à ghjubedomine, seguidendu ti in campagna cum’è una cagnulina ?

CAMILLU. - Arrabiata ! È quì truvò u mezu di mette mi sottu sopra i pacifichi campagnoli !

PETRU. - Pacifichi, i dicenu i libri fatti da ghjente ch’i vedenu c’u cannuchjale... ma, à ch’i cunnosce da vicinu, appariscenu cos’elli sò, impastati di fele è fangu. È rozi poi chì più ùn si pò dì : erpianu più ch’e so fere...

CAMILLU (disperatu). - Insomma, ùn sò più cosa fà : in Bastia ùn ardiscu turnà ci, è quì ùn ci pudemu stà più...

PETRU. - Fate vi un viaghjettu...

CAMILLU. - Perchè li crescan’i grilli, n’hè ?

PETRU. - Anzi, si n’anderanu : e scimizie costanu più care fora chè in casa, è, per ciò, si ne face menu... Eppoi, in paesi furesteri, u spiritu hè sempre seriamente occupatu di cose nove, è ùn s’empie cum’è quì, ogni ghjornu d’e solite sciucchezze, di ventu...

CAMILLU (decisu). -Si tenterà... È sè ùn riesce... pruvederemu !

(Entrenu Tuttuccia è Serena, spaventate).

SCENA V.

I precedenti è TUTTUCCIA è SERENA .

TUTTUCCIA (lascendu si cascà sopr’à una sedia). - Oh, Madonna ! ùn aghju più sangue ind’e vene !

PETRU (abbracciendu la, spaventatu). - Cos’ai, a mio figliola ?

TUTTUCCIA. - Mi manc’a voce...

SERENA. - Parleraghju eo !

PETRU(à Serena). - Dì prestu !

SERENA. - Eramu andate à u buschettu di lecci per gode un pò d’ombra, è ci ripusavamu à a funtana, quandu, à l’impruvisu, esce da un cispugliu u buiatteru armatu, è m’impone di seguità lu... Eo scappu gridendu, è ne face altrettantu a patrona. U buiatteru ci s’atteppa daretu, è stava per aghjustà ci ; ma, per furtuna, si presentanu dui giandarmi è l’arrestanu...

PETRU. - Sia ringraziatu u Signore !

CAMILLU. - Quì ùn ci pudemu più stà !

SERENA (pianu). - Infine !

CAMILLU. - Ci faremu un viaghju, à Roma, per esempiu, à cunfessà i nostri peccati... Ma tenite à mente e mio parolle : hè questa l’ultima prova...

TUTTUCCIA (à Camillu). - Chì colpa ci aghju eo, sè i campagnoli sò bestie ? Ùn sì tù chì m’obligasti à vene à vive frà elli ?

CAMILLU. - È qual’hè chì mi ci spinse ?

TUTTUCCIA. - A vostra natura stramba, salvatica...

PETRU. - Oh, invece di disputà vi inutilmente, cunfessate i vostri torti reciprochi !... Ma nò, ùn cunfessate nulla, chì vi custerebbe troppu ! (à Tuttuccia). tù, sacrifica qualcosa à a quiete d’u to maritu, chè, in fondu, hè quellu chì t’ama u più... dopu u to babbu !

TUTTUCCIA. - Ùn dumandu megliu... Ma...

PETRU (à Camillu). - È tù, sii più tulerante p’e donne, chì sò esseri debuli, incunseguenti...

CAMILLU. - Ùn mi diceste ch’u sò ancu troppu ?

PETRU. - Sì, ma senza criteriu !

CAMILLU. - Cumu ?

PETRU. - Scurdendu ti sempre chì, finch’ùn li nasce famiglia, a moglie vive quasi tutta à l’esternu : ùn si crede furtunata chè quand’u mondu a ghjudica tale...

CAMILLU. - Hè appuntu què chì mi face rabia !

PETRU. - Ùn poi cambià a natura, ma solu prufittà ne...

CAMILLU. - In chì manera ?

