In e prufundezze di a cala di Ghjottani, à u punente di u Capicorsu, duve u lume di u sole ùn ghjunghje mai, ci si trova una cità inabissata dapoi millenari. Un scogliu, a Mugliarese, affiura, tale una varruca sopr’à u Mediterraniu, circundatu d’una nebbia zeppa chì pare scullà tuttu lume di u ghjornu, ùn lasciandu chè un’attrachjata eterna. E tenebre sò prufonde, i silenzi pisanti è i murmuri di i venti sembranu sussuri d’invisibile creature, issi strani è misteriosi esseri chì campanu in un mondu d’oscurità è di silenziu, à l’ascosu di i sguardi  indiscreti di a ghjente d’insù, i Tigliacci. Dapoi seculi, i pescadori di Canari, di Barrettali è d’altrò, fughjenu issu locu particulare carcu di legende, d’antiche storie d’orrore è d’entità scurdate.

Tramezu à l’abitanti d’issu mondu sottumarinu ci hè un essere anzianu è pudente chjamatu Ky’Gnarciu, una creatura d’una altra epica, ghjunta d’un altru mondu, chì esistia assai prima di l’umanità è cuntinuarà à esiste assai dopu à a so smarrita. Ky’Gnarciu hà un corpu circulare cupartu d’una pella pagna iridata chì scambia di culore. I so ochjoni luccicanti cum’è stelle ponu vede in u bughju u più prufondu. I so membri, bioluminescenti, longhi è scioppuli, si finiscenu cù un barbigliulu pudente capace di sbaccà a capochja di i Tigliacci. Ky’Gnarciu hà dinù una sfrana di nutaghjole chì vibranu è emettenu una dolce luce fosfurescente. Issu mostru si nutrisce cusì di u cevellu di i Tigliacci. Quand’ellu si move, lascia daretu à ellu una striscia di lumi, a pulvericcia è u so cantu s’assumiglia à una melodia appaciante capace d’attirà quelli chì a sentenu. I Tigliacci sò esseri senza anima, cuperti d’una fine polvera bianca tigliuta è chì spiritanu e gallerie di l’anziana usina di tigliu di Canari nanzu chjamata l’infernu biancu. A Mugliarese ùn hè micca deserta. E creature chì populanu e zeppe fureste d’erba marina ùn s’assumiglianu à nunda di cunnisciutu. E so forme sò cambiarine, e so intenzione scure è a so esistenza sputica rimette in questione e nostre certezze nant’à u vivu. I so corpi, d’un colore indefinibile, pare palpità è trasfurmà si custantemente, cum’è s’elli eranu fatti d’un buriale vivu è instabile. I so ochji d’una luccichera fosfurescente trafuranu l’oscurità, ochjandu l’intrusi cù un’intelligenza ghjacciata è impersunale.

