Eo, Villese, tutti i ghjorni mi facciu una passighjata, sia da L’Alzetu sinu à Canale,  sia à l’inghjò di l’altra banda sinu à Casevechje. Figurate vi chì l’altru ghjornu, falendu davanti à Santa Lucia, aghju intesu un rimore stranu di mutore ... Passendu aghju capitu cos’ellu era. Ci era unu d’issi camiò muderni cù u so elevatore, è in cima à l’elevatore, un operaiu affaccendatu chì scumbattia nantu à a facciata di a ghjesa... Sò statu felice di vede chì a municipalità facia intratene u nostru patrimoniu...

È po l’altru ghjornu, aprendu u giurnale, aghju capitu megliu di cos’ellu si trattava cù “IN GIRU”...

Ghjulianu de CASABIANCA ! Era ellu quassù, in u cascione di l’elevatore. Operaiu sì, operaiu d’arte è affaccendatu à fà d’ iss’opera mumentanea ch’ellu pitturava... un munimentu pruvisoriu, ma memuriale assai…

Memoria di a fede è di e tradizione culturale à traversu à a cultura nustrale è po’ u ramentu di tradizione chì mettenu u lucale in chjama è rispondi cun l’universale.