COACHING LITERARIU
Attelli
Scontri di 31.08.2012![Un gruppu in u 2007 Un gruppu in u 2007](https://interromania.com/sites/default/files/styles/image_400xx/public/scrittura_001_0.jpg?itok=Ugf4yH-0)
Un gruppu in u 2007
Subitu ch’ella ci hè porta l’occasione, ci piace à mette in cunfrontu a lingua nustrale cun temi, primure, manere di dì è di cuntà chì u corsu ùn ci era tantu avvezzu. Per quessa, ci vole di prima à caccià si di capu tutti i freni è l’ostaculi chì impediscenu di scrive. Rivene à dì chì, s’omu vole pudè scrive, ci tocca à desacralizà a scrittura è ùn vulè fà, à tutti patti, literatura. U miraculu hè tandu è nasce tantu più u literariu ch’ellu ùn si hè vulsutu fà capidopere !
Un chjassu utile è riccu hè a scrittura in a pruspettiva di a nuvella pulizzera. Custruisce una storia, inventà persunagi, mette li in un cuntestu dramaticu, permette bellu spessu di mette in ballu l’imaginazione è di fà truvà e parolle per dì. Dopu vene a tappa chì si ripiglia, si stringhje storia è discorsu. Cun dinù quellu pocu è tantu di scelta trà parechje pussibilità. È ùn hè micca inutile di parlà ne cun l’amichi è inseme di impezzà, cosge è almanaccà una custruzzione chì à pocu à pocu trova chjassu è porta sempre piacè.
Ind’è sta parte si pò truvà :
1) Duie indicazione per quelli chì a li volenu pruvà anch’elli. Ch’elli mandinu puru à l’indirizzu asso.ccu@wanadoo.fr e so prove s’elli volenu. Ci faremu un piacè tamantu di dà li u nostru parè, cunsigli s’elli ne volenu, via, u barattu ci garbarà. È po, s’ella casca, s’ella ghjova è ch’ella garbi.
2) Unepochi scritti fatti in attellu da giovani durante sti mesi passati. Certi anu ancu trovu un sboccu stampati in u libru Isula Nera, racolta culletiva Mediterraneri, nuvelle pulizzere, publicatu da l’Associu Corsicapolar à l’edizione Ancre Latine (Biguglia, 2011)