PETRU. - Facendu cum’è a to moglie !

CAMILLU. - Mi cunsigliereste d’esse pagliacciu ancu eo ?

PETRU. - Pagliacciu, nò, ma giuvanottu... Per Die, ai pocu più di vint’anni, è t’addurmenti sempre nè i catagnoni ! Piglia ti a to mugliuccia in braccetta ; passeghja la à pedi è in vittura -megliu à pedi- in campagna, in cità, à e feste, abituendu la à ùn staccà mai da i toi i so piaceri...

CAMILLU. - Ùn dumandu megliu chè di esse li cumpagnu... Ma u rumore d’u mondu m’assorda è m’annoia...

PETRU. - Vinci issa prima ripugnanza, è finiscerai per truvà ci gustu ancu tù !

CAMILLU. - Cos’ùn feria per esse tranquillu !

PETRU. - Segui u mio cunsigliu, è turnerai felice...

CAMILLU. - Ma allora ùn ci hè bisognu d’andà in Italia ?

PETRU. - Vai ci sempre ; ci piglierai u gustu d’u motu.

TUTTUCCIA (ridendu). - Ed eo forse quellu d’u riposu !

CAMILLU(decisu). - Ebbè, partimu !

TUTTUCCIA. - È per pruvà ti a mio ferma risoluzione, mi destu di Serena !

SERENA. - Oh, bella ! Cosa c’entru eo ?

TUTTUCCIA. - Mi ricordi tante cose ch’ogn’à scurdà si !

SERENA (cun rabia). - I stracci vanu à l’aria ! Ma cunnoscu qualcunu chì farà e mio vendette...

TUTTUCCIA. - Quale ?

SERENA (insulente). - Voi stessa...

CAMILLU (à Serena). - Zitta, ch’averai u to rigalu !

SERENA (cun dispettu). - U buiatteru, n’hè ?

CAMILLU (purghjendu li un bigliettu). - Nò, sti centu franchi p’accasà ti...

SERENA (alegra, pigliendu u bigliettu). - Oh, questu hè megliu ch’una zucca !... Ma d’i mariti n’ebbi abastanza !... U primu, quand’era briacu, cioè d’a sera à a matina, m’accarizzava à pugni chjosi ; u segondu ùn biia chè acqua -in mancanza d’altru-, ma m’obligava, c’u bastone, à travaglià per ellu ; è u terzu forse mi faria peghju !... Nò, nò !... Tutti l’omi sò birbanti, salvu, però, u sgiò Camillu ch’hà del bonu...

PETRU (ridendu). - Ed eo allora ?

SERENA. - Ancu signuria... Ma u sgiò Camillu hà un puntu di più... Eo u vuleria furtunatu cumu si la merita...

TUTTUCCIA (ridendu). - Grand’effettu d’un pezzu di carta !...

SERENA (ridendu). - Micca straccia !... È cunnoscu tante signore, ch’a preferiscenu à e maghjine d’i santi !...

PETRU. - Chì chjachjarona ! Finisci la !

SERENA. - Sì, a vogliu finì dendu à u sgiò Camillu un cunsigliu...

TUTTUCCIA. - Vale pocu...

SERENA. - Più chè signuria ùn crede !

CAMILLU (à Serena). - Oh, sentimu lu !

SERENA. - Ogn’à cumbatte a civetta cù e so arme... c’a civetteria !

TUTTUCCIA (à Serena). - Strega !

CAMILLU (scandalizatu). - Oh, questu poi !

SERENA. - Gnor sì ; temendu chè u maritu ùn si scappi c’un’altra, femu di tuttu per trattene lu... Ma sè d’ellu una civetta hè sigura, s’abandona liberamente à i so capricci, ch’ogni ghjornu diventanu più scemi...

TUTTUCCIA (sprezzante). - Hè u cunsigliu d’una villana...

SERENA. - Chì si ne intende... Sgiò mi la disse tante volte ancu signuria, ricurrendu à a mio esperienza !...

PETRU. - Oh, finimu a cumedia !

