Cum’ella i vede Anna Lisa....

         Corti, per mè ùn hè micca solu una capitale storica, un'università, un museu, una citadella, un locu turisticu...

Ghjè dinù u mo paese, un paese tamantu induve sò ingrandata, induve sò nati u mo babbu, a mo mamma, e mo mammone è i mo babboni. Induve ci hè tutta a mo famiglia, è induve si cunnosce à tutti. Tuttu ciò chì face parte di a mo educazione familiale, culturale, tradiziunale...

         Ma quand’ellu si ammenta à Corti, si dice tanti affari, ma si dice pocu a particularità ch’ella sparte a mo cità cù u restu di l'isula. Ghjè l'usu di "i cugnomi". Permette di fà a sfarenza trà à ghjente chì anu a listessa casata, cù certe volte u listessu nome. Dà dinù a pussibilità di ricunnosce a parentia.

Per esempiu ind’è a mo famiglia, e mo mammone si chjamanu treminduie Casanova. U cugnome di a mo mammone materna hè "Caghetta" è quellu di a mo mammone paterna hè "Carnaghjolu". À spessu, si dà un cugnome à una persona per u so fisicu : " I rossi per i so capelli, Nasone per u so nasu, U Techju..." Ma ùn cridite micca, hè un affare seriu, i cugnomi, puru s’elli facenu ride u più spessu!

Quandu ci sò dui cugnomi ind’è una famiglia, quellu di a mamma è quellu di u babbu; i zitelli piglianu quellu di u parente à u quale s'assumiglianu u più. Eiu m'assumigliu à u mo babbu, sò dunque "di Bascione". Ma si pò dà dinù un cugnome perchè una persona hà fattu qualcosa di speciale. Per esempiu, u mo babbu hè di Bascione perchè quand'ellu era ghjuvanottu avia una baretta troppu grande. Certi sò cugnumati per via u so caratteru: "U Salvaticu" ùn ci hè bisognu à dì perchè! D’altri anu nomi d'animali " Ghjattò" o d'ogetti " Caraffa". Ma e so significazione si perdenu in u tempu, o si sò scurdate : I Maghjoni, I Bursoni, Tigrinu, Pulenda, Fissò, Patrone, Pitinellu, Cagone, Merchettu, Falcone, Panolu, Ortibellu, Fiamone, Badrati, Mannone, Raclò, Manferonne......

        Ghjè una pratica chì dà una leia trà i Curtinesi, pare una struttura assai suciale, si ricunnosce cusì a ghjente chì vene da u fora.