SPASSIGHJATE LITERARIE: “I MESSI DUMANDATI”

U babbu di Bastianu vinia di mora. Tutt’u paesi s’hè accoltu davanti à a so casa pà fà li onori è dà succorsu murali à i so parenti.

À meziornu, ci hè vulsutu à andà ind’è u so ziu pà u cunfortu, issu ripastu di dolu induva tutt’i parenti diviani participà.

Dopu avè datu capu à tutta issi ghjenti chì u dopu meziornu in quà sò vinuti à fà a so visita, Bastianu s’hè chjinatu tardu, faticatu mortu è s’hè addurmintatu subitu. Ma tardu in a nuttata, una mani ghjacciata hè vinuta à svighjà lu di colpu.  

-«  Quali hè chì m’hà tuccatu ? »

-«  Socu  ieu u to babbu !

È di fatti l’hà vistu ingutuppatu in un linzolu biancu chì tinia in manu un candeli accesu.

Hà cridutu ch’edd’avia suniatu ma purtantu, u candeli era sempri quì è ni pudia senta l’odori.

 

-«  Chì vuleti o bà ? »

Dopu a me morti socu in viaghju pà cuddà in paradisu ma senza numarosi messi,  ùn ci pudaraghju entra. Vulariu ch’è tù andessi à veda à Preti  Eliseu è pagà pà parechji messi. »

-« Sarà fatta dumani matina senz’altru o bà ! »

 

Quandu Bastianu s’hè svighjatu di bon’ora, hà cridutu à veru ch’edd’avia sunniatu, è ùn hè micca andatu à veda à Preti Eliseu .

 

A notti dopu hè svighjatu torna pà u so babbu, ma issa volta c’erani dinò   quattru murtulaghji incù candeli accesi chì purtavani a so  cascia di morti . U so babbu s’hè drizzatu è hà dittu chì ci vulia à creda ciò ch’eddu vidia è chì i messi dumandati, cosa impurtantissima,  ci vulia ch’eddi fussini ditti u lindumani.

 

Bastianu era pitrificatu,  è hà capitu chì ci vulia à fà u nicissariu. U lindumani hè corsu à veda à Preti Eliseu è hà cumandatu trenta messi, una pà ghjornu.    

 

Di tutt’a misata, hà pussutu dorma in paci, ciò chì vulia dì chì u spirutu di u so babbu era sudesfu.

 

Ma una volta i trenta messi ditti, u babbu hè torna vultatu incù issa volta a so zia è u so cucinu, chì erani morti tempi fà.

-« U me figliolu, i trenta messi ùn ani micca bastatu à San Petru pà apra mi a porta di u Paradisu.

   Ci ni voli dinò tant’è più. Vedi, i nosci parenti sò vinuti incù mè è a ti diciaranu chì eddi sò felici in paradisu è ùn aspettani ch’à mè. Ti diciaraghju quandu ùn ci ni sarà più bisognu. »

 

Preti Eliseu hà dittu messi tutt’i ghjorni senza mai cissà, è una sera, u babbu di Bastianu hè vultatu solu  solu  à veda u so figliolu :

-« O Bastià u me figliolu, ti ringraziu chì oghji sò  sudesfu! Sò  intrutu in Paradisu  è tuttu va bè.  Ùn mi vidarè più  ma da culà,  pudaraghju vighjà nott’è ghjornu nant’à tè. »