TUTTUCCIA (rabiosa). - Ch’ella ùn si muti in tragedia !

CAMILLU (à Tuttuccia). - Preparemu i baulli !

TUTTUCCIA (à Camillu). - È viderai ch’a faremu bugiarda !

PETRU è CAMILLU (pianu). - Fusse la puru !

SERENA (pianu à Tuttuccia). - A volpe perde u pelu, ma u viziu mai !...

(Scende u tendone).

ATTU V.

(Un vapore in viaghju : marinari è passaghjeri).

SCENA UNICA.

TUTTUCCIA (chì corre da una parte è da l’altra, imbarrazzendu marinari è passaghjeri) è CAMILLU (chì posa in un cantu, guardendu a moglie impenseritu).

CAMILLU (pianu). - Hè più matta chè prima ; da trè ore chì simu partiti, ùn mi restò mai più d’un minutu accantu... S’appiccia à ogni furesteru, puderebbe esse anc’u boia, è per ellu si scorda u maritu... Oramai, a prova hè fatta !

TUTTUCCIA (currendu vers’u maritu). - Cosa dici ?

CAMILLU. - Sò stancu... (pianu) ... è stufu !

TUTTUCCIA. - D’ùn fà nulla, n’hè ?

CAMILLU. - Di vede sempre listesse cose !

TUTTUCCIA. - Movi ti appena cun mè, è ne viderai altre...

CAMILLU (torbidu). - Chì mi piaceranu ancu menu !

TUTTUCCIA (mustrendu u mare). - Mì, cume i marosuli s’imbiancanu ; parenu tante pecurelle ! (currendu vers’un marinare). - Staremu assai à ghjunghje à Livornu ?

U MARINARE (bruscu). - Una mez’ora ! (pianu) Chì spiritata ! A dumerebbe eo sè fussi a mo moglie !

(S’alluntana u marinare).

TUTTUCCIA (turnendu à Camillu). - Ai intesu ? Frà una mez’oretta, saremu in terra camina.

CAMILLU. - Per furtuna !

TUTTUCCIA. - Cumu ? Ùn ti diverti ? Hè una bella passighjata, è mi surprende ch’e nostre Bastiese ùn la faccianu spessu, invece di stà si ne à penciulà nant’a Piazza è a Traversa.

CAMILLU. - Micca tutti ponu fà a spesa...

TUTTUCCIA. - Ùn hè po una ruina ! Risparmiendu un pocu sopr’a tuletta, ùn ci hè signora ch’ùn possa permette si la ogn’annu.

CAMILLU (malignu). - Ma quante cunsenterebbenu à iss’ecunumia ?

TUTTUCCIA. - Eo, per esempiu... Mi sentu quì cusì alegra, chì mi vene a voglia di ballà (si mette à saltà).

CAMILLU (seriu). - Ùn fà a scema ; ti guardanu...

TUTTUCCIA. - Eppoi ? Ùn sarà permessu di diverte si ?

CAMILLU. - Onestamente !

TUTTUCCIA. - C’u so maritu ? Alò, salta cun mè...

CAMILLU. - Lascia mi tranquillu !

CAPITANU (guardendu la, pianu). - Chì fringulifrangula !... Hè un bellu buccone ! (s’alluntana).

TUTTUCCIA (à Camillu). - Sì un’azzizume ! (s’alluntana).

PASSAGHJERU (à Tuttuccia). - Madamicella !

TUTTUCCIA. - Sò maritata ! (mustrendu Camillu). Hè quellu u mio sposu...

PASSAGHJERU. - Vi pigliai pè a so figliola ; site cusì giovana !

TUTTUCCIA. - Ed ellu ùn hè vechju... vinticinqu’anni.

PASSAGHJERU. - Scusate !

TUTTUCCIA. - Ùn ci hè male... Cosa vuliate dì mi ?

PASSAGHJERU (mustrendu un scogliu). - Videte iss’isulottu c’un fanale ?

TUTTUCCIA. - Ebbè ?

