U MO MONDU IDEALE

Cathy Campana

                                                   U MO MONDU IDEALE

Chì furtuna d'esse nati
Sopr'à a Costa Orientale 
Beculu di l'antenati
In paese di Canale
O li momenti beati
O lu mondu ideale

Campavamu sempre fora
Liberi cum'è l'ocelli
Mai ùn curavamu l'ora
Chì piacè pà i zitelli 
È ci si paria allora 
D'allevacci trà fratelli

Forse la miseria c'era
Ma nisunu la vedia
Ghjera a ghjente sincera
Pò l'amicizia curria
Spampillava una lumera
Chì di l'amore nascia

Cù u prugressu malfattu
Arnese di disunione
Persu ormai u cuntattu 
À prò d'a televisione
Hè finitu u cumbattu 
Simu in l'acculturazione 

U corsu pare in dolu
Ùn ci hè più quella spartera
Lasciatu u paisolu
Batte appressu à a chimera
Eri veru campagnolu
Oghje u soldu pà bandera

Omu s'hè allontanatu
Di a vita paisana
Di colpu tuttu cambiatu
Micca di manera sana
A sucetà hà fiascatu
Addiu Corsica landana.

                                        Cathy Campana