In u 2011 L’Assemblea di Corsica disse a so primura di u corsu vutendu cù una bella magiurità à prò di a cuufficialità corsu è francese. A quistione venerà torna à esse discussa frà pocu. In dui anni o quasi, si ne hè parlatu assai è u tema, s’ellu move sempre qualchì dificultà, trova dinù un bellu accunsente. U capiserviziu di a lingua in Corti, Bastianu QUENOT, hà spostu pocu fà, in una cunferenza publica, cum’ella si pone a quistione in leia cun parechje cunsiderazione : a situazione sociolinguistica ambiente, e cumpetenze Statu-CTC in quantu à l’insignamentu è a furmazione, e cumpetenze cursofune attuale di a pupulazione in Corsica, e pruspettive è u fogliu di strada di a CTC per sti pochi anni.
In un spostu tecnicu, amministrativu è precisu assai Bastianu QUENOT dice di prima u cuntestu di una lingua in priculu per via di un cuntestu sociolinguisticu signatu da a minurazione linguistica sempre à l’opera bench’elli fussinu stati arrigistrati prugressi impurtanti in e rapresentazione di a ghjente (un sundame recente mette in risaltu a primura di lingua cun 84%).