PASSAGHJERU. - Hè a Meloria.

TUTTUCCIA (indifferente). - Eppoi ?

PASSAGHJERU. - Hè famosa pè una battaglia navale chè i Ghjenuvesi vinseru sopra i Pisani...

TUTTUCCIA (indifferente). - Ci aghju gustu.

PASSAGHJERU (sguaiatu). - Eo nò, perchè da issu ghjornu i Ghjenuvesi diveneru i nostri patroni...

TUTTUCCIA. - Hè un pezzu ch’ùn lu sò più...

PASSAGHJERU (facendu l’ochjata). - Ci ne resta sempre qualcosa...

TUTTUCCIA (ridendu). - I camalli, o i figlioli... Ma Pisa ùn hè dentru terra ?

PASSAGHJERU (impurtante). - Sì, ma avia un gran portu allora in foce d’Arnu, avà arrinatu, è ci muntavanu per fiume i bastimenti di guerra.

TUTTUCCIA. - Micca cum’è u Formidable, n’hè ?... Ma quantu tempu sarà ?

PASSAGHJERU. - Sei cent’anni... Avete intesu numinà u Conte Ugolinu, d’u quale parla Dante ?

TUTTUCCIA (ridendu). - Eo, nò ! Qual’era stu Mussiù ?

PASSAGHJERU (cun impurtanza). - Un signurone ch’u vescu Ruggeri fece more di fame cù i figlioli...

TUTTUCCIA. - Stu vescu era un birbante.

PASSAGHJERU. - È Ugulinu ùn valia megliu ; avia traditu u so paese !

TUTTUCCIA. - Ma i figlioli ?

PASSAGHJERU (grave). - Sarianu diventati forse cum’ed ellu ; u seculu era gattivu...

TUTTUCCIA. - È dicenu tantu male d’u nostru !... Ma parlemu di cose muderne, chì più c’interressanu è cunniscimu megliu !

CAMILLU (guardendu li, pianu). - Ùn anu ancu finitu ! Cosa diceranu ?

TUTTUCCIA (à u passaghjeru). - Hè vera chì Livornu hè una cità alegra ?

PASSAGHJERU. - In stu mumentu soprattuttu chì ci correnu pè i bagni tanti furesteri !

TUTTUCCIA (avvicinendu si à Camillu). - Senti : ci sò i bagni di mare à Livornu ; ci anderemu ancu noi ?

CAMILLU. - Per questu, ùn aviamu bisognu di move ci da Bastia...

PASSAGHJERU. - Ùn hè listessu... Ci viderete culà giardini è fiori...

TUTTUCCIA. - È dicenu chè u marinu brusgia e piante !

PASSAGHJERU (facendu l’ochjata). - A dimu noi per avè una scusa d’ùn fà nulla, è dà i nostri soldi à i burattini.

TUTTUCCIA. - Cume si chjama issa passighjata ?

PASSAGHJERU (impurtante). - L’Ardanza, è ci aghju una villa c’una vista magnifica sopra u mare...

TUTTUCCIA. - Si vede ancu a Corsica ?

PASSAGHJERU. - Luntanu, luntanu, cum’è in celu...

TUTTUCCIA. - Oh, cara ! Ci anderemu ancu noi ?

PASSAGHJERU. - V’offru l’ospitalità in casa mea...

CAMILLU. - Ùn ci firmemu à Livornu...

PASSAGHJERU. - Duve andate ?

CAMILLU. - À Firenze... È poi videremu...

PASSAGHJERU. - Firenze hà statue è palazzi... Ma hè un fornu in stu mumentu, un desertu ; tutti ne scappanu à u mare o à a muntagna... È cosa sò e statue di petra, cumparate à quelle di carne, chì ragionanu...

CAMILLU. - Micca sempre...

PASSAGHJERU (guardendu Tuttuccia). - È ponu currisponde à i vostri penseri ? Sentite à mè : state vi ne fine à a rinfrescata à Livornu !

