Nivaghja

Questu quì, à parè meiu, si sarà lacatu a so penna in casa...

È hà decisu d’andà à fà si una spassighjata sopra à u paese.

È po’, ghjuntu quì, scupertu a vista è cum’ell’hè falata a neve stanotte, hà intesu dui versi chì li venianu in capu. Hà circatu ind’istacca, ma a si avia lacata in casa. Tandu,  si mette in culipipuli, piglia un steccu in terra, è scrive... Ma tandu, ùn li vene in capu chè... NIVAGHJA!

Anh... ne valia ancu a pena, andate puru!  I pueti d’oghje, s’elli ùn anu carta è penna, perdenu ancu l’estru pueticu

Sarà un acellu?

Ùn ci vole mai à spiccià si. A mi anu sempre detta, più di una volta. Ma aùh! Eiu, sò sempre statu cusì. Mi spicciu, mi spicciu, è ghjuntu à conti, m’avvecu ch’o mi sò lacatu tuttu in casa. Di prima l’ispirazione è avà ... i spechjetti!

È ùn ci hè manera di disciuplicà e cose. Issu affare quallà, propiu à mezu à... sopr’à i nuli bianchi, issa cosa scura cusì, chì pare tuttu un’acula alisparta, sarà quessa... o solu una tacca di bughju trà grisgiu è biancu?

È po, cum’è sempre, simu soli... I cristiani assinnati, cun stu tempacciu, si ne stanu in casa è imburranu u carminu, è fora, ùn ci hè chè  tonti... cum’è mè.

Mi saraghju persu…

Ùn mi pare micca d’esse passatu per di quì quandu sò ghjuntu... Ùn mi paria cusì zembu è gobbu u terrenu.  Mi saraghju persu... O allora, hè ch’ella ci hè torna ghjunta una nivaghja...infine... un nivaghjone!  State à vede ... state à vede... Risicu ancu di strappà mi u collu. Infine, alè, curagiu è ... focu à a ceppa!