U prufessore Goldwinn Rasdale, un tercanu crittozoologu canadianu, hà cunsacratu a so vita à perseguì isse creature legendarie. A so ussessione l’hà cunduttu in Ghjottani, accumpagnatu da u so assistente, in busca d’isse entità cunnisciute da e rare legende ghjunte otre-Atlanticu è soprattuttu un vechju manuscrittu polverosu arricatu di Corsica à u Canada da u prete Le Loutre, abbate missiunariu in a pruvincia reale di l’Acadia, mentre una visita ufficiale in u 1769. In u core di a cità, scoprenu un anzianu tempiu in ruina à i muri cuperti di strani segni, forme geometriche cumplesse è fiure animale buffe. Certe intaglie ripresentanu mostri tentaculari, d’altre, scene di sacrifizi è scuri rituali. E creature ripresentate nant’à e petre sò spaventose, esseri à numerosi membri, dotati d’ochji luminescenti è di scane affilate. In u centru, ci hè un’apertura immensa chì cunduce à una caverna sottumarina insundevule. L’acqua ghjacciata ci si pare più densa è strani soni ricuccanu da e prufondezze. Alluminandu si di fiaccule, u prufessore Rasdale è James palmanu prudentemente, scuprendu un mondu insuspettatu.  Piane infinite d’acqua negra è ghjacciata si stendenu davanti à elli è creature simule à gigante anguille à l’ochji chjari è numerosi denti spichiti s’affaccanu di e tenebre. D’un colpu, una massa madurnale spunta, un caliseu rondu di tentaculi è d’ochji, cupertu d’una carapazza chitinosa è pulsante. Emette un luciore verde fosfurescente, alluminandu a grotta d’un fulgore malsanu è nimichevule. Ky’Gnarciu strillula, spaventandu James chì hè aspiratu in l’acque negre, spariscendu in l’abissu in un muchju mutu chì si perde in u sprufondu. U prufessore Rasdale, chjappu d’un terrore immensurabile nota infuria quant’ellu pò, l’adrenalina cuntratendu i so musculi, versu à l’aria, lascendu daretu à ellu per u sempre u tempiu, i so misteri è i so orori. Dopu à u so scontru cù Ky’Gnarciu, hè spiritatu da visione spaventose. A so mente hè sbrembata da a rivelazione di l’esistenza di realità chì spassanu a so cumprensione. A scuperta di a cità abissata è di i so abitanti rimette in causa tuttu ciò ch’ellu sapia nant’à a storia, a scenza è a piazza di l’omu in l’universu, cum’è un schiaffu à l’ego di l’umanità.

Sottu à a scusa di scavà u nichelu di e petre righjittate da l’usina, in u core di u parcu marinu di u Capicorsu, Colin Tremblay hè in di fatti un affaristu predaghju è sullaghju bramosu di chjappà l’entità descritte da u so soceru, u prufessore Rasdale. A notte hè cascata nant’à u Capicorsu, infundandu a cala di Ghjottani d’un ciconu. Tremblay, dapoi u so lussuosu battellu, feghja i lumi spampillanti di a so installazione di cavata sottumarina. Ignurandu l’avertimenti di u vechju prufessore è di i raconti di scure creature.  Per ellu, ùn ci era chè opportunità, richezze à scavà d’isse prufondezze. Purtantu, mentre chì tichi tichi i so ardigni sundanu è addentranu i fondi marini, avvenimenti strani si pruducenu. L’allestimenti cascanu in panna, e cumunicazione sò mestate è i ciumbadori rapurtanu visione strane di forme muvente in l’abissu. Parlacci d’una maladizzione si sparghje trà l’equipagiu, appatturita da legende lucale di Ky’Gnarciu, u mostru di l’abissi. Mentre chì Tremblay sopravede l’operazione, una viulente scuzzulata face tremà u battellu. I lumi si spenghjenu è tandu u ponte hè in u bughju. Mughji di terrore riccucanu mentre chì tentaculi gigante sorgenu di l’acqua, agguantanu l’omi è i sfrumbula in e prufondezze. Tremblay chjappu di spaventu prova à fughje, ma hè troppu tardi. Ky’Gnarciu, scumudatu in a chetezza millena hè in furore. Ùn franca à nimu per prutege u so reame. U battellu è a pianiforma sò infundati è Tremblay, cum’è tutti l’altri è tanti altri prima à ellu, sparisce in l’acqua prufonda. A matina dopu, u sole si alza nant’à u Capicorsu silenziosu. U mare hè calmu è ùn ci hè nisuna traccia di l’incidente di eri. Solu a Mugliarese, imperturbabile è immutabile, affiura, guardiana di i secreti è i misteri di a cità ingulfata.

Purtantu, in u luntanu, un soffiu fretu si ne scappa di e cive di a mina, cum’è un murmuru spettrale. U rimore di i passi fantasmatichi di i Tigliacci, prigiuneri di u so passatu è di u tigliu, ribomba, per u sempre liati à a storia di Canari è a so presenza spirita issi lochi, cum’è una maladizzione.