TUTTUCCIA (à Camillu). - Cosa ne dici ?

CAMILLU (pianu). - Hà ghjà abbuccatu, a civetta ! (forte). Ùn ci simu mossi per vede u mare...

PASSAGHJERU. - Ma quì ci hè cusì bellu mondu !

CAMILLU. - Ùn lu cunniscimu !

PASSAGHJERU(impurtante). - M’incargu eo di fà vi lu cunnosce à fondu...

CAMILLU. - Ùn ci tengu !

PASSAGHJERU. - Possu prisentà vi a Cuntessa Rusponi, a mio cugina...

TUTTUCCIA (pianu à Camillu). - Senti : una cuntessa !

PASSAGHJERU. - O à u mio ziu, u marchese Taccu, veduvu cun duie figliole, dui anghjuli !

TUTTUCCIA. - Oh, cara ! cume la ghjucheremu inseme !

CAMILLU (bruscu). - Ùn sì più una bardascia...

PASSAGHJERU. - Mancu elle... Eppuru, saltanu vulinteri... Una hè ghjà prumessa à u principe di...

CAMILLU. - Ci sò troppu nobili ind’a vostra famiglia, è noi ci feriamu brutta figura !

PASSAGHJERU. - Sè vulete cunnosce u cumerciu, possu cuntentà vi, chì ci aghju di gran relazione...

CAMILLU (seriu). - Mi piace à vive solu !

PASSAGHJERU. - Ah, voi site un filosofu !

TUTTUCCIA (pianu). - Un orcu !

PASSAGHJERU. - Ma a vostra moglie hà forse altre idee...

TUTTUCCIA. - Eo obidiscu à u mio sposu... Ma cunfessu chì mi piace a cunversazione...

CAMILLU (pianu). - Cun l’altri !

PASSAGHJERU (à Camillu). - Allora duvereste fà qualcosa per cuntentà la !

CAMILLU (pianu). - Quanti discorsi !

TUTTUCCIA (à u passaghjeru). - Cos’hè quellu puntu biancu sopr’a muntagna ?

PASSAGHJERU (surridente). - A chjesa di Monteneru. Noi emu u Cristu Neru, è i Livurnesi a Madonna...

TUTTUCCIA. - Ma ùn farà tanti meraculi ?

PASSAGHJERU (galante). - Anzi di più, perch’hè donna.

CAMILLU (pianu). - Chì scrianzatu ! (forte). Ùn mi parenu cose da burlà... È per ùn sente le, mi ne vò !

(S’alluntana Camillu, ùn perdendu li, però, mai di vista).

PASSAGHJERU (à Tuttuccia). - Chì estru li piglia ?

TUTTUCCIA. - Ùn vole sente parlà d’i Santi, è cun ragione...

PASSAGHJERU. - U mio scherzu hè innucente !

TUTTUCCIA. - Ùn tantu !

PASSAGHJERU. - Ma poichè dispiace anc’à voi...

TUTTUCCIA. - Ùn ne parlemu più !

PASSAGHJERU. - C’un omu cusì usprice, ùn pudete esse felice !

TUTTUCCIA. - Ellu usprice ? Hè una pasta !

PASSAGHJERU (surridendu). - Si vede...

CAMILLU (pianu). - Li surride.

PASSAGHJERU. - Impedì vi u cumerciu c’u mondu elegante, à voi chì ci splendereste cum’è a luna frà e stelle !

CAMILLU (pianu). - Si riscalda !

TUTTUCCIA (surridendu). - Cumparà mi à a luna ùn hè troppu galante !

CAMILLU (pianu). - Li surride ancu ella !

PASSAGHJERU. - Nò, à u sole, poichè abbagliulate chì vi guarda.

TUTTUCCIA (mustrendu u maritu). - Tutti ùn pensanu cum’è voi...

CAMILLU (pianu). - Parlanu di mè !

PASSAGHJERU (cun focu). - I ceghi nò...

TUTTUCCIA (surridendu). - Abituatu, cume site, à u gran mondu, ùn vi costanu fatica i cumplimenti...

