Vicinu à Bucugnanu campavanu dui frateddi. U più vechju, Francescu, era riccu chì avia fattu un beddu matrimoniu.

U so frattedu Stevanu, u tintu, un n’avia nudda, fora chè qualchì debiti. Allora si dissi chì andà à spassu pà fà furtuna ùn custava nudda, u megliu era di pruvà.

 

Dopu avè basgiatu a so moglia Ghjasippina chì un facia chè pienghja, si metti in viaghju è ghjunta a sera, trova un buschettu pà passà a notti. Si sdraga  nant’à un fascinu di filetta è s’addurmenta. Ma fù prestu svighjatu pà mughji di lupi, è ancu di lioni, scapati da un circulu a mani stessa.

Presu di paura, si ni codda nant’à una leccia. Dopu un beddu mumentu, eccu chì senti bucià uni pochi di parsoni. Tandu vedi à u pedi d’un pinu setti omini, certamenti una banda di latri,  chì s’avvicinani  di a porta di una sapara, chì sirvia d’ arula,  fatta pà agrundà una lovia quandu hà dà  purciddà.

 

-«  Arula, apri ti !! »  dissi unu .  A porta si apri un un soffiu, è i latri entrini unu dopu l’altru.

L’ultimu dissi –« Arula, sarra ti »  è a porta si chjusi d’un colpu ;

 

A matina i latri si ni vani, è Stefanu fù cuntenti di metta pedi in terra chì a forca d’issa leccia ùn valia un bon lettu. S’avvicina di a porta di l’arula è dissi : - «  Arula, apri ti !! »  è a porta si apri ! È tandu scopri in ogni cantu sacchi pieni di pezzi d’oru, cullani di diamanti, è tanti ricchezzi ammatalsati  chì c’era da mantagà !

 

Stefanu si dissi chì i lattri pudiani vultà, è allora era megliu di scappà prestu dopu avè impiutu un saccu di pezzi d’oru è di petri preciosi.

 

Dopu avè cumandatu à a porta di chjuda si dicendu : »Arula sarra ti ! » si metti in viaghju pà vultà si ni in Bucugnanu, chì a so moglia Ghjasippina era in pinseri.

-« Santa Verghjini Maria,  Ghjasepp’è Ghjesù!!  chì ò tutti issi ricchezzi!”

- L’aghju arrubati à una banda di latri, è ùn hè chè ghjustizia. Avà semu ricchi ! Ma pà  misurà  quantu ci n’hè, và subitu à dumandà  u so bacinu à u me frateddu Francescu. Ma acqu’in boccà s’eddu ti dumanda parchì !. »

 

Ghjunta inde Francescu, Ghjasippina li dumanda di pristà li u so bacinu pà misurà un pocu di fenu.

Francescu, malignu, hè d’accusentu è li porghji u bacinu,  ma si dissi :-«  Trè mè mè, mi stona chì u me frattedu avissi da pisà u fenu in u bacinu ! anc’assai chì aghju missu in fondu di u bacinu  una stampa  di colla, è un pocu di ciò chì sara misuratu si firmarà attaccatu. « 

 

È quandu Ghjasippina vultò u bacinu à Francescu, una baiocca d’oru era ferma in fondu:

-« Mì mì mì !  u me frattedu hè carcu à oru !Era povaru, hà mancatu dui ghjorni è  eccu lu riccu !  Ùn ci hè manc’un palmu di nettu ! Andemu ghjà à veda. »

 

Pan pan : -« Apri mi o Sté, sò eu u to frateddu.

-  Chì ci hè  o Francè ?

-  Ci hè chì m’a’ taruccatu ! Ùn hè fenu ch’è tù a’ pisatu incù u me bacinu ma oru ! N’aghju  truvatu una pezza in fondu ! Dì mi induva l’a’ presu o ti portu indè i ciandarmi »

 

Presu di paura, Stefanu dissi a virità à u so frateddu. Li conta l’affari di i latri, di a porta  chì si apri dicendu « Arula apri ti « ,  di u tisoruo scupartu, è cetera….è pruponi à Francesu  di vultà tremendui à l’arula qualchì ghjorni dopu à buscàsi dinò tanti sacchi ‘oru.

 

Ma u furbu di Francescu ùn pò aspittà , è a sera stessa presi dui muli imbastiati,  s’avviccina  di a sapara è si piatta daret’à un scogliu. Vedi affaccà i latri chì entrini  drent’à l’arula.  Aspetta fin’à l’alba è i vedi chì si ni vani. Allora s’avviccina :

-«   Arula, apri ti !! »  è a porta si apri.

 

O miraculu ! A vista di tutta issa furtuna u rendi come scemu ! Si lampa di corpu nant’à i sacchi d’oru briunendu a so gioia. È po carca i dui muli,  quantu ni poni purtà, esci fora ma ùn si ramenta più ciò chì ci voli à di pà fà sarrà si a porta .

-« Porta, chjiudi ti; usciu,  chjiuditi; ti pregu, bedda  porta, chjiudi ti…»

 

 Hà tuttu pruvatu, ma a porta ùn si volsi apra..

 

 « Tantu peghju, si firmarà aparta » si dissi, è faci pà andà si ni,  ma eccu chì i latri sboccani di colpu davanti à a porta è si feci piglià.  Di stizza di fà si spoglià di u so tisoru, u  tumbetini è di rabbia, u mettini in pezzi,  ch’eddi lampani in un cantu di l’arula .

 

Quandu Stefanu ghjunsi ind’è Francescu pà prupona di vultà a sera stessa à u tisoru, a moglia, pensirosa, li dissi ch’eddu  era partitu à circa dinò u tisoru  quatru ghjorni in quà è più nutizii. Tandu hà capitu ch’edd’era accadutu qualcosa.

 

Si missi subitu in viaghju , ghjunsi davant’à l’àrula , vedi a porta aparta. U tisoru ùn c’era più ma in un cantu, truvò capu, anchi, bracci di u so frattedu ghjittati in un scornu.  Com’eddu hà pussutu, hà missu tuttu in un saccu è si n’hè vultatu in Bucugnanu  pà intarrà lu.

 

Ma comu spiigà a morti di Francescu ? Allora li veni un’idea : Và à truvà  u scarpari è li feci fà un saccu di coghju, missi drentu  i resti di u so frateddu e andeti à intarrà lu in u so ortu.

a

S’hè intesu in paesi prima chì Francescu era cascatu à cavaddu,  è po qualchì ghjorni dopu ch’edd’era mortu. 

 L’intarru hè statu fattu è c’era u paesi sanu, ma nimu hà vistu sarrà a cascia, parchì drentu Stefanu avia missu uni pochi di petri.

 

Ma chì sò divintati i setti latroni ?

 Dui volti si sò fatti arrubà a maghjor parti  di u so tisoru. È ùn a pudiani suppurtà. Allora piglietini una dicizioni : ci voli à ritruvà quiddi chì l’ani fatta.

 

È si mettini à intarrugà a ghjenti pà sapè quali, in paesi, saria divintatu riccu di colpu. È fà è fà, imparini chì Stefanu, chì era puvarettu, avia di pocu compru un beddu chjosu è una casa chì pari un palazzu, inturniata d’alti muri.

 

-« Ùn pò essa chè eddu » si dissini i latri. Ma  comu fà  pà entra è intuppà  un omu dicisu, è chì si varda ?

 

Allora u capizzonu di i  latri ebbi un’idea maestra : -« Femu ci passà pà balanini, carchemu  una mula di narpii pieni d’oliu,  è sei  muli di narpii maiò, ci piattemu  drentu à i narpii  è eiu solu purtaraghju  i muli.  Intrimu è  i scumpiimu tutti.

 

U lindumani, si sintia pà issi stradoni : -« I balanini sò quì ! Compra oliu ! »

 

Pianu pianu, i muli di i balanini  s’avvicinani  di a casa di steFanu:

-“I balanini, compra oliu. I balanini”

 -Entri puru, amicu, chì avemu bisognu d’oliu, è quiddu di Balagna è u più bonu.

 

Dopu avè aiutatu  u capizzonu di i latri à scarcà i narpii, hà capitu subitu chì narpii cusì duri  ùn pudianu essa pieni à oliu ! è s’edd’erani i latri ? Ùn ci pò essa altri raghjoni !!

 

Tandu  Stefanu dissi à l’omu :

 -«  O amicu, viniti da luntanu ! Allora pà sta sera, firmeti vi quì, vi faremu

   Manghjà èe dorma, è dumani vi cumpraraghju tutt’a vostra carica. »

- Faremu cusi, seti beddu bravu !”

È po Stefanu  urduneti à i so servi di fà bodda  setti stuvigli pieni d’oliu è di teni si pronti à u so cumandamentu « .

 

Vinutu a notti, i latri volsini sorta da i narpii pà tumbà  tutt’a ghjenti,  ma da i balconi di a casa piuvia oliu buddenti,  è firmetini tutti brusgiati sopra piazza, morti in pochi mumenti .

 U capizzonu di i latri chì durmia in camara hà cercu di scappà,  ma fù intoppu è  purtatu à i ciandarmi.

 

Pochi tempi dopu, fù brusgiatu in piazza pùblica  davant’à tutti  i paisani di u circondu.

Si ni parla ancu avà, di i parti di Bucugnanu !