UN PUEMA DI GHJUVAN LUCCA LUCIANI:

A ROSULA DI NIMU

 

Miraculu di fiori in giru à ssa ruvina

Chì spuntanu di tarra è s’aprenu à u sole

Dicenu in un abbracciu sinceru à a matina

Chì vita ci n’hè sempre per chì a vole gode.

 

Cù u tettu falatu è tante timparere

Lampata da u celu una rosula sola

Hà truvatu l’alloghju à mezu à sse quatrere

Cum’è cosa chì ancu u desertu cunsola.

 

Di notte ùn s’affacanu più i mazzeri

È pò cresce l’albucciu chì u lacanu in pace

U ventu chì l’alliscia conta e fole d’eri

Ma nimu stà à sente è sogni ùn si ne face.

 

Per dalli u so apprezzu fermeranu i zitelli

S’ellu ne scappa unu u soiu sceglierà

Eppo stancu di corre, sottu à quelli alburelli

Si dumandarà forse : « l’aghju coltu, è avà ? »

 

Quandu di a nostra vita cascheranu i muri

Forse misuraremu tuttu ciò chì perdimu

È tandu ristarà in sti mumenti scuri

Più bella à u celente a rosula di nimu.

 

Ghjuvan Lucca LUCIANI