PASSAGHJERU. - V’ingannate ; ùn mi n’esce mai unu di bocca !

TUTTUCCIA (surridendu). - È avà cosa dite ?

PASSAGHJERU (cun focu). - A verità, è sò prontu à pruvà la !

TUTTUCCIA. - Vi ne dispensu...

(S’avvicina u Capitanu).

PASSAGHJERU (pianu). - Cosa cerca quì issu vechju marinu ?

CAPITANU (avvicinendu si à Tuttuccia). - Signora, ch’eo vi prisenti i mio rispetti !

CAMILLU (pianu). - Avà ci n’hè un altru !

CAPITANU (à Tuttuccia). - Sè mai aviste alimeie da vende, stu signore vi puderia aiutà !

TUTTUCCIA (à u capitanu). - Perchè mi dite ste cose ?

CAPITANU (mustrendu u passaghjeru). - Perchè d’ellu n’hè incettatore.

TUTTUCCIA (surpresa). - D’alimeie ?

PASSAGHJERU. - Ùn vi disse ch’aghju relazione in cumerciu ?

TUTTUCCIA. - C’invitaste à a vostra villa...

CAPITANU (surridendu). - Qualchì palmentu à Miomu o à Grisgione ?

PASSAGHJERU (à u capitanu). - Cosa ne sapete voi, ch’ùn scindite mai in terra ?

CAPITANU. - Ùn imbarcaste mai chè botte d’alimeie.

PASSAGHJERU (alluntanendu si). - Ghjà ! site un marinare !

CAPITANU. - Megliu chè un struzzinu !

TUTTUCCIA (à u capitanu). - Un omu cusì bè apparentatu !...

CAPITANU. - Cumu ?

TUTTUCCIA (surridendu). - Hà una cugina cuntessa è un ziu marchese !...

CAPITANU. - A so cugina a cunnoscu, chì vene ogni matina, c’a panera in capu è à pedi scalzi, à vende roba à u mercatu ; è, in quantu à u ziu, hè un poveru ciavattinu, veduvu di frescu, chì mantene e so criaturelle cun pane è cipolla mastucata...

TUTTUCCIA. - Hè un bellu bugiardu !

CAPITANU. - Ùn ete forse l’usu d’i viaghji...

TUTTUCCIA. - Hè u primu ch’e facciu !

CAMILLU (pianu, avvicinendu si). - È ùn la finiscenu ancu !

CAPITANU (à Tuttuccia). - I viaghjadori e dicenu grosse !

TUTTUCCIA (ridendu). - È tandu i marinari, chì viaghjanu sempre ?

CAMILLU (pianu). - Ridi, ridi, o civittò ! Pienghjerai prestu !

CAPITANU (à Tuttuccia). - Noi ùn viaghjemu, chì simu quì in casa nostra !

TUTTUCCIA. - Hè vera ! A dissi per burlà... Sò ancu eo chè a vostra sincerità hè pruverbiale...

CAPITANU (cun focu). - Fidate vi d’un marinare !

TUTTUCCIA (surridendu). - Mi ne fidu soprattuttu avà, chì sò in vostre mane !

CAPITANU (galante). - Cusì ci fuste sempre, chì sarebbenu menu tristi i viaghji...

TUTTUCCIA (ridendu). - Grazie tante ! (à Camillu). Senti, o Camì ! quì u capitanu ci prupone di stabilì ci in vapore...

CAMILLU (malignu). - Sopr’à u soiu, n’hè ?

CAPITANU (surridendu). - S’intende !

CAMILLU. - Ed eo allora di cumandante, diventeria u muzzu di bordu, chì si piglia à muscellate ?

(S’alluntana Camillu).

MARINARE (à u capitanu). - Capità, rinfresca u ventu !

CAPITANU (à u marinare). - Mettite e vele !

(S’alluntana u marinare).

TUTTUCCIA (à u capitanu). - Ci saria periculu ?

