MESSA À GHJORNU DI U 15 DI GHJUGNU DI U 2013
Vita di l'associu
![METUDU DI AMPARERA: LINGUA CORSA METUDU DI AMPARERA: LINGUA CORSA](https://interromania.com/sites/default/files/styles/image_400xx/public/photo.jpg?itok=vZWsPgko)
METUDU DI AMPARERA: LINGUA CORSA
Pè andà subitu à cunsultà i ducumenti, cliccate nantu à e parolle scritte in rossu
Salute,
Sta volta,
1- CAVALLARIA PAISANA.
Longu à l’annu chì si finisce, trà Serviziu CCU, Associu IITM è Associu CCU avemu pussutu travaglià in parechje direzzione cun giovani è… menu giovani : scrittura, cumenti literarii, presentazione è critiche literarie. In preparazione di a SIMANA DI A LINGUA CTC, aviamu fattu un picculu bilanciu in quantu à l’opera di Natale ROCHICCIOLI, sempre miscunnisciuta… Eccu una filmata stratta da isse stonde Literatura/Prosa
2- FILIDATU È FILIMONDA.
U secondu rumanzu di Sebastianu DALZETO, Filidatu è Filimonda, ci hè da dumandà si s’ellu hè statu capitu cum’ellu si deve. Di fatti, s’omu mette da banda a nomina di robba ridicula è di opera rumanzesca malandata, s’ellu si leghje senza pregiudiziu, si scopra un’altra dimenzione. Julian MATTEI hà purtatu un studiu cù i so cumpagni è po hà fattu un ricensu chì permette di prulungà lettura è riflessione.
Literatura/Prosa
3- DA TUSCANA :
Sò parechji anni avà ch’è no travagliemu cun currispundenti in Tuscana : da l’anni novanta, da i primi prugrama INTERREG hè principiata una cuuperazione chì cuntinuà à purtà frutti in campu universitariu, storicu, literariu è po ind’è l’azzione culturale. Oghje si tratta di teatru. A pezza Testa di Rame hè stata prugramata à u Spaziu Natale LUCIANI è hà premessu un bellu scambiu è prugetti: edizione di u testu uriginale in dialettu livurnese, tradottu in talianu è in corsu. Hà dinù ispiratu a cumedia Sottu à l'acqua. Oghje esce à l'edizione Titivillus un libru pè i zitelli: una maraviglia di arte è di pedagugia! Literatura/Teatru
http://www.ibs.it/editore/Titivillus/titivillus.html
4- AMPARÀ A LINGUA CORSA:
In stu mumentu, si prepara un metudu di amparera di u corsu pè i principianti. Hè u sboccu di un travagliu d’attellu chì hà adunitu durante sti mesi scorsi insegnanti, animatori di l’Associu IITM è CCU, persone in attività è ritirati.
Sò vinti sequenze pedagogiche propiu per quelli chì volenu acquistà e base di a parlata. Currisponde à u livellu A di a classificazione eurupea di e lingue amparate.
Ogni sequenza hè cumposta di :
- Un dialogu cortu (cuntenuti tematichi currenti è acquisti linguistichi graduati)
- Una presentazione prugressiva di forme gramaticale (merfulugia, custruzzione di e frase semplice)
- Vucabulariu presentatu à temi (campi tematichi è lessicu currispundente)
- Manere di dì (spressione è forme usuale usuale di a parlate)
- Esercizii di ripetizione è riimpiegu di e forme amparate
Unepochi di studianti di l’Università participeghjanu in issu travagliu dicendu e frase è dialoghi.
Si pensa ch'ellu puderà esse messu à dispusizione di a ghjente interessata allocc'à settembre chì vene. Sarà una rubrica di InterRomania è issa amparera si ferà à distanza.
Patrizia GATTACECA participeghja à un bellu workshop in Sluvenia è travaglia in un attellu di traduzzione cun quattru spezialisti di scrittura è traduttulugia : u puetu slovenu Thibor PANDUR, i friulani Mauriziu MATTUZIA è Tsead BRUNJA, l'asturianu Martin LOPEZ VEGA . U scontru in Lubjana accoglie tante spressione di parechji paesi è lingue varie, tutte à serviziu di i baratti culturali è puetichi. Intantu di pudè ci arricà i ducumenti ch'è no sparteremu cun voi, eccu duie filmate d'isse stonde Literatura/Puesia
http://www.lit-across-frontiers.org/workshops/slovenia-translation-works...
ARRUGATE VI….. ARRUGATE VI….. ARRUGATE VI….. ARRUGATE VI….. ARRUGATE VI….. ARRUGATE VI…..ARRUGATE VI….. ARRUGATE VI…..
S’ella vi garba a lettura di a literatura corsa, arrugate vi puru per BONANOVA, mandendu ùn sceccu intestatu à : Associu di sustegnu CCU. Centru Culturale.Università di Corsica. 20250.CORTI (u numeru doppiu 28-29 costa 6€).