SQUARCINI Paulu Antoni

MARTINI Manon

FEDERICI Marc-Antoine

CRONACA

L’avia detta Marina Raibaldi !            

          Quale hà mai sunniatu d’avè una piscina olimpica in u so quartieru?

Pare ch’ella apppii riesciutu issa scumessa a cità d’Aiacciu . Vultemu à u principiu, in l’anni sessanta. A tupunumia ùn si sbaglia mai, eppuru l’ingeniori chì anu decine d’anni di studii ind’a valisgia ùn l’averia micca datu a pena in capu di fà duie ore di corsu à semana pè sapè chì custruisce à nantu à « I Salini » o « I canni » seria un periculu à longu andà. Fattu si stà chì a cità, bracci aperti, mughjava à i ghjunghjiticci « Venite! Venite !  Cumprate è stallate vi chì ci sò case nove framante à bon pattu ! » U dettu dice bè chì : « Dopu à cent’anni è centu mesi l’acqua volta à i so paesi », hè ciò chì hè stalvatu. Ind’u 2007 dighjà, e vitture anu pussutu apprufittà di un bagnu bellu frescu chì hà fattu prò à parechji mutori è soprattuttu à parechji mecanichi. A cità, impenserita pè i so ghjunghjiticci novi, decide tandu di mette u pacchettu pè riparà sti disguasti senza cuntà i zeri à nantu à u scieccu.

Pensavamu à un età d’oru pè a cità, un età sbarazzata da l’inundazione è da i disguasti cù a creazione di vasche di ritenuta apposta pè l’uccasione.

Ma s’affaccò 2020 cù e so 10 piaghe d’Egittu : Fochi sprupusitati, minaccia d’una guerra mundiale cù i Stati Uniti è l’Iranu, crisa sanitaria, crisa ecunomica è appena esciuti di un cunfinamentu longu, mi criderete s’o vi dicu chì, ind’una mez’ora, s’hè piossu guasgi un mese d’acqua. Vulavanu i mobuli, nutavanu e vitture, una vera scena di filmu ! Dicenu chì sò 150 persone à esse state succorse da i spenghjifochi, imaginate… Tandu omu s’hè dumandatu : « Perchè ùn hè riesciuta ? Cumu fà per l’avvene ? »

Noi a vi dimu : mette u frenu à l’acqua mancu Diu pò, ma mette u frenu à a frenesia urbana, si pò !