RICORDI DI GHJUVENTÙ

In Bussu s’è tù ci voli falà

Ci hè sempre una truita à piglià

È l'onde sò cusì chjare,

Cusì chjare, chì à mè mi pare

Chì a mo ghjuventù nota quallà,

Chì a mo ghjuventù pesca quallà.

In Mont'Altu s’è tù ci voli collà

Ci hè sempre un cignale à caccighjà

Torduli è po’ culombi

Chì si ridenu d'i to piombi

Tutta a mo ghjuventù corre quallà

Tutta a mo ghjuventù batte quallà.

 

Ricordi di ghjuventù,

Ch'ùn ne finiscenu più

Ricordi di ghjuventù,

Ma... N'averai ancu tù,,.

In ghjesa s’è tù ti voli cansà

L'altare ti parlerà d'eternità

Ci hè sempre una festa

Un coppiu à marità

Un paternostru in l’oscurità

Tutt' a me ghjuventù preca quallà

Per  i Temponi s’è tù vai à spassighjà

E filette ti voleranu racuntà

Qualchì storia d'amore...

O ma ,.. lascia le discorre...

Sò bugiarde ! ùn m'anu vistu quallà,

Sola tù, ti ne poi ricordà...

 

Ripigliu

 

A scola, ùn a ti vogliu mostrà

U maestru a ti dicerà

L'ore ch'ell hà passatu

À fà mi amparà

‘sse regule  di  francese ... per chì fâ ?

Forse un ghJornu sì... per spaisà...

Ti vogliu fà u paese visità,

È dì ti, solu à tè, a verità,

Eccu u campusantu,

È quì vogliu piantà

Quandu l'ultimu, versu cascarà

Quandu a mo ghjuventù si  morerà...

 

Ricordi di ghjuventù,

Ch'ùn ne finiscenu più

Ricordi di ghjuventù,

Ma... N'averai ancu tù,,.

Louis Rutherford

 

 

 

L’ACQUA

 

Acqua di a mio funtana

Oghje  quì, dopu luntana,

Sì sempre pronta à scappà,

Chì u to nome hè libertà...

 

Acqua pura, corri, corri

Disceta i nostri cori,

Ùn ti ponu imprigiunà

Chì u to nome hè libertà...

 

Acqua sì nata tutt’in cima

È po’ a rena s’avvicina

Dà li a forza di luttà

Chì u to nome hè libertà...

 

Fiume chì mori goccia à goccia

U to sangue ci dà l’angoscia

Ma ci face ricordà

Chì u to nome hè libertà...

 

Acqua di la mio muntagna

Ai u core chì si lagna

Sì sempre pront’à scoppià

Chì u to nome hè libertà...

 

Acquaccia di cuntinente,

Torbida, pagna, è po’ chì sente

Ti sì venduta à un rè

Chì t’hà imbruttata à piacè...

 

Acquaccia di u “Vaghjinu”

Quandu mi sì à vicinu

Ti vorebbi assumiglià

À tè chì ti chjami Libertà...

 

 

 

Louis Rutherford