A LITERATURA DI I « BLOGS »: Julian MATTEI

A LITERATURA DI I « BLOGS »,

UN RINNOVU DI A CREAZIONE IN LINGUA CORSA ?

APRITE STU LIGAME DA VEDE A VIDEÒ

https://youtu.be/EUfodvFMrwo 

 

À spessu si sente dì - è di manera ghjusta - ch'ella cunnosce a literatura un rinnovu tamantu dapoi l'anni 2000. Ma fendu issu custattu si scorda à spessu omu di ammintà u rollu di l'Internet è di i so arnesi in quella divizia. Sti pochi anni sò diventati i bloghi, i fori è e rete suciale attrazzi di prima trinca da favurizà a creazione in lingua corsa è l'emergenza di parechji autori novi.

U rollu d’Internet in u spaziu oghjincu ùn si ne pò discorre senza ammintà l’influenza di A Piazzetta, ghjurnale in lingua corsa creatu in lu 2007. Puru s’ellu ùn hè micca un situ « literariu », bench'ellu appia publicatu quantunque testi di creazione, in prosa, u so successu hà datu un abbriu à d'altre prove di listessu ceppu. Frà quesse, a prima hè quella di i fori è u campu di spressione ch’elli facenu affaccà di fatti à prò di i scrittori. Hè statu per un dettu u Foru Corsu una vitrina per tutti i pueti di l’isula è attempu per custituì un arnese maiò per a pratica « virtuale » di u chjam’è rispondi. D’altri cum’è Gazetta di Mirvella o Isula Foru sparteranu elli dinù u so universu literariu.

Issu sbuccià di i fori vene cumplettatu da a multiplicazione di i bloghi dapoi una decina d’anni. Creatu in lu 2008, Musanostra hè unu di i più cunnisciuti è attivi, al di là di a literatura corsa, incù un aspettu criticu di pettu à l’opere esciute è u scopu d'incuragisce a creazione. St’associu impegnatu assai rimette ogni annu un premiu di a nuvella in lingua corsa è in francese. Ma hà dinù per scopu di purtà un sguardu analiticu, in particulare nantu à a situazione è l’attualità di a literatura corsa.

Fin’à u 2013, u bloggu "Pour une littérature corse" di François-Xavier Renucci hà iniziatu una vera riflessione in quantu à u fattu literariu in Corsica. È si face u custattu chì longu à l’anni hè crisciuta a prisenza di i bloghi (Passions Cyrnéennes, Primamusa, Anima cappiata) è certi facenu ancu a scelta di a spezializazione. Ci hè dinù Terre de femmes di Angèle Paoli chì non solu face un accennu à a literatura feminile ma chì rende contu propiu di l’attualità puetica, fendu da antulugia cutidiana, è publicheghja dinù articuli critichi è di analisi.

 

Un passu ver'di a nurmalisazione

 

In u frattempu, face affaccà l'arnese numericu un ambiu literariu novu cù tematiche pocu sfruttate in u campu di a literatura corsa. Si pensa soprattuttu à Tarrori è fantasia, attivu da u 2010 à u 2014, chì dete e so prime lettere à quelli generi di u fantasticu è di l’heroic fantasy, pocu aduprati fin’à tandu. L'anni 2010 permettenu di francà una tappa soprattuttu per via di una « prufessiunalizazione », chì a creazione si marita à pocu à pocu cù l’esigenza è a publicazione. In u 2013, Praxis Negra si custituisce un cumitatu di lettura. Ma hè soprattuttu cù Tonu è Timpesta chì a rilazione trà literatura corsa è Internet franca un'altra una tappa. Per a prima volta, stu bloggu creatu in lu 2016 diventa una sucetà di edizione cù un veru prugettu edituriale.

U scopu serebbe piuttostu di sapè ciò ch'ellu dice stu sviluppu tremendu di a nostra blogosfera nant'à a lingua è a literatura corsa, è forse d'un puntu di vista suciolinguisticu. Ci arricurdemu ch'ella era digià stata una sfida l'emergenza, à a fine di u XIXu seculu, dopu à a Tramuntana di u 1896, d'una literatura specifica di spressione corsa, chì avia alzatu, in fatti, ciò chì paria d'esse sempre un "dialettu" o un "patois", per certi, cù a cunnutazione sprezzativa chì si sà, à u livellu di una lingua di scrittura.

Oghje, circa un seculu dopu, hè propiu un segnu di "nurmalisazione" di a lingua corsa, quand'ella s'impatrunisce di l'arnesi novi di spressione. Quand'ella ghjunghje nant'à Internet è ch'ella face, non solu da mezu di cumunicazione ma dinù d'arnese per a creazione, si franca un passu ver'di a nurmalisazione è si cambia e raprisentazione in giru à sta lingua.

 

A "divizia" è i genneri novi

 

Hà apertu l'Internet una pagina nova : hà cuntribuitu à fà affaccà autori novi inde u campu literariu, chì dopu anu publicatu. A literatura di i blogghi si scrive propiu inde u periudu di a divizia, ch'ellu ammenta u prufessore Anghjulu Pomonti inde u so libru "La littérature d'expression corse entre tradition, politique et modernité". Ghjè non solu una tappa di rinnovu di a creazione literaria ma dinù di scambiamentu di u raportu di pettu à a scrittura in lingua corsa, à u livellu di i genneri di a mudernisazione di u corpus è di i stili. Ma dinù inde u raportu di pettu à l'identità. À spessu, l'autori chì scrivenu nant'à st'arnesi numerichi sprimenu l'identità senza fà un soprinvestimentu ideulogicu. Ùn ci hè micca rivindicazione militante : li basta a lingua à cunvucà l'identità, senza fà una sopravalurisazione affettiva. Ùn hè micca solu u fattu di st'autori chì scrivenu nant'à i blogghi, chì a facenu dinù d'altri scrivani, ma ferma un puntu cumunu assai significativu è chì face parte dinù di una nurmalisazione è di un raportu di più scumplessatu di pettu à a lingua. Face vede dinù chì a lingua hè propiu un ogettu vivu chì campa cù u so tempu, al di là di esse un patrimoniu tenutu assai.