Antone Natale Nicolai, natu u 21/12/1936 in Corti, ci dice u so parcorsu d’insignante è d’appassiunatu di a lingua corsa!

“Una zitellina à ghjorni colmi d’amore à u latu d’un Babbone è d’una Mammone, Antone è Antunina, funtane di tennerezza è di sapienza paisana. Tuttu, o guasi, ciò ch’eiu sò di a musica di a nostra lingua, l’aghju imparata d’elli.

In scola, corsu ùn si ne parlava ! Ùn era a lingua di u pane ! Ma chì ricchezza funu isse stonde arrubate à i travaglii urtulani è altri capatohjii ghjurnataghji. Sò di e più belle di mo ricordi. U Maestru Unicu, di a scola di Gavignanu, dendu capu à tutti, unu appressu à l’altru, una scienza di pedagugia innata, un incantu, un esempiu chì oghje chè oghje mi empie d’ammiru.

Eppo à cinquesima in Morosaglia, dopu u certificatu, u più bellu rigalu fattu à Mammone è à Babbone.

A partenza di tutta a famiglione pè Marseglia, in cinquantadui, cumu tante è tante famiglie sradicate, pè stentà un pane più facile è dà una scenza di riescita à i numerosi figlioli è figliole.

U liceu St Charles. U baccalureatu. L’università St Charles, a licenza di matematiche. L’insegnamentu in liceu fin’à u mille è novecentu settantaquattru.

Eppo in settantaquatru pruvisore d’un liceu pariginu è in ottanta di u Finusellu in Aiacciu.

Una piccula incursione à l’Università di Corsica, cum’è Maestru di Cunferenze  Assuciatu, una campa di scopre st’altra faccia di l’insegnamentu.

Palme accademiche (1976), Meritu naziunale (1983), ricunniscenze dedicate à Mamma è a Babbu d’avemi datu issa scenza di fà i studii.

In fine a ritirata in Balagna è sta voglia di cuntinuà d’esiste à traversu l’accumpagnatura pedagogica è a scrittura di a nostra lingua. Un’altra campa. Eccuci à oghje pienu di ringrazii pè tutti quelli ch’anu cruciatu e mo strade è pè tuttu ciò chè no avemu spertutu.”