L’ANIMALE È A VOLPE

Fola di L’Oretu di Casinca

In i tempi quandu l’animali parlavanu, ci era un pastore, Cecceccu, chì stava in Stagna... Ci era una casetta assulanata in faccia à u mare è custì avia e so capre. Una matina si mette à scavà, pienu di frumagliu nantu à e spalle per mette li in cantina. Infine chì sguilla è i furmagli si sciappanu. Eccu chì s’affacca Chjapparellu u so cane, quellu chì mettia terrore in a regione pè e volpe. È si face una tichjina custì à crepà chì ùn ne pudia più. Allora hè andatu à stracquà si sott’à l’alivu. Ün pudia mancu più rispirà. À cantu à ellu ci era un albritru induve a merla bizzicagiallu si era fatta u so nidu è ghjeranu nati l’acellucci. Ci vulia ch’ella partissi à girandulà per truvà è dà li da manghjà. È si mette à pianghje dicendu: “ Cumu aghju da fà? Ùn ci hè nimu per curà i mo ciucci!” Pianu pianu s’affacca cumare Volpe è li dice: “O cumà, a sai ch’è no simu amichi! Ùn ti inchietà chì i curu eiu”. Ù era ancu partuta a merula chì spicca trè salti è si sciacca i trè merlacconi.

Dopu à un certu tempu ghjunghje a merla è u nidu era viotu. Si mette torna à bughjulà: “O i mo ciuci! I mo ciucci sò morti! I mo ciucci!” Chjapparellu era sottu à l’alivu è dice “Senti o cumà. Parti à fà u giru di i rughjoni è bughjula: Chjapparellu hè mortu.” Si affacca allora cumare Volpe è dice: “ S’ellu hè mortu li aghju da piscià in bocca! Chì à cani vechji a volpe li piscia in bocca”. È cusì face.

Chjapparellu apre a bocca è si manghja a volpe.

È dice à a merla: “ À i falsi ci vole à fà li pacà!”.