CAPITANU (galante). - Ùn ci hè nulla à teme quandu s’hà à bordu anghjuli cum’è voi !

TUTTUCCIA. - Ma veramente ?

CAPITANU. - Cum’e vi la dicu !

TUTTUCCIA. - Ma l’aquile marine chì ci volanu intornu ùn annunzianu tempesta ?

CAPITANU. - U segnu più certu hè issu nuvulettu sopr’à Montecristu...

TUTTUCCIA (spaventata). - È allora ?

CAPITANU. - Ma quandu scuppierà, saremu in portu... almenu ch’ùn rinforzi u ventu...

TUTTUCCIA. - Oh, Madonna ! Mi dispiaceria di more in mare, manghjata da i pesci...

CAPITANU (ridendu). - Megliu chè da i varmi !... Almenu s’ingrasseranu pè a cucina...

TUTTUCCIA (sputendu). - Pfù ! pensendu ci solu, mi crescenu in bocca !... È voi ne parlate tranquillu !...

CAPITANU (mustrendu u mare). - Dorme per dorme, hè ancu megliu stende si sott’à issu morbidu lenzolu...

TUTTUCCIA (spaventata). - Cusì freddu !...

CAPITANU (ridendu). - Ùn si sente nè fretu nè caldu...

TUTTUCCIA. - È u dite senza trimà, ridendu !

CAPITANU. - Sè trimassi eo, allora sì chì pudereste appruntà vi à scende ci à piccu !

TUTTUCCIA. - Oh, perchè m’imbarcai ?

CAPITANU (galante). - Per prucurà mi u piacè di vede vi...

TUTTUCCIA. - O capità, mi racumandu !

CAPITANU (stringhjendu li a manu). - Sò tuttu vostru !

TUTTUCCIA (ritirendu a so manu). - Mi stringhjite troppu...

CAPITANU. - Hè per pruvà vi a mio divuzione...

CAMILLU (avvicinendu si). - Si scaldanu i farri !

CAPITANU (videndu avvicinà si Camillu). - Mi riclama u serviziu !

TUTTUCCIA. - Fate puru !

CAPITANU (à Tuttuccia). - À vede ci, Signora !

(S’alluntana).

CAMILLU (à Tuttuccia). - Ti piace à cunversà cù i marinari ?

TUTTUCCIA. - Si parlava d’u tempu !

CAMILLU (malignu). - Tantu per entrà in materia... Eppoi... Ma pocu importa oramai !

TUTTUCCIA. - Pare chì ci minacci un tempurale...

CAMILLU (misteriosu). - Pur troppu !

TUTTUCCIA. - Ma ùn scuppierà chè à u nostru arrivu à Livornu...

CAMILLU. - Appuntu !

TUTTUCCIA. - È allora saremu salvi !

CAMILLU. - Chì lu sà ?

TUTTUCCIA. - Trovi piacè à spaventà mi...

CAMILLU. - Ogna bè preparà ti !

TUTTUCCIA (spaventata). - À cosa ?

CAMILLU (cun risu malignu). - À u tempurale !

TUTTUCCIA. - Ùn senti chì saremu à Livornu ?

CAMILLU. - È ùn poi annigà ti in portu ?

TUTTUCCIA (stizzita). - Mi ne vò per ùn santavuglià mi...

CAMILLU (andendu si ne). - Nò, mi ne vò eo, chì torna à cunsulà ti u capitanu...

(S’alluntana Camillu è s’avvicina u capitanu).

TUTTUCCIA (pianu). - Sarebbe mai ghjelosu ?

CAPITANU (à Tuttuccia). - Cum’hè ? Vi lascianu sola ? Eo, s’avissi a furtuna di pussede una moglie cusì bella, ùn mi ne staccaria mai...

TUTTUCCIA (brusca). - È diventereste nuiosu !

CAPITANU (surridendu). - Nò signora, perchè cunnoscu a navigazione !

TUTTUCCIA. - È ùn v’accurghjite d’i scogli !... Ma permettite mi di ritirà mi : mi sente u capu !

CAPITANU. - Hè un principiu di mal di mare : andate à ripusà vi ind’a mio cabina, ch’hè più ariosa...

TUTTUCCIA. - C’u mio maritu ?

CAPITANU (surridendu). - Hè un male ch’ùn vole disturbi...

TUTTUCCIA (secca). - Allora, lasciate mi in pace !

CAPITANU. - Site menu amabile di prima...

(S’alluntana Tuttuccia).

CAPITANU (pianu). - Quand’e cridia d’esse à cavallu, mi trovu à pedi !... Ma hè forse un raffinamentu di civetteria...

(S’avvicina Camillu).

CAMILLU (à u capitanu). - Capità, duvereste rende mi un serviziu !

CAPITANU. - Ancu dui... Per voi...

CAMILLU. - Hè pè a mio moglie...

CAPITANU. - Ùn possu ricusà nulla...

CAMILLU. - A credu... Cunniscite u sgiò Petru ?

CAPITANU. - Issu fior di galant’omu, u vostru sociaru ? Qual’hè ch’ùn lu cunnosce in Bastia ? Hè amatu da tutti...

CAMILLU. - Allora, v’incargareste d’una cummissione per ellu ?

CAPITANU. - Cun gran piacere... Ma date mi la subitu chì à mumenti saremu in portu...

CAMILLU. - Avemu tempu allora !

CAPITANU. - Fate u comudu vostru...

TUTTUCCIA (pianu, avvicinendu si). - Cos’anu à discorre tantu inseme ? (forte à Camillu). Ti circava !

CAMILLU. - M’ai trovu...

CAPITANU (videndu l’aria imbrugliata à Tuttuccia). - V’incomudu ? Addio ! (à Camillu). Aspettu a vostra cummissione...

TUTTUCCIA (à Camillu). - Cos’hè ?

CAMILLU. - Una surpresa !

TUTTUCCIA. - Dì mi la !

CAMILLU. - Allora ùn sarebbe più una surpresa per tè !

TUTTUCCIA. - Ùn sì più listessu...

CAMILLU. - Tempu è vuluntà spessu muta... Tù nò, ch’ùn poi cambià !

TUTTUCCIA. - Ùn ti vidi mai cusì scortu... Ah, maledicu u mumentu chì m’imbarcai !...

CAMILLU. - Ed eo u benedicu !

TUTTUCCIA. - Perchè ?

CAMILLU. - Perchè finiscenu i mio guai !

TUTTUCCIA. - Sì tuttu misteri... Senti : voli fà mi un piacè ?

CAMILLU. - Sè possu !

TUTTUCCIA. - Turnemu ci ne in Bastia !

CAMILLU. - Ci turnerai prestu...

TUTTUCCIA. - Subitu, press’u mio babbu !

CAMILLU. - À nutu ?

TUTTUCCIA. - C’u prussimu vapore !

CAMILLU. - Cun questu...

TUTTUCCIA. - Cun questu, nò !

CAMILLU. - Perchè ? Eppuru, cunnosci u capitanu !

TUTTUCCIA. - Ci aghju e mio ragione per ùn vulè !

CAMILLU. - Ed eo e meie per insiste !

TUTTUCCIA. - Mi sottumettu... Ma sè voli cuntentà mi, prumetti mi d’ùn fà mi più esce di Bastia !

CAMILLU (misteriosu). - Dipenderà da tè...

CAPITANU (avvicinendu si à Camillu). - Simu in portu ; a vostra cummissione ?

CAMILLU (à u capitanu). - Rimetterete à u sgiò Petru... a so figliola !

TUTTUCCIA (spaventata). - Eo un feci male...

CAMILLU(saltendu in barchetta). - Ci credu ! Ma per ùn sente lu più ripete, mi ne vò in America... Vuga !

(S’alluntana c’a barca).

TUTTUCCIA (pienghjendu). - Oh ! disgraziata !...

(Scende u tendone).

F . I . N . E .