In isse cundizione si impone à l’evidenza u cambiamentu di statutu pè a lingua corsa chì si deve pudè arrimbà à l’ufficialità per assicurà si in e pratiche è allargà u so campu di azzione. U statutu di cuufficialità hè, in isse cundizione, cunsideratu indispensevule puru s’ellu pare una misura necessaria ma chì ùn pò, da sola, purtà risultati subitu subitu.
Principia custì un altra parte di u spostu chì si appoghja nantu à un metudu cumparativu è si ghjova di parechji arnesi, cum’è per indettu, l’esempiu di u Paese Bascu Sud (in Spagna) è quellu Nordu (in Francia). L’esame face vede chì à Nordu a cumpetenza bascofuna hè di a parte più vechja di a pupulazione è ch’ella và caliendu invece à u Sud duv’ella hè in ballu a cuufficialità, sò e classe più giovane di a pupulazione ad ammaestrà a lingua. D’altra parte a caratterizazione di e cumpetenze linguistiche secondu i livelli europei A, B è C ghjova in a demustrazione à strutturà a pulitica attiva prevista pè a Corsica.
L’impressione generale sentendu issu spostu hè di un prugettu raziunale è ragiunatu chì si prupone, in un periudu longu (da 20 à 30 anni) di assicurà l’avvene senza rumantisimu ma cù una primura è una vuluntà pusitive assai.