A FURESTA DI U SPIDALI

U Spidali è a furesta in giru si chjamanu cusì per via chì longu à i seculi ci hè statu custì l’agrottu per quellu chì passava è dinù, belle sicura, pè i pastori chì facianu a muntagnera. Oghje ghjornu chjassi pè una passighjata di garbu, ci ne hè tanti è più, cù à l’ingiru un’ambiente di verdura..

Sò 733 ettare di furesta à dà agrottu per parechje razze animale in libertà. Si infattanu buciartule, granochje, porchi è vaccine, ma ancu mufre in libertà pè issi boschi. In quantu à i paisaghji, sò maraviglie, altru ùn si pò dì ! Pini, machjoni è machja facenu un stratu tamantu di virdura  duv’ellu si imbatte nant’à divizia di spezie è surprese, da una vista chì apre nantu à un panorama immensu sinu à quella machja duv’elli spiccanu scogli di granitu rossu è luccichi.