Cantu caru

Cantu caru

 

Cantu di a mo cuntrata

O lu soffiu essenziale

Scupertu avanti nata

Ellu toglie ogni male

In a corsa a parlata

Per me ghjè a più chì vale

 

In paese di Canale

À fianc'à u mo fratellu

Era cum'è un rituale

Sparte musica cù ellu

E meludie immurtale

Trasmesse da un zitellu

 

Oghje sempre in cantata

Pà bocca lu versu corre

Mai ùn mi sò richetata

Pratichendu in amatore

L'impulsione prima data

Da Bastianu u cantadore

 

U cantu hà magnificatu

Ogni mumentu di vita

Qualchì volta sullevatu

Di rime mi sò nutrita

È cusì m'hà appruntatu

À l'esistenza svanita

Vogliu chì a mo scappata

Di stu mondu sia in cantu

Incù lingua affezzionata

È a mo famiglia à cantu

In pace adormenata

À l'eternu in campu santu.

Cathy Campana