Para piglia è teni trà cane è gatti in paese.

Oghje vi n'aghju da contà una chì và da parè strana, i mo ghjatti scacciafugheghjanu u mo canone, fendulu scappà.
Campavamu  tranquillu, animali è umani, ognunu e so faccende, oramai tutt'hè cambiatu. 
I cani alevati per caccighjà anu u so locu chjosu, ma Mascarone, un vechjottu di dece anni si ne surtia sempre di u canile.
À a fine li si hè datu a permissione di stassine liberu è di campà vicinu à e carezze è à qualchì buccone buscatu per furtuna.
Tandu i misgiotti si sò presi di ghjelusia.
Ùn sò chè elli à podè riceve e bone leccherie, basta basta ! 
U ghjacheru spirta di paura è ūn s'avvicina più, tintacciu !
I ghjatti sò ghjunti dopu à u cane, s’arrimentanu si ellu hà i denti pinzii, elli disponenu di sgrinfie chì cercanu l'ochji !
Aghju a paura d'esse custrinta à piglià un psì per Mascarone, ghjè assai disturbatu da ste manere misgesche !!!!
Quand'ellu affacca u so capu, cù a minima voglia di vene à circà cumpagnia, i gatti, da i più grandi à quelli appena nati, li correnu appressu è tandu senterete i mughji ! 
Fughje cum'è quellu chì vede à Satanassu in persona.
Sò cunvinta chì l'altri cani, quelli ricludi, si sbillicanu da a risa, vistu ch'ellu facia u bellu, u preferitu di u padrone, anzi ch'avà si ritrova à filà, a coda trà le ghjambe, da u spaventu.
Mascarone, un mastinu tercanu in tempu di caccia, si caca à dossu davanti à dui mignoculi piluti, parenu fole ! 
È i vostri i misgi, sò tranquilli o ùn volenu à nimu trà li pedi ?
A mi pudite fà sapè, chì cusì ne parleraghju à u mo cane, li darà sullevu d'amparà ch'ùn hè solu à esse castigatu da issi scrianzati accaniti ! 

Wouh wouah !  

Cathy Campana