A MAMMA DI SAN PETRU

 

Paulina, a mamma di San Petru, era pessima, più chè cattiva, è tutt’a so vita ùn avia mai fattu nudda di bè.

Talmenti chì quand’edd’hè morta, Diu l’hà inviata in infernu, ciὸ chì hà missu à San Petru à l’addisperu ! 

N’avia persu u sonnu, u bia è u manghjà !

 

-« O Diareddu, comu devi soffra me’ mamma in infernu ! Lacheti cuddà quì ! “

 

-« O San Pè, mi dispiaci, ma a’ vistu i so fatti nant’à a terra ! Ùn ci hè meritu pà edda di cuddà quì in Paradisu. Ùn hà mai fattu una sola bona cosa tutt’a so vita. Cerca bè, s’è tù ni trovi una, ancu minuredda, allora saraghju d’accunsentu pà fà la cuddà quì. »

 

In Paradisu ci hè pà tutt’ungnunu un libru induva sὸ scritti tutti i fatti d’una parsona tutt’a so vita. San Petru metti l’ochji nant’à quiddu di a so mamma pà truvà un bonu fattu ma ùn c’era nudda !

 À rombu di circà,  pὸ leghja chì una volta avia datu una buchjula di porru à un malurosu famitu !

 

Corri subitu à veda u Signori :

-« O Signori, fighjuleti ciὸ ch’aghju truvatu !  Un ghjornu hà datu una buchjula di porru à un povaru ! Bastarà pà salvà la ?

- A facciu pà tè o San Pè, issa buchjula salvarà  a to mamma . »

 

San Petru piglia una buchjula di porru è a lampa à capu in ghjὸ versu l’Infernu, tinendu la strinta pà pudè la tirà.

Comu era una foglia fresca è sana, s’hè allungata talmenti ch’edd’hè ghjunta in Infernu.

 

A mamma di san Petru, chì l’aspittava, intoppa a foglia di porru chì cumencia à cuddà versu u Paradisu .

 

Videndu la cuddà, un dannatu s’attacca à i so ghjambi, è po un altru, è po un altru, è po un altru, è pianu pianu, tutt’i dannati s’alzani versu u celi attaccati à Paulina !

 

Quidda si volta è vedi a catena di i tribulati chì cercani anch’eddi à scappà. In  zerga, cumencia à calcità pà fà lintà i so anziani cumpagni di l’infernu:

 

-« Linteti issa funa, ch’ùn hè pà voi chì San Petru, u me figliolu, l’hà mandata ! O San Pè, dà una scuzzulata pà fà li cascà !

- Laca li cuddà o Mà,  pà ùn essa un’ingrata.

- Innὸ, chì ùn a miretani micca ».

 

Ѐ a mammacia, à colpi di calci, faci cascà un’à unu i dannati, chì voltani in Infernu !

 

-«  Allora, o San Pè, chì ni pensi ? » dissi u Signori.

 

Chì pudia pinsà, u tintu Santu,  videndu issu spitaculu ! Trist’è neru, San Petru lenta a foglia di porru è a so mamma si ni volta anch’edda in infernu,chì quà era a